MYANMAR : President tawhta bâh awpa hlâta la thi sala a pha via aw - U Win Myint

Târi 1 Hmypi, 2020 nohta Myanmar pheisaihzy ta Myanmar sawhkhâ ama thypathlah awpa nona khata, kha nota Myanmar President a châpa, U Win Myint kha Pheisaih-zy khata, President a châna tawhta â pabâ awpa ta, tah ei ta; President heta, ama biepiepa hawhta President tawhta bâ awpa hlâta la, thi awpa a khoh via, tahpa ta â chhy, tahpa a reih.

Târi 1 Hmypi, 2020 liata Myanmar pheisaihzy ta Myanmar zawpi ta amâ tlyh patlohpa, ama thy pathlah hapa, NLD chhihthapa sawhkhâ liata President U Win Myint heta Naypyitaw liata Court hmiakô liata â duana liata Pheisaihzy ta ama patu thaoh nota President châna bâsai awpa ta ama tahna kyh he a reihpapua.

Myanmar pheisaih sawhkhâ heta U Win Myint he biebuapa nano nanopa pa-ao ei ta, târi 1 Hmypi, 2020 tawhna khata O liata ama hraih lymâ chy.

President parohpa U Win Myint ta Court liata a reina dâhta cha, pheisaihzy ta Myanmar sawhkhâ thypathlah awpa ta hmah ama lana noh, târi 1 Hmypi my liana khata, Myanmar Pheisaih liata Senior Officer panozy cha a pahrâna, 'Presidential Residence', Naypyitaw lâ a vaw ngia ei ta, a hnatlâna a pha khao leipa vâta President tawhta â pabâ awpa ta  ama dycharao, tahpa ta a reihpa hawhta ano vyuhpa ta a duahpa Dâhpahnopa ta a reih.

President heta he Pheisaih Officer panozy ta bâh awpa ta ama dycharaona cha, a hnatlâna pha ta, bâh aw vei, tahpa ta achhypa ta, “Pheisaih Officer-zy chata bâh awpa ta ama tahna â pyh leipa vâna chata, hmo pha lei kawpa a tlô thei aw, tahpa ta ama chhopa cha, President chata bâh awpa hlâta thi sala a pha via awpazie ta â chhu,” tahpa Dâhpahnopa U Khin Maung Zaw chata a reih.

Pheisaihta sawhkhâna ama lana rakha tawhna khata, NLD chhihthatuhpa State Counselor Daw Aung San Suu Kyi chhao patâh haipa châ ta. President U Win Myint he Daw Aung San Suu Kyi hrialâhpa peimawh kawpa nata, NLD Vice Chairman a châpa a châ.