Mara thla (month) moh ama bina dâh nata ama bina chhâpazy

MARA THLA (MONTH) MOH NATA AMA VAW BINA CHHÂPA

NAWH (January) : Hawti chaipa, seihnai chaipa nata, pih hnôh chaipazy he a 'nawh' chaipa ama tah tyh. Cha hawhna chata, thla ama rei tua chaipa a châpa vâta 'NAWH' tahpa ta ama vaw bi.

HMYPI (February) : He thla he Âhmyhpaw a pabyuh lichih a châpa vâta 'HMYPI' thla tahpa ta ama bi.

PAMIH (March) : Pamih he zôhripa châ ta, he daihti he a pawh daihti a châ. Pamih zôhri a pawh tyhna daihti a châpa vâta PAMIH ama vaw tah.

PACHAWH (April) : He daihti he aohmâ zy, âhnalasipa zy, nata hmo hropazy ama pachawh tyhna daihti a châpa vâta, PACHAWH ama bi.

PATÔ (May) : Patô he sihnapa châ ta, a pawh tyh hra. Cha a paw cha a tô ta pawh ta; he a pawna daihti he PATÔ ama vaw tahpa a châ.

CHHIEPA (June) : He daihti he vâsuati hluh ta, nohkhihzy chhie ta, â hnykhaw chaina daihti a châpa vâta CHHIEPA ama vaw bi.

KHIHPA (July) : He daihti liana heta cha vâsuati zy bâh ta vaw chyh via ha ta, Nohkhih Chhiepa nata, zohpazy chhao vaw pai via ha ta, chavâta KHIHPA tahpa a châ.

THLAZOH (August) : He daihti he cha khihti hluh ta, Nohkhih chhie ta, a zohmyh ngaita tyh. Tawhta thlâpâ a chamy daihti châ ta, a zo lâ chhao a zoh kaluh thlâh ha tyh. Chavâta THLAZOH ama vaw bi.

THLARÂH (September) : He daihti liana heta cha khihti zy chhao vaw chyh via lymâ ha ta, meih a chhohpa nata, meihdozy chhao vaw pai lymâ ha bâ ta, Nohkhih cha vaw pavâh via laih ha ta; chichipazy chhao ta ama paw râhpazy ama papua ha hra. Chavâta he daihti he THLARÂH ama vaw bi.

PHIATA (October) : Hlâno cha sâh he a Suh ta tai leipa ei ta, a kô ta ama phia tyh. Sâh â vaw daih na ta sâh ama phia tua chaina daihti cha PHIATA ama bi.

PHIAPI (November) : Sâh kô ama phia lichih, raipi raihrâhta ama hmâ lichih cha PHIAPI ama bi.

DI (December) : Kô a vaw chhâ na ta lyu raihriapazy nata chicheipazy chhao â di khai ha bâ na, ama tah tyh. Chavâta DI tahpa ta ama vaw bi.

(Bielana - 'Mara Ryusôh Beihpari' châbu - Rohtuhpa : Bizai)