Ukraine buana noh 3-na : Ukraine chyhsa 198 ama thi ha; Russia Pheisaih 3500 ama thi ha hra

Russian pheisaihzy cha Ukraine ama tlahnaona kyh liata a kawh viapa ta tlahnao awpa ta biepiepa châ ei ta; Ukraine khihpi Kyiv ama tlahnaona liata Hlaotlohna ama hmô thei leipa vâta Russia pheisaihzy cha ki to tawhta Ukraine tlahnao awpa ta biepiepa ama châ ha heih.

Ukraine buana noh 3-na noh liata hmo a tlôpa ngiatlâh a châ viapazy :

1.Ukraine cha Pachyhnohta Russia ta akachaheihna phuah awpa ta ahawna a taopa a dythapa hawhta a baipa cha biethuthâ leipa, tahpa ta, Russia ta Ukraine cha adyuhna pasihsa viatuhpa hawhta a baipa vâta biehraina sianô leipa cha a pyh thei aw vei, a tah.

2. Russian pheisaihzy ta Ukrainian khihpi nano nanopazy cha Bomb nata missile ta tlahnao pazao lymâ chy ei ta. President Volodymyr Zelenskiy chata ama khihpi Kyiv cha ama pabohsa lymâ chy, a tah.

3. Ukrainian Health Minister Viktor Lyashko ta a reina liata cha Russia ta ama tlahnaona noh 3-na taihta Ukraine chyhsa 198 thi ha ei ta, Athipa hry liana heta hawti 3 a hlao ei ta, chyhsa 1,115 ta hmah ama phaoh.

4. Russia Pheisaih 3,500 rachhôh ama thi hapa hawhta Adviser to Ukrainian President Volodymyr Zelenskiy chata a reih.

5. President Joe Biden chata US State Department cha adyuhna chhaichhi, $350 million mâ rachhôh Ukraine paphao awpa a chho.

6. Russia chata UN Security Council ta Russia ta Ukraine a tlahnaona kyh liata Russia maochhiena nata, abyuhna hawhta hmahla awpa ta 'Resolution' a taopa cha, 'VETO' biehneina ta a phie. UN Security Council manôh 15 hryta 11 ta he 'Resolution' he a pha tahpa ta ama 'Vote' nota, China, India nata UAE zy Vote pathla leipa ta, amâ phaih (abstained). He Resolution he UN Security Council liata Manôh a ichapa (Permanent member) Russia ta Veto ta a phie pyly awpa váta yzie hnei muarua leipa a châ pyly.

7. Russia sawhkhâ official website, Russian President Vladimir Putin official website, 'kremlin.ru', cha 'Hacker'-zy ta ama paraopa.