MARA NOVEL : PHURIE, BO 10-na tawhta Bo 13-na taihta

Bo-10-na

Awhkhosâh khô ha ta, khihdei n’awpa deikua a pasih thlâh ha chy. Dôthâ nata Vâchai zy cha ama riebu tawhna chata pyury chado kawpa ta puapa ta, zâhnia lâta a sih yna, Zôrihtlâh thaby lâ cha Meithei a pupa ta ama ngai lymâ haw. Zâhnia zâ lâta Dôthâ mâ sapa rai reih pazao khao heih vei ei. 

Khih a pavâh mâh leipa vâta meireihpeih a taopa ta ama lâthlôh cha pakhaih lymâ ei ta. Ama siena he lâthlôh y tu leipa, pâhdawh pâ thlâh hapa a châpa vâta ama sie dâh chhao amâ chado kaw hra. Buakha chhôh tlai lâthlôh pha tu leipa nata zoh pâ thlâh hapa amâ chhih tawhta, â byna su, Zôrihtlâh thabypa cha za tlô ei ta. Thlai a sih yna cha ama ngaipâ lymâ ha. Sa amâ byhna awpa su cha liahsa pasiapanôpa ta, cha liana chata ama reikah leipa ta amâ tyuh thlâh ha bâ.

Ama yna he a sih tawhta lâ hrawh rachhôhta â hlapa, Zôrihtlâh lâ tawhta alô laipa a zâ hluahpa châ sala a ngiapa liata châ ta. Meithei pachhaina awpa aryh kaw awpa ta alô he phia ta. A yna su he a pahnapâpa vâta pyury pua awpa chhao y tu leipa ta. Chhohnaraohpazy chhao a pahnapâpa vâta tly tlamawpa ta paro muarua hra vei ei. Cha liana chata ama sa a byhpa, Chaoliah cha ama hâ thlâh ha bâ. 

Reikah leipa ta buakha chhôh tlai ama y tawhta, khih chhao vaw pavâh pathao ha ta. Ama yna su rachhôh he thothih phana a châpa vâta deikua a zoh maolao thlâh ha chy. Ama yna tawhta ama hmialâ, a sih yna tawhta a khôlâ a hla tu leipa deikua a siapâ kawpa ta â lâ thei thlâh ha ta.

Dôthâ nata Vâchai zy cha ama reikah leipa ta ama hâpa cha ama mokhâh thlâh ha bâ. Ama hu hmahta a paropa ta so ngâh khao vei ei, tahpâ ngâ awpa la ama châ.

Cha hawhta reikah leipa ta nata pyury chado kawpa ta ama hmialâ ama sai thlâh nona chata, pyury ama thei haw.

Tuhpi thothih râhhmâh phana, nohchhôh sawvaw daihti liata chhaota thothih a hluhpa vâta zoh kaluh thlâh ha tyhpa ry liana chata pyury chado kawpa ta nata a hrohruah kawpa ta ama hmialâ, lâ charu la sari rachhôhta â hlapa liana chata, a thâtih deita ama vaw thei tyhpa, Chaoliah chata a sih cha avaw ngai lymâ haw. Cha Chaoliah a hrohrua theina dâh cha, ei kha hmialâ avaw chakâna châhki ta chichhihpa a y nata y lei mohpa ta a heihâh ha heih tua tyh ta. Liahsa a pasia khai tawhta hmialâ cha keih kha lymâ ta avaw ngai heih tyh.

Chaoliah ama kei hmôpasiapa cha, Dôthâ chata ama rei tyhpa hlâta chhao a lai via syulyu na ta pangiasa haw ta. A ki pha dâh hra cha, thothih ry liata a zoh maolaopa hry liana chhao chata maih padih thlâh ha ta. A ki pawhmao lâ cha a pazao pha ngaita kaw ta; a ki zy cha â tyh pathlah daihmâ ha. A ki chata chyhsa thua mawh sala cha ei kha a thua ta ahy hmahta a boh ei sala pangiasa vei.

Dôthâ chata a Meithei ta liahsa mopa-aipa ta, a Meithei cha-iapheipi cha thlaita patiepalaw thei awpa ta su hro râh hro rai sai khao leipa ta, Chaoliah cha avaw tawpâ thlâh ha bâ. Chaoliah chata a hrohrua kawpa ta a sih cha vaw ngai lymâ ta; a sih avaw tlô chyta liana chata a nahkao ta pyury nahthliepa hawhta kaw pachôhpa ta, a kaw heihâ heih ta. Chichhihpa a hmô leipa cha ma a châ ma, thlalôh hmi kawpa heta a sih cha kei ngaipa ta, a sih liata ti doh awpa chata a zâ khu ta. A sih ti eikha za doh ta, a rao kaw pachhua heihpa ta, ano bytuhpa thyuhro pahleipahlô a chhuahpa ta a nahkao a kaw chalyupa cha, a hmiakô liata Meithei ta vaw tawhpâ thlâh hatuhpa, Khihhrâ khih pasaipha hryta satlia sa ka theipa, Dôthâ Meithei cha a pa haw.

