India : State 7 liata lahpinô 14 hneipa ta, ama phusâ a lapa khai tawhta â râsai tyh ei!

Bhubaneswar: Chapaw kô 60 nata 70-likahta uhtheipa paw pakha cha kô 48 chhôhta State nano nanopa 7 liata lahpinô 14 a hneipa ta baipa a châpa vâta Hriatuanoh khata Bhubaneswar liata Police zy ta ama patu.

He hawhta lahpinô a hneipazy he he chyhsa heta thlai a râsai heih tyhpa ta, â râsai awpa chyta ama phusâzy a parupa pâ tyh tahpa ta ama bai hra. He chyhsa Patkura police station ôna chhôh, Odisha liata Kendrapara district liata thotlâh khih miakha liata a pahrâ tyhpa a châpa hawhta a thâtih a pahnotuhpazy ta ama reih. Châhrasala ama baina zydua he he chyhsa heta a do leipa hawhta a reih khai ha heih hra.

He chyhsa heta kô 1982 liana khata a lahpinô hmiatua chaipa hnei ta; kô 2002 liana khata lahpinô panona hnei heih ta. He a lahpinô tuapa panozy tawhna heta saw papangawh a sa, tahpa Bhubaneswar Deputy Commissioner of Police Umashankar Dash chata a reih. Kô 2002 nata 2020 likah chhôh khata, lahpi-vahpa a tluana website (matrimonial websites) tawhta chanôzy a hmia pahno laihpa ta, a lahpinô hropazy pahno leipa ta lahpinô ta a hnei laih lymâ ei.

He chyhsa he a lahpinô hnôh chaipa, Delhi liata Pachutuhpa rai a hriapa nahta Odisha khihpi liata pahrâ ei ta. A vahpa ta lahpinô a vaw hnei hapazy thâ a theipa vâta, Police liata biebuapa a pangia.

He chyhsa he Police zy heta a O tlô haipa liata ama kei patu hapa a châ. Police zy ta ama reizie liata cha he chyhsa heta chanô kô 40 rachhôh, laiheihnô (vahpa achhaih hapa, laihsa hawhta a charei heihpa), lahpi-vahpa atluana website liata a ngia hoh kawpazy cha a nua via chai ta. Lahpinô ta a hnei tawh ei ta, ama phusâ lapa ta â râsai ha heih tyh ei.

He a chanô dôveipazy hnohna heta Dawhty (doctor) a châpa hawhta a reihpa ta, a lahpinô awpa ta a dôveipazy he châthai kawpa - dâhthaipa (lawyers), Dawhty (physicians) nata Achu pasâh kawpazy ama y hôlô. .

He ama patu nona heta a ku tawhta Police zy heta ATM Card 11, Aadhaar card 4 nata châ peimawhpa nano nanopa ama hmô.