Ukraine buana noh 4-na : Russia President ta Nuclear a hmâh ma? Kyiv khihpi â boh lymâ chy

Abeipanoh khata Ukraine chata Belarus râhri liata Russia vyuhtuapazy nahta apakyhna hnei awpa ta a paryhsa. He he Russia President Valdimir Putin ta Notla râhzy ta Russia nata Ukraine buana liata amâ chahraoh pathuh tu haw, tahpa ta Nuclear hmâna kyh liata ahrohruana bie taihta a reihpapua tawhta Ukraine heta apakyhna hnei awpa he a paryhsapa a châ.

Ukraine nata Russia buana noh 4-na liata thâtih tlâhpipazy :

1. Russia President Putin chata "Defence Minister nata Chief of the General Staff of Russian Armed Forces zy cha ahrohrua awpa ta bie ei pie," tahpa ta, Putin chata Notla râhzy cha Russia adyuhnazie hmah ama la tahpa ta a bai.

2. He hawhta a châ nona heta, Ukraine chata Russia nahta Belarus râhri - Chernobyl ta â ôna leina su (exclusion zone) liata apakyhna hnei awpa ta paryhsa ei ta - he he Ukraine President Volodymyr Zelensky nata Belarusian râh luhpa Alexander Lukashenko zy Phone ta bie amâ chho tawhta a châ. 

3. Ukraine President chata, "He Russia nahta atyupahmaohna/apakyhna chhichâna awpa liana heta a pahnieh muarua vana, châhrasala hmophapa sapapua awpa ta tei ha tua sihla, chatanachata Ukraine Zawpi zydua heta, kei ama president heta he adyuhna he chalihsa awpa hmah ei la tahpa ama pahno na hâh ta," a tah.

4. Ukraine heta Russia ta Belarus liata apakyhna hnei awpa ta ama hrua tuana kha vaw dytha ha ta; Belarus he Russia ta Ukraine a tlahnao theina awpa ta Russia pheisaihzy ama râh siepahlie awpa a pasaihtuhpa a châ. Ukraine heta apakyhna he Warsaw, Bratislava, Budapest, Istanbul nata Baku zy liata tlao hnei awpa ta pahruana a vaw tao tua ha.

5. Ukrainian pheisaihzy chata Abeipanoh khata Russia pheisaihzy nahta khihliah liata athata amâ ka tawhta, khihpi 2-na Kharkiv cha ama kohkina ry liata tlokhuh a y ha, tahpa Kharkiv Governor ta a reih.

6. Ukraine chata Russia kyh he International Court of Justice supipa The Hague lâ ama tlôkhei ha.

7. European Union official zy ta ama reina liata, President Putin cha â chhuahna hawhta Ukraine chô liata â pielyu thei leipa vâta a hiehâh kaw, ama tah. Russia pheisaihzy he Ukraine pheisaihzy heta athata vaw pakhâ ei ta, amâ nua chaipa ama khihpi Kyiv ama pabohsa lymâ chy, tahpa US defence official pakha ta a reih.

8. European Union chata Russia chôta hriena hropa chaluah chhi via heih ei ta, EU râhzy chata ama râh ziza liata Russia zawtheina a zaw awpa ama pakhâpa hleikhôta, hriena thiehpa nano nanopa ama chaluah. EU chata Ukraine cha adyuhna chhaichhi ta baokhâ via lymâ awpa a paryhsa hra.

9. Germany nata ahrialâhpa Notla râhzy chata Russia cha sôh apaphaona peimawh kawpa 'SWIFT global payment system' tawhta thy awpa ta ama paryhsa, tahpa German sawhkhâ biephuahtuhpa ta reih ta, he heta Russia cha khachâ rakhama cha rairuna a tlôkhei thei aw.

10. Russia khihpi Moscow nata khihpi hropa liata Russia ta Ukraine a tlahnaona kholeina palâsana cha paru via lymâ ta. Chyhsa 2,000 hlei patupa ama châ ha. He hleikhôna heta Berlin, Germany liata chhao Abeipanoh khata chyhsa 100,000 ta Ukraine adyuhna kholeina ama palâsa.