Châhrasala, a khipâdawh lia khiahma a ka a tahpa cha a nahkao ka pahliepa ta, a kâ liata theisâlô chata a kei khaipa he châ ta. Chaoliah hiehâhpa cha khâpa hropa tao khao leipa ta a hmiakô lâ cha vaw chatôhpâ lymâ ha ta. Movi hlâ likah ta Dôthâ zy amâ chhaipa alô hmiakô liana chata avaw duahpa ta, a hiehâhpa hnapasu tôpa pyu cha a rarô y ngaita kaw.

Vâchai cha riahchhie viapa hnaihta a Meithei ta vaw mopa-ai taraw hrasala, ka awpa ta a riahphana ta âh pha khao vei. 

Chaoliah hra cha alô ta a pakhâ hapa Dôthâ nata Vâchai yna cha vaw tlô pathlah thei leipa ta ama hmiakô liana chata a phei thuathâ, a hnapasu tô tahpa ta a hiehâhna cha a palâsa ngâkaw bâ. 

Dôthâ chata thlai Vâchai Meithei cha kei pazapa ta, Vâchai chhao chata vaw pie para ta. Chaoliah cha ama hmiakô ta liata â duah thlâh ha bâpa vâna chata Meithei chata a saopâ tah thei awpa ta, Dôthâ chata a Meithei chata a khipâdawh cha a nuapa ta Meithei cha kaw hmie papa heih ta. Theisâlô sah mualuapa, Meithei tlai tawhta tharôh zydua ta a kaw zaw papuapa cha, Chaoliah hryta lai chaipa chhao chata tao khao vei.

Meithei pyu chata cha su nata a chheipâh cha a charao pahnie kaw. Chaolia cha a khipâdawh ru keipa pyu hryta a lathli a kaw chaphiepa pyu cha â thei thei daihmâ tah awpa he a châ. Â duana su liana chata a hluahpâ ha ta, a phei chhao chatlai muarua khao vei, a pôhpa cha hrona hnei leipa tahpa â hno kawpa ta â thy thlâh haw. 

Dôthâ chata thapawh kawpa ta alô cha kaw kiah parapa ta, alô chô tawhna chata chaoliah cha za mohpa ta, a mo rai pathla thei khao vei. Vâchai chhao cha thapawhna nata thlahzohna a pahlaopa huhiah chhaota alô chô liata kaw kiah parapa ta, ama hmiakô liata chaoliah tôhpa, chyhsa reipa deita avaw thei tyhpa, a viasapa, a unawhpa ta a kapa a hluah thlâh hapa cha, zoleina nata alyna â pahlaopa ta a tawpâ thlâh ha hra.

Meithei pyu ama theipa vâta riebu lâta mohropa zy chhao cha pakha pakha ta vaw tlô lymâ ei ta. Chaoliah tôhpa a thy thlâh hapa ama vaw hmôpa cha, ama mo ama pakawh khai thlâh ha.

A hnôh chaipa liata Biekhâ nata Zaka chhao cha vaw tlô hra ei ta. Chaoliah tôhpa a thy thlâh hapa ama vaw hmôpa cha pua amâ pahlaw daihmâ.

Biekhâ chata, “Ahy kapa maw?” thlai tahpâ lymâ ta. Vâchai chata, “Unawh Dôthâ ta a kapa a châ hih. A lai tlai my!” thlai vaw tah ta. 

Mohropazy chata chaoliah tôhpa ki, maih padih khai hapa, â tyh daihmâ hapa cha vaw thliethlâ ei ta; a rônah ama tahpa hmi cha mo a pha ngaita kaw. 

Biekhâ chata Dôthâ cha kyhtotie liata â tlu ngâsâ vei, tahpa a mokhaoh tlaita hmôpasia ha ta, a kâ a chhiepâ hapa na, a nozapâ hapa na, thlai chaolie a hua kawpa ta, “Dôthâ tlai hena eima khih pasaipha dopa vaw châ hih. He Chaoliah he khahlâ tawhta pasaipha kei âvaw tahpazy chhaota ka achhuahpa ta ama vaw chadi tyhpa, ama ka thei leipa a châ. Dôthâ he kei hlâta hawti viapa hmahta châ hrasala, ei vaw tlu leipana a châ. A chôta palôhchhiepa ei vaw phaoh tyhpa zydua chhao nâ ngiathai sala ei khoh” tahpa ta Dôthâ cha za hmi kawpa ta kei moh ta.

