Ukraine buana : Russia ta Ukraine a ka pathao; Ukraine ta Russia zawtheina 5 ama kapathlah

Russia President Vladimir Putin-ta Russia pheisaihzy Ukraine ka awpa ta bie a pie tawhta daihti rei leipa liata Ukraine khihpi nano nanopazy cha Russia pheisaihzy ta Missile ta ama ka pathao. Ukraine râhchhôh thâtihbuzy ta ama palâsana liata ama khihpi Kyiv liata Bomb papa pyu thei awpa y hai ta. Kyiv Airport liata chhao meithei papa pyury thei awpa a y lymâ ha hra.

He thâtih pachhuahpanoh hai no taihta Russia nata Ukraine adyuhna duasu tlâhpipa:

Russian defence ministry chata Ukraine Air bases nata air defence-zy cha ama bomb hmâpa ta ama parao ha, tahpa a phuah.

Ukraine chata Russia zawtheina 5 nata helicopter 1 ama kapathlah tahpa a phuah. 

Anton Gerashchenko, Ukrainedeputy interior minister chata Russia ta Ukraine Pheisaih supipa (military headquarters), airport, adyuhna chhaichhi sona (military warehouses) ama khihpi Kyiv, Kharkov nata Dnieper liatahpazy cha missile ta a vaw ka tahpa a reih.

US chata Vladimir Putin ta adyuhna a phuahpa cha maochhiepa ta, khizaw ta Ukraine adyuhna kyh liata Russia cha maophaohtuhpa ta a bai aw, a tah.

UN Secretary-General Antonio Guterres chata Russia President Vladimir Putin cha Ukraine a tlahnaona chalihsa awpa ta ahawpa ta, "zaw a ngiah awpa ta" a tah.

Russia chata khizaw râh hropazy cha Ukraine a tlahnaona liata a vaw chahraoh tlâ lei awpa ta biesakâvaw ta; he hawhta a châ nota, NATO râhzy ta Ukraine bao awpa amâ chhuah hai.