Ukraine buana thabypa – US nata a chhihthapa NATO vâta a châ ma?
Russia chata Ukraine chôta adyuhna phuahpa ta, pheisaih thatlôna hmâpa ta a tlahnao ha hra. Hriatuanoh khata, Russian President Vladimir Putin ta Ukraine tawhta alapa-eih khohpa râh bia 2 - Donetsk nata Luhansk –zy cha khotalaipa râhta phuahpa ta, pheisaih a tuah pangiapâ ha hrapa kha a châ.
Atahmâ ta Russia nata Ukraine buana a vaw thaotôna, achhâ chaipa hawhta rei thei awpa cha North Atlantic Treaty Organization (Nato) he a châ. Nato he kô 1949 khata paduapa châ ta. Ukraine heta Nato â pazao awpa khoh ta, châhrasala Russia he he khoh vei.
Russia heta Ukraine ta Nato â pazao khiahta cha, Nato râh pheisaihzy cha Ukraine râhri liata yhmo ama paryh aw tahpa he a chipa cha a châ. Khâpa vâta ma Russia heta Nato he â hao kawpa ma a châ? Duah pahnopasia via achhuah tua rai ei suh u.
Kô 1939 nata 1945 chhôh khata Adyuhpi ei 2-na tlô ta. Adyuhpi ei 2-na khai tawhna khata Soviet Union khata Europe Nochhi lâta a pheisaih a sopazy kha lapakhua khoh khao leipa ta. Kô 1948 liana khata Berlin kha la awpa a chhuahpa ta a chahlô-cha-eih ngâpa kha châ ta. He Soviet Union a pielyuzie heta US cha Soviet Union ta râh a la lymâ awpa Nato hmâpa ta pakhâ awpa ta kô 1949 liata hmah a palasa hapa kha a châ. Kô 1949 liata Nato paduapa a châ nona khata, râh 12-zy cha manôh ta y pâ ha ei ta. US â hlaopa ta, Britain, France, Canada, Italy, the Netherlands, Iceland, Belgium, Luxemburg, Norway, Portugal, nata Denmark zy kha Nato manôh ama châ. Atanoh deikua, Nato heta manôh 30 tlai a hnei ha.
Nato he râh nano nanopazy ta ama râh abohna kyh liata hriaparaoh awpa achhuahna vâta py paduapa châ ta. Nato liata a hlaopa râh kheihawhpa rai tlahnaopa a châ khiahta cha, Nato râh zydua tlahnaopa hawhta pachâpa a châ a châ aw, tahpa kha ama bie a ngiapâpa tlâ a châ.
KHÂPA VÂTA RUSSIA HETA NATO Â HAO?
Adyuhpi ei 2-na khata khizaw he py 2 lâta pachhaih ta. US nata Soviet Union zy kha râh hmotaothei patluapa (Superpowers) ama châ tyh. December 25, 1991 liana khata, Soviet Union a châ tyhpa khata râh thiehpa râh 15 lâta kai ta : Armenia, Azerbaijan, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine nata Uzbekistan râhzy amâ vaw duahpa kha a châ.
Soviet Union a kai tawhta cha, US ngâlâh kha ‘superpower’ râh vaw châ ha bâ ta. US chhihthana ry liata, Nato cha a laiseih lymâ. Soviet Union ry liata a y tyhpa râh a duah thiehpazy chata Nato â pazao lymâ ei ta. Estonia, Latvia nata Lithuania chata Nato cha kô 2004 liata a pazao ei ta. Georgia nata Ukraine-zy chhao kô 2008 liana khata Nato a pazao awpa ta hruapa ama châ tarawpa ta, a vaw pazao thei khao vei ei.
He hawhta Nato laiseih lymâpa he Putin heta khâchâ a dyuh ta. “America cha eima kahmi ta liata missile chhaota a y ha bâ. Canada nata Mexico zy liana heta Missile kei patyuh hra ei sihla America heta khâpa palôh a phaoh vâ?” tahpa ta Putin khata December 2021 khata Nato ta râh a la lymâpa kyh he a vaw reih ha hrapa kha a châ. Ukraine he Nato manôh a vaw châ ha khiahta cha, Russia cha Nato râhzy ta ama chadô khai ha aw, tahna châ aw ta, Putin châta cha cha cha hmo khochhihpa châ tlai vei.
RUSSIA VS NATO
Pheisaih thatlôna a châpa tlyma, râh
abohna châta sôh hmâpa zie a châpa tlyma, Russia nata Nato likah liata
pakhopâna y leipa ta. Nato ta ama palâsana liata cha, Nato manôh zydua râh
30-zy ta kô 2021 liata ama râh abohna châta sôh ama hmâpa (Defence expenditure)
pahlyhpakhypa zie cha $1,174 billion a châ, tah ei ta. Kô 2020 liana khata,
Nato râhzy ta $1,106 billion ama vaw hmâh ha hra. He hawhta a châ nona heta, kô
2020 liana khata Russia heta Defence liata $61.7 a hmâh hra.
Nato pheisaih 40,000 rachhôhzy cha Russia adyuh awpa ta a mâ thlâh ha ei ta. Nato heta adyuhna hmiachhypâ lymâ awpa a vaw byuh hapa chhao ta, pheisaih hmâpâ hapa awpa ta thysy 33 (lakh) khatinorai ta ama hnei hra. He hawhta a châ nona heta Russia heta pheisaih thysy 12 (lakh) a hnei hra.
RUSSIA TA KHÂPA A KHOH?
Russia heta Nato cha Europe Nochhi (East Europe) lâta a kaw laiseih lymâ awpa he chalihsa awpa khoh ta. Putin heta Ukraine cha Nato manôh pachâsa lei awpa ta biesiapa ama hraih awpa a châ tahpa Nato a pahnosa. He hleikhôna heta Nato cha kô 1997 hmialâ ta a y tyhna su liata ypa ta, Russia râhri liata adyuhna chhaichhizy paly ngâkaw lei awpa ta a khoh hra.
KHAZIA UKRAINE TA NATO A PAZAO AWPA A
KHOH?
Kô 1917 hlâ khata cha, Russia nata Ukraine-zy he Russian Empire chhôh liata a ypa châ ei ta. Russian Revolution khai tawhta Russian Empire a vaw kai tawhna khata, Ukraine heta khotalaina phuah ta. Châhrasala kô hluh a khô hlâta Soviet Union â pazao ha heih.
Soviet Union a kai tawhta kô 1991 liata Ukraine heta khotalaina hmô ta. Ukraine râh he râh bia no lai kawpa Nochhi nata Notla (eastern and western) ta a y. Ukraine nochhi lâta a pahrâpazy chata Russia amâ bailyu viapa hawhta â pahno ei ta, notla lâta a ypazy ta European Union amâ bailyu via hra.
Russia a baokhâpa Nochhi lâta sawhkhâ adyuhtuhpazy ta Ukraine nochhi bia lâta râhchhôh bia hluh viapa a vao ei ta. He nochhi bia lâta a ypa, Donetsk nata Luhansk zy cha Russia heta khotalaipa râh hawhta â pyh hrapa a châ. Kô 2014 liana khata, Russia heta Crimea cha a la (annexed) ha.
No comments