Dôthâ chata thlai vaw chyh-eihpa ta, “Eeee..A uh Biekhâ, keima he na vaw sâlâpâ ha tyhna. Atahmâ tawhta la Khihhrâ khih châta a duahpa sai châ pi ta. Adyhryh kawpa ta, chhie khiah chhie khoh, pha khiah pha khoh, tahpa ta lôraoh kawpa ta nata Khihhrâ khih châta pheiliah hai khohpa ta, daihti hmâh bâ suh vy” tahpa ta Biekhâ ta cha hawhta reikah a pathliepa âlyzie cha a hmiaphaozie liata kaw palâsa ha hra ta.

Cha chaoliah chata ano vâta Khihhrâ khih satlia a iehkhyh chaipazy hry liata aryhna avaw tlôkhei, tahpa rai pahno leipa ta, hrona hnei leipa ta â thy molo thlâh haw.

Dôthâ biereina dâh pitloh kawpa vâta nata, Biekhâ hrozie eikhapi ta avaw thlapa chata Khihhrâ khih satlia hropazy cha thaphana nata alyna a pie hapa ma a châ ma, thapha kawpa ta nata pahneisilihna chôta Chaoliah cha buakheipâ lymâ ha ei ta.

Chaoliah sa zy pachhaihpa ta riebu lâ ama ngaikhei khai tawhna chata, riebu liana chata thokha ta Chaoliah sa cha pachawh awpa ta vaw buakhei lymâ ei ta. Thokha heih hra ta a ki sai vaw buakhei heih hra ei ta. Biekhâ chhao cha, Dôthâ â iekhyhna zydua a ngiapachhina palôhta a panano hapa vâta â huatlâ hmi kawpa ta Chaoliah sa pachawh awpa buakheituh chaipa tlao châ ha hra ta.

            Cha hawhta Chaoliah sa pachawh awpa buakheipa ta chao chhao patyuh hmâ leipa ta ama bua sai kaw nona chata, lâpaw tawhta pawtlohpa ao ta avaw awsao ngâpa pyu chata cha su nata a chheihpâh cha vaw charao ta, pawtlohpa thlahzoh ao tlaina a châ. Ama hmo buakhei ngâpa cha a chalihsai khaipa ta, ao vaw puana lâ cha ama mokhâh khai thlâh ha bâ. Chyh-eihna châh a pahnopa chhao y vei ei.

            Cha hawhta pawtlohpa ao ta eino avaw awsao tawhna ei chata, Dôthâ chata thlai kaw chyh-eihpa ta, “He lia eima y hih. Ahy rimâ maw na châ? Avy ly..he lia lôkhaoh lia hih” tahpa ta ao cha a kei chhypalie ta.

            Lôkhaoh laikachha lâ tawhna chata sipo chatôhpa pyu vaw paro lymâpa ta, thokha cha ama Meithei amâ vaw la hmâ ha.

          Sipo hry tawhna chata eikhapi ta Khihhrâ khih tlâh-awhpa, Puhpa Ngôkhu tlai cha avaw luah thlâh ha ta. A hmiphaozie tawhna chata, hmo rarô y kawpa â tyh tahpa hmôchhei thaipa châ leipa ta. A huhiahna dâh tawhta nata a mathlai tawhna chata a para parô kawpa ta nata a pahâ tlâ leipa ta khih tawhta âvaw râ lymâ, tahpa pahno theipâ ha ei ta. 

Thlai Dôthâ chata thachhâpa ta â viavô ngâpa cha kei patu parapa ta, liahsa patyusapa ta ti zy a padosa khai tawhta, “Ei pâ Ngôkhu, khâpa rimâ maw châ haw? Cha tiapârâh liata nâma pi nâma vaw luah thlâh hapa cha?” tahpa ta hiahrih ta. 

            Puhpa Ngôkhu chata a ti dopa, a hmaokiah liata loh ngâpa liahsa a za hru tawhta nata, khohleikhoh kawpa ta ziza a kaw sy tawhta, “Satlia saih, Khihhrâ khih pasaipha sai u, Khih nama puasai tawhta a mylâpa khata Sâ-ia chariah ta eima khih vaw siehnao ei ta..” a kaw tahpa cha, Khihhrâ khih satliazy chata, “Kheita â!?” tahpa ta ama Meithei nata chaihrai amâ lapâ lymâ haw.

            Puhpa Ngôkhu chata, “Khihsaw hluhpi thie ei ta, khihsaw vâro tlai patu ei ta. Nâmo eimâ bohna chaipa nama y lei nota bao hnaihta, avaw dyuh palie awpa chhao y ma pi. O zy rao ei ta, eima sahroh awh zy chhao ama thie hôlô…” tahpa ta a rei khai hlâna chata, Dôthâ nata mohropazy cha thlai meithei a lapa ta nata ama sahria liata tâkô thlai pasâpa ta ama yna su cha ama vaw puasaipâ hmâ ha.

