Chin State liata hmo tlôpa vâta US ta Myanmar pheisaih sawhkhâ maochhie

US sawhkhâ chata Chin State liata Myanmar pheisaihzy a pielyuna dâh cha maochhiepa ta, khizaw râh nano nanopazy cha Myanmar pheisaihzy cha ama peihriana kyh liata thailei pachâsa awpa nata, hmo a tlôpa zydua cha Myanmar pheisaihzy vâ sai a chânazie palâsa awpa ta hruapa ta, Myanmar pheisaih chôta hriena chaluah awpa cha hmo tao awpa peimawh kawpa a châ, a tah. Hâta hmiatuapa Chutyhnoh liata Thâtlâh khihpi, Chin State, Myanmar liata O 160 hlei nata, achhyna-O 2 mei ta a kâ khaipa vâna khata US heta he maochhiena reikah he a papua hapa a châ.

Abeipanoh khata, US State Department biephuahtuhpa Ned Price chata, he hawhpa nôchhiena, pheisaihzy ta ama râh chyhsa chôta peihriana laipa ama tlôkheipa dei châ leipa ta, ama O nata lyu nata, Khazohpa amâ chhyna suzy taihta ama tlahnao khohpa heta Myanmar pheisaih sawhkhâ ta a râh zawpi hrona nata, râh zawpi phana awpa a pachâ leizie a palâsa kaw, a tah.

Ned Price chata, “He hmo tlôpa rarô-y kawpa heta a chatliena lâta khizaw râh nano nanopazy ta Burmese pheisaihzy cha he peihriana zydua liata maophaohna patosapa ta, peihriana lai viapa nata, chyhsa adona tovyuh paraona lai viapa a tlô leina awpa ta hriena chaluah awpa â ngiah ta, he heta Myanmar pheisaihzy ta adyuhna chhaichhi ama lana hnawh pakhâpa taihta hriena chaluah awpa a byuh” a tah.

Chutyhnohta Thâtlâh khihpi, Chin State, Myanmar pheisaihzy ta Meithei nata bomb-ta ama tlahnao nona khata, O 2000 a ypa liata O 164 cha mei ta kâ khai ha ta. Chin Human Rights Organization (CHRO) ta ama reinazie liata cha, he O kâpazy he Pachyhnoh taihna khata a kâ pazao thlâh ha chy, ama tah.

Chutyhnohta Thâtlâh khihpi ama tlahnaona liana heta, krizyhpa achhyna-O miano - Church on the Rock nata Presbyterian Church-zy cha a kâ hra. 

Hârapazy nata hawtipazy mohôhtuhpa py, ‘Save The Children’ py Office chhao mei ta a kâpa hawhta reipa châ ta. He py, London liata supipa a hneipa heta he khihpi a ngia tuana lâta a ypa, hârapa deichhyna O liata hawtipa 20-zy nata ama pachutuhpazy cha ama pachâ ngaita, tahpa ama phuah. 

He hawhta a châ nona heta, Myanmar pheisaih biephuahtuhpa Major General Zaw Min Tun chata Thâtlâh khihpi Myanmar pheisaihzy ta mei ta ama rao tahpa cha biechaopopa a châ tahpa ta, khihpi mei ta  araotuhpazy cha People’s Defense Forces ama châ a tah.