Champions League : Kô 2021-22 Champions League Last 16 saichhieliena

 

Europe liata Football Club phapazy ataopasuana lai chaipa nata pasô a hlao chaipa, ‘Champions League last 16’ cha atazâ Hriaheihzâ tawhna heta Paris St-Germain v Real Madrid hleikhôta, Sporting Lisbon v Manchester City-zy a hmiachhypa ta akhaih pathaopa a châ ha bâ heih aw.

Spanish Club laipa Barcelona hmia hmô khao aw ma pi

Atahmâ ta Champions League Last 16 akhaih awpa he kô 18 chhôhta a eikha n’awpa ta Spanish Club laipa, Barcelona a hlao leipa ta Champions League Last 16 akhaihna hmiatua chai awpa a châ.

Spanish thâtihbu AS chata Barcelona ta Group Stage liata Bayern Munich pahnie leipa ta ama tla nona khata, “Football club pha patluapazy ataopasuana tawhta apabâna” tahpa ta ama vaw papua ngâpa kha a châ.

Barcelona heta Champions League tawhta ama tla hapa vâta, Champions League pazipa, Europa League Last 16 liata Italian Club, Napoli ama hmiachhy aw.

Barcelona ta Champions League last 16 ama tlô thei leina daihti hnôh chaipa cha kô 2004 liana khata châ ta, Uefa Cup liata chhao Celtic pahnie heih vei ei.

English Club-zy amâ ki pha kaw

English Premier League Club 4-zy ta a palâh kawpa ta Champions League Last 16 amâ ngia. He hawhna heta ama hmiachhy awpa Club-zy chhao pasiapa a châ :

Sporting Lisbon v Manchester City

Chelsea v Lille

Atletico Madrid v Manchester United

Inter Milan v Liverpool

Champions League Season ei pangawh chhôh liata ei palih chhôh tlai cha Premier League Club 4-pazy ta Champions League Last 16 a ngia ha ei ta. He dei châ leipa ta, Group Stage liata khaih kha akhaih awpa ama hnei thlâh ha chy nota, Last 16 he amâ ngia khai ha.

He hleikhôna heta Club 3-pazy cha atahmâ Champions League Season nyungiapa chalo thei awpa ta pangiasapa Club 4 hryta amâ hlao. Champions League nyungiapa chalo thei awpa ta a hnabeiseihpa Club 4-pazy : Manchester City, Bayern Munich, Liverpool and Chelsea).

‘Away Goal’ ta yzie hnei khao aw vei

Atahmâ Season Champions League Last 16 liana heta UEFA chata amâ khaihlâhpazy tlyliah liata ama kei khichhaina akhaihna liata goal ama khôpa ta yzie a hnei kaw tyhpa kha, yzie hnei khao lei awpa ta dâh panano ha ei ta. ‘Away Goal’-ta yzie hnei khao aw vei.

Khaih 1-na nata khaih 2-na (1^st Leg nata 2^nd Leg) liata a pahniethaipazy cha, Extra Time amâ khaih tawhta amâ pahniethai pyly khiahta la, Penalty hmâpa ta tlô viapa ama tlua bâ aw.

Messi-ta PSG Champions League nyungia hmiatua chaipa a chalokhei thei ma?

PSG ta Lionel Messi ama lapangia nona khata, Ligue 1 nyungiapa chalokheituh awpa hlâta, Champions League nyungiapa chalokheituh awpa ta ama lapangiapa a châna kha a lâluah via ta. French Club laipa, PSG he Qatar chyhsa hneirôhpazy ta ama chalei tawhta kô 10 chhôh cha Champions League nyungiapa chalo cheingei a chhuahpa ta sôhthih chhao ama hryuh kaw. Kô 2020 final liata Bayern Munich ama pahnie khao leipa kha Nyungiapa amâ hnia chaina daihti a châ chy.

Atahmâ duasu liata Forward pha chaipa tah thei awpa pathôh - Messi, Neymar nata Kylian Mbappe hnei hai ei ta. Hriaheihzâ ta Real Madrid ama pahnie nata pahnie lei reizie ta Messi ama phahnaikhei nata phahnaikhei cha â hno aw.

Hriaheihzâ (Pakhyzâ mydi) dawh 1:30Am-pa ta India tawhta cha sai thei aw pi ta, Sony Channel liata â moh thei aw.