 

 

 Bo-11-na 

            Riebu tawhta a chatlie thei chaina hawhta khih lâ ngaipa ta ahy hropa hâ khao hlei leipa ta hmia lâta â râpâ lymâ hapa vâta Dôthâ cha a viasazy hlâta tlô pasih via ha bâ ta. Thothih râhhmâhpa ry liata nata lâthlôh pâdawh kawpa nata lôkâ-kavo kawpa hry liata â râ ngâ nonazy chata, a pachâna liata Ngôki nata a pawpaw Mawkhu nata a nônô lai chai leithei vei ei. Ama thi ma ama hroh vâ tlyma i? Ngôki cha ama patu ma ama thiepa hry liata â hlao ha hr’aw vâ tly?tahpa cha khih lâ ngaipa ta â râ nona chata a palôh liata lai chai ta. Thlahzohna nata hiehâhna cha a palôh liata a lai chaipa châ leithei vei.

Khih ama vaw puasai awpa zâ ta a mâ sapazy cha za pachâ pakhuapa ta, he hmo vaw tlô awpa he a mâ lâta avaw hmô chhieliepa khiahma a châ rai tly?tahpazy, a mâ lâ hawhta a châ khiahta cha Ngôki cha a tlâhbohpa ta a hmô khao vâ?tahpazy cha a pachâna liata a zâ ngia chhiechhu ta, a palôhrupa cha â tymâ ngaita kaw. Zôrihtlâh tawhta ama khih hra cha a paraparô kawpa ta, â pahâ tlâ leipa ta siepa ta nohkha sie châ ta. Dôthâ chhao cha ti doh awpa ta vahtiepa liatazy buakha â pahâ tah leipa ta cha a duah leipa ta â râ ta â râ lymâ eima tah thei aw. 

            Lôkâh kiah byuhpa nata saimakaopa sao byuhpazy a ypa vâta a lâsie cha â parapa hawhta chatlie thei leipa ta. Chakhâ nata chhutla kiahpa ta chô awpa hluh ta, chavah-chahao chaka awpa chhao a hluh ngaita kaw. 

            Noh chhao liahsa âvaw sâh ha ta. Hmypi thla chhâna lâ noh cha a sah pha kaw. Anodeikua thothih râhhmâhpa ry liata a sie laihpa a châpa vâta nohsah cha tao muarua leipa ta; chakhâ kiah awpa nata lâthlôh ytu leina liata sie laih awpa ângiahna suzy a ypa vâta a lâsie chatlie thei vei. 

            Châhrasala, a hmia lâta paraituhpa, a palôh zydua sydietuhpa, Ngôki thlahzohna hmi nata, a nônô nata paw hleikhôta, a laiseihna khih, Khihhrâ khihsawzy thlahzoh awpazie cha za rohpady ta, a châhta cha, ano cha ama vaw mokhâh thlâh ha awpa hawhta a zâ pachâ ta, cha chata a rietheina nata thachhâna cha za phopa ta, thatlôna thiehpa za hnei heih tyhpa ta, hmialâ cha pangai hnolo lymâ tyh ta. Zâlâ noh liahsa a nai tawhna chata ama khih ta lyu ama tlana su cha a kei hmô thei ha bâ. 

            Ama khih lyutlana tawhna heta cha ama khih he a hla muarua khao leipa ta, dawh 2 rachhôh sie deita a châ ha bâ. 

            Buakha chhôh a kaw sie hnolo heih tawhta, ama khih lyutlana, lyuva chiehpa a phaw chheih thlâh hapa cha kaw pua pahlie ta. Lyu ama rao mâh leipa vâta a kâ lâ tawhta chahlô lai lymâpa ta, ama khih lâthlôh cha a kaw puapahlie haw.

Hnôhlâta avaw sie ngâpa a viasanah cha a hâ tua ma? Cha leipa ta anodeita khihchhôh cha a zâ ngia ma?tahpa cha pachâ liahsa ha heih tua ta. Anodeikua, a viasanah a hâ khiahta cha tlô lei awpa hmo hropa zy hmahta vaw tlô hmâ ha lia, tahpa ta khih ngaipa chata a râ lymâ ha heih ta.

            Zâlâ noh tla awpa chhao liahsa notla tlâhthlôh liata â lyh pathao ha ta. Khihhrâ khih chôta hmo a tlôpa taokheipa hawhta zohna châta su tlei awpa cha a ngiaroh hmi kaw.

            Noh tla chyta liana chata Dôthâ chata ama khih hawka cha avaw tlô ha hra. Hawka tawhna chata ama khih cha thlai za sai ta. O kâpa tawhta meikhuh chô lâta a khy ngâpazy, nôsaw cha ngâpa pyu nata, chaphôhtuna pyuzy cha a sia tu leipa ta za thei thei ta. Thlai hawka tawhna chata a zâ râpâ lymâ heih ta. Buakha chhôhta khihchhôh cha a zâ ngiapa ta, ama O yna ngai tua chai ta.

            Khihliah lianazy chata vao nata awh thi chiehpa, Meithei ta ama kapa a hluah hôlô ta. O kâ ngâpa khuh chô lâta a vih ngâpazy, khihchhôh via lâta chapa pyu nata awhsâhpa pyu hryta hawti nô vâpa ta a awsao ngâpa pyuzy cha thei lei a pachâ thaipa châ vei.

         Ama O he hawka daih lâta a ypa, khih a ngiana thaby ta liata a ypa a châpa vâta amâ boh na ta, pangiasa leipa ta. Châhrasala, ama O a kei tlôpa cha, kheita hmah vaw y hraoh leipa ta. O chhôh lâ thlai a zâ ngia ta, a hmo hmôpa chata pahlaw leithei vei!

A pawpaw Mawkhu, ano bâbao hmahta akhaihly leipa a châpa cha thihnia chhaota a nônô byh chô liata avaw ziapa ta, âvaw rôh ngâkaw.

“Ei nâ, ei pâ! Khazia rimâ maw? Khâpa hmo tlô?” tahpa ta a zâ ngiapâ lymâ ta. A Meithei nata a sahria cha a kiah liata sohpa ta a pawpaw cha thlai a zâ khuhnao ta. A luh liata thothu ta ama vaw phypa he châ ta. A luh tawhta thi puapa a chhâ thai leipa vâta a nônô ta poh heta vaw nâpâ ngâkaw ta.

Dôthâ hmi ama vaw hmô patawnah chata, a nônô chata, “Pâpâ, Dôthâ, miah vaw pachâ khâ! Ngôki amâ chhi syulyu ha..thlai a chadaipâ lymâ tyh” tahpa ta tlao Ngôki pachâ via awpa ta vaw tah ta. Dôthâ chata a pawpaw cha za mohpasia ta, a theihlô vei, tahpa a pahnopa vâta, “Ei nâ, ei pâ hih a duasu pha vei hih…kha he..” a kei tah heihpa cha, a nônô, “Dôthâ, kei ei y thlâh hih..Ngôki deikua râhhmâhpa liata chariahzy ku liata chipa nata thlahzohpa ta nâma a hnabeiseihpa ta a y ngâkaw hih…pua la, a kei chadai para tyh..na pha hmâ thlâh ha aw. Lôhpi chavah lâ khana ama zu khaw. Sanai chariah châ ei ta, bie hluh cha chho awpa ta daihti y khao vei hih. Nohchhôh lichih khata na khih ama puasai khaw…” vaw tah lymâ heih ta.

A nônô hmi liana chata hmeiseihna nata, âmo hlâta Ngôki pachâ via chy awpa ta âhnawna hmi cha za hmô pasia kaw ta. A sahria nata Meithei cha la parapa ta, ama O tawhna chata pua para ha heih ta. 

Khihchhôh via lâ cha mo khoh rai avaw chhih vei. O to rô tah thei awpa cha vaw kâ khairô ha ta. Abei O yna tlâh lâ chhao cha a boh muarua hra vei. Khihliah liana chata Vao, awh nata I thi chiehpa a thy hôlô ta. 

Châhkeih liata pawtlohpa ri a zia thlâh hapazy, chhôhkha y leipa ta khihliah liata ri a zia thlâh hapa cha mo a ru hmeiseih. Chariah nôchhie kawpa Khihhrâ ta â tyh pasu tah leitheipa châ vei.                                   

            Dôthâ chata hnôhlâ ta vaw tlô awpa satlia hropazy ama ypa vâta khihchhôh liata vâsâhna pyu nata mâchhiesana pyu rarô ypa cha hnôhchhyhpa ta anodeita Ngôki pachha awpa chata khih puasaipa ta Lôhpi chavah lâthlôh lâ cha a chhihpâ lymâ ha ta.

Dôthâ ta khih puasaipa ta Lôhpi chavah lâthlôh a ngai tawhta buakha chhao a pha hlâta satlia hropazy chhaota khihchhôh avaw ngia ha hra ei ta.

Ama y lei chhôhta ama khih vaw chho ta, ama khota avaw pielyu ta, vaw hraotuhpazy cha ahy hropa châ leipa ei ta; kha hlâ tawhta ama khih liata chhie vaw khei tyhpa, Khihhrâ khih tawhta notla lâ daih, hâta eikha siepa liata a pahrâpa, Sa-ia chariah ama châ, tahpa ama pahnopâ ha hra.

Atahmâ ta he hawhta ama satlianah râh amâ khie chhôhta ama vaw chho heihpa chhao he, Khihhrâ bei Thalai paw ta chhie âvaw bâhpa, abei Thalai ta, “Khotalaipa, ahy ry liana hmahta a bôh beih leipa eima châ hih. Ei pâ ta chhie âvaw bâhpa cha keima ta ei bâhpa châ vei. Nâmo lâta chhie pie awpa ta keima nata ei khihsawzy heta leibâh hnei vei ei,” tahpa ta chhie khei awpa avaw chhuahpa, Sanai bei nata a pasaihphazy âvaw chhypaliepa vâta he hawhta hmo a tlô hapa he châ ta.

Khih liata a ypa chapaw thokha ta avaw dyuh palie taraw hra ei sala, amâ pachyhparyh lei no, chariah lai awpa ta ama pachâ leina daihti nata, ama khih liata ziza a pha chaina daihti a châpa vâta ama chôta hmo vaw tlôpa cha â pahlaw ta tlao amâ pahlaw.

Chariahzy heta chyhsa 40 hlei thie ei ta. Âbohpazy nata hawti nata chanô thokha hleikhôta chapaw thokhazy cha râhhmâh lâ amâ bohna tluapa ta â râ hmâ ei ta. Â râ hmâ leipazy deikua chariah ku liata ama thi hôlô. Ama bei Thalai chhao he chariah ku taopa ta, a hu chhâ awpa hâpa ta abei O liata abei machâ thokha ta ama ypâ thlâh hapa avaw châ. Abeinô deikua chariahzy heta a chhi ha ei ta; ano raohpa ta Khihhrâ khih laihsa 10 amâ vaw chhipâpa he a châ. He hry liana heta Ngôki chhao â hlao hrapa he vaw châ ta.  

Râh akhiena lâ tawhta avaw tlôpa satlia thokhazy cha khih liata vaw y awpa ta tahpa châ ei ta, thokha ta Dôthâ ngaina lâ ngaipa ta, chariah ku tawhta ama beinô nata ama laihsanah pachha hmâ cheingei awpa ta Meithei nata chhaichhi ama hneipa maih a chabapa ta Lôhpi chavah lâ cha ama ngai ha hra.

Khihhrâ khih, ama kô pha chai kô awpa hawhta amâ pachâ nota, pangiasaleipa lâ tawhta chariah ta ama vaw tlahnao thlâh hapa cha, tao pasa kaw sai ei ta. Cha-ypi noh vaw tlô awpa châta amâ chhuahnohna chhao cha, mâchhiesana lâta âvaw lie haw. Kô hluhpi chhôh chariah tawhta âbohpa ta, thapha ly kawpa ta nata lôhhrâtlô kawpa ta ama laizaolaona khih cha, mâchhiesana ao ta bie ta; khi rypa, hnôhchhyh hapa hawhta moh khoh a chhih vei. Hiahvâ lôhpatlâhpa hawhta â pahnopa ta, a khihsawzy thlahpalôhtuh chaipa, ama bei Thalai chhao hmahpi phaohpa ta, abei-O liata paziapa châ hai ta. Ama bei chhâ he cha a boh sala cha, khihsawzy mâchhiesana chhao a zie-y via awpa tlai!

Dôthâ cha lôpi chavah lâthlôh a chhihpa ta asohsi kawpa ta nata pyury chado kawpa ta sie lymâ ta. A châhta lâthlôh a chhih leipa ta thothih hryta â sohsi thei chaina hawhta siepa ta, chariah â chadai haipazy chata lâthlôh liata hmahta â vaw chadaituhpazy avaw byh awpa ta chyhsa âvaw rao ha ei la, tahpa cha a pachâna liata za y leithei vei!

A pachâna chhôhmaruh chaipa liata deikua Ngôki lai chai leithei leipa ta. Chariah satliazy ta ama khota a daophipa ta, ama taola awpa cha a pachâna liana hmahta a pachâ ngâh leipa, a za pachâpady châhta hiehâhna nata ruchhôna ta a za bie tyhpa a châ.

Noh tla ha ta, zâ daihti ta cha su nata a chheihpâh cha khu ha ta. Vâ a pathai kawpa vâta siena vawna awpa â lâ pha kaw. 

Buakha chhôh tlai a sohsi kawpa ta nata pyury chado kawpa ta a hmialâ a chatôh lymâ tawhta, lôhpi chavah loh ngâpa haosâ lâta chyhsa bierei ngâpa pyu hryta chanô ao, china nata thlahzohna a pahlaopa ta kaw awhsâh ngâpa pyu cha a thei haw. Buakha a duahpa ta lôhpi chavah haosâ lâ cha kei sai ta; lâpaw thothih hryta meireihpei ia ngâpa nata, chapaw pitlohpa ao chahrâh kawpa nata, chanô ao, china nata thlahzohna tawhta kaw puapa châ sala a ngiapa kaw paro tyhpa cha kei thei thei ta. Ama yna nata a yna likah cha chavah loh ngâpa deita chata pachhaih bâ ta, â hla khao vei.

Anodeita ma a kei pangai ma, cha leipa ta a viasanah cha ma a hâ chy ma, tahpa chata a palôh pabua kaw ta. Ngôki â chhi ta, ama khih tlahnaotuhpa chariahzy cha machhyu-mahrâpa, riahpha kawpa sahlao châ hra aw ei ta, cha hawhta anodeita â kei luah thlâh ha khiahta cha hmopha chaipa châ thlyu vei, tahpa cha a pachâna liata za y tua ta; châhrasala, a viasanah a hâ chhôhta â chadaipazy chata ano cha amâ hla via lymâ aw, tahpa nata, a kyhpachâ chaipa Ngôki cha, chipa nata thlahzohpa ta, ano pachhatuh awpa a hnabeiseihpa ta mohmia pasaih ngâkaw aw ta, hnôhlâ khâ â vaw heih heih tyh aw, tahpa cha a pachâna liata za lai leithei vei. Liahsa â pachâpasia ta, lâpaw lâ a kei sai tawhna chata, “Umm..Khihrâ khih satlia riahphapa châ vana mâ…ei kyhpachâ chaipa chanô chariah ku liata a y haipa, thlahzohna nata china ta a cha-ao ngâhaipa cha keima deita chhao rai tlai ei kei pachhapapua aw…” tahpa bietluna tao haw ta.

Lôpi chavah loh ngâpa, zâ pathai kawpa ry liata paro khôlô ngâpa cha chakapa ta, asohsi kawpa ta nata ahrohrua kawpa ta chavah haosâ lâ cha ngai lymâ ha ta.

A pachâna cha thlahzohna nata chihuna ta bi eta; châhrasala riahchhiena vâta la châ bohbi vei..A kyhpachâpa nata, â khy chaipa, a châna dopa nata tlohleina zydua pahnopa ta, a chhie chaina daihti liana chhaota khâ a châhkhei ta, a kiah liata khâ a duah thlâh ha tyhpa, a khizaw nata a hnabeiseihna, Ngôki, chariah ku liata y ta, a thlahzohna zie awpa nata ano avaw vâ awpazie chata a pachâna bie ta, hiehâhna hryta hmialâ ta chariah ku liata a lei ryusôhpa a ypa pachhapapuapa awpa ta, thina dâhdei chhao ta hmahta pakhâ thei sala a ngia khao vei.

Khihrâ khih vaw chhotuhpa, Sâh-ia chariah, pasaihpha sahlaozy chhao chata, ama hnôhlâ tawhta avaw chadaipazituh awpa ama y aw, tahpa cha khâ pahno thlâh ha hra aw ei ta; châvana chata hawhsâh thei rimâ awpa châ vei ei, tahpa chhao ama pahno hra aw. Ama patupa sahlaozy chhao cha chado-chadao leipa ta, sahroh laihta ama laih lai aw, tahpa cha a sia thlâh ha hra. Chavâna tlai chata, Dôthâ châta, daihti nata ti lohpa hlâta chhao hmahta a para via awpa â ngiah tlai aw..

Lôhpi chavah nata a chheihpâh, tuhpi thothih râhhmâh pha kawpa ry liata, zohna ta ryu a reina hryta, lôvâpa nata pavaw nata râhsa, a zo lâta a chiavo tyhpazy chata, ama pahrâna su a ngiahnaopa ta, a kyhpachâ chaipa pachha papua awpa ta matla kawpa ta lâsie a paryh haipa satlia palôh phaozie cha pahnothaikhei ei sala a ngia leipa ta; cha su vaw siepakhô ta, chariahzy ta sahroh laih ta ama laihpa, Khihrâ nô nata laihsazy vâsâhna nata thlahzohna hmi nata ao amâ tyhpazy chhao cha a thei ngâthlâh ha ei sala a ngia khao vei ei…taotuhpa ta ama ydâh awpa hawhta a paryhpa sikhua ta hawhta khâpa hropa rai uasa leipa ta leilô amâ ly hai..

Dôthâ cha a parapâ thlâh ha tlô, ahrohruapâ thlâh ha tlô, tahpa ta laikachha nata laikathi nahpachôhpa ta asohsi kawpa ta hmialâ pangai lymâ ta. A hmiakô liata chariahzy ta ama siesaipa, meipaoh nata, buakha amâ pahâna châ sala a ngiapa hniehnôh zy cha hmô lai lymâ ta. A hmiata liata meipaoh cha liahsa a zâ tyuhpa ta a ku chata za vei ta, bâhta a lalôh thlâh ha chypa vâna chata chariah a hla khao vei ei, tahpa cha a pachâpadyna liata a kaw pahnothaipâ ha.

Hmialâ cha pangai lymâ heihpa ta, thothih pha kawna ry a châpa vâta chô lâta thlâpâ khaihpa chhao chata â chhih haipa lâthlôh cha pakhai pha muarua khao vei. Châhrasala, a hawti no tawhta â chhih zôzawpa lâthlôh cha, khaihna a ngiah muarua leipa ta a chatôh thei lymâ thlâh ha.

Buakha chhôh tlai, a lâchakâ a parapâ thlâh hapa ta a sie hnolo tawhna chata, a hmialâ â hla tu muarua khao leipa liata pyury cha a thei haw! Châhrasala râhhmâhpa cha bao hnaihta, chyhsapa pyury a châ nata châ lei deikua pahnopasia thei vei..keihkha keihno a chatliepâpa ta hmialâ kei ngai via heih ta, chapaw ao hryta chanô a sihna-I ngâpa nata thlahzoh kawpa ta a rôh ngâpa pyu cha a thei haw! A hrohrua via heih ta…a chheihpâh cha mohpasia via heihpa ta, pyury hropa nahthliepa ta aheihâh heih tua ta..âmo avaw chadaituhpazy avaw byh awpa amâ soh leipa ma a châ ha ma, pyury hropa tlyma thei awpa y khao vei.. 

A hnôh lâta loh ngâpa Lôhpi chavah pyury cha dia via lymâ ta; a hmialâ ta chariahzy pyury nata amâ chhipa Khihhrâ nônah nata laihsazy pyury cha âvaw hnia via lymâ ha bâ..A hmiakô liata hnabeiseihna cha, thina ku chakuapa chhao a châ thei..ahy pahno aw?

Cha hawhta pyury chado kawpa ta nata ahrohrua kawpa ta hmialâ a ngai ngâhai no chata, a mâ cha eikhapi ta a kaw thei papua ta, châhrasala, “Mâ chakhyhpa zy tlai cha..” tahpa ta hmohropa pachâ awpa a chhuahpa ta a hmialâ cha khâchâ moh ta; châhrasala âvaw luah ha heih tyh.. 

Cha hawhta a paraparô kawpa ta nata, pyury a chado kawpa ta a sie hnolopa cha, buakha chhôhta a hmia liata a siepa chariah sahlaozy nata ama patupa, Khihhrâ chanô sahlaozy cha a kei pha daihmâ liahsa ha bâ. Ama likah cha lâh hrawh rachhôh deita châ ha bâ ta. Chariahzy cha ama patupazy vâna chata sie chatlie thei hra leipa ei ta; tararuahpa ta chariah sahlaozy chata sahroh laih ta laih taraw hra ei sala, sie chatlie a ru ngaita kaw. Chanô sahlao ama châpa hleikhôta, ramawh tlai liata ama ku chahrypa ta hmaohkha ta ama pasiesa vâ hleikhôta, a zo thâ a châpa vâta nata, tuhpi thothih hry a châpa vâta sie chatlie thei vei ei. 

“Ei nâ! Ei pâ! Na vaw pachha tua u” tahpa pyury zy; “Chhualai paw, nâma chhâ cha vaw y la, hetana heta ei y lei awpa tlai” tahpa ta nôtlohpa a rôh ngâpa pyu hryta, Dôthâ nah charao kaw awpa ta, “â uh Dôthâ..eina vaw tlua laih lymâ bao chi ma? Khataih su cha na vaw tlô ha tly? Na thângiahna a pasa bao chy…Ei nâ! Ei pâ! Kheita cha ma nama y ha tly?” tahpa ta Ngôki a rôh ngâpa pyu nata, a kaw sihna-I ngâpa ao nata reih chata Dôthâ chhôhso a chakhei ngaita kaw..eikhapi ta a hmiakô liata chariah sahlaozy cha kei puathlu ta, a hrona chhao pachâ khao leipa ta tlahnaopâ lymâ awpa cha a khoh thlâh ha bâ! Châhrasala, cha cha ano châta nata Ngôki châta hmo pha chaipa châ vei, tahpa ahy a saohiah a ngiah leipa ta a pahno thlâh ha hra.

Atahmâ cha liahsa amâ hnia ha bâ. Ama likah cha thokô sâkha sâno deita ta pakhâ bâ ta; Dôthâ chhao chata â chhihpa lâthlôh cha tleisaipa ta, laikachha lâ tawhna chata a chadi pathao ha bâ. Vâhnei â chhih kawpa ta eima tah ma, chariah sahlaozy chata su a bypâ thlâh hapa liana heta a pahâ awpa ta a chhuahnoh ei ta, ama hryta thokha ta ama patupa sahlaozy buakhei ei ta; thokha ta ama vaw siena lâ a heihpa ta riah ama vaih hra. Âmo chhao amâ hrohrua ngaita kaw, tahpa cha amâ pielyuzie tawhna chata a sia thlâh ha.

Dôthâ chata laikachha lâ tawhna chata chariah sahlaozy cha za moh ta, syno rachhôh ama châpa ta a pahno. Meithei, seichhi, vaihna hleikhôta thokha ta libaw zy chhao ama hnei tahpa a za hmô thei ha hra. Athata a yna su liana chata a pachâpasia ta, ano mopakha deita pahnie thei muarua awpa châ vei ei, tahpa cha a sia thlâh hapa a châ. Pyury chado kawpa ta a Meithei cha za mohpasia ta, Meithei zaih nata theisâlô mohpasia ta, a Meithei cha-iapheipi mohpasia ta, â su khai thlâh ha, tahpa liahsa a pasiapanô tawhna chata â nyuna kiah liata alô lai tu leipa chô liana chata a Meithei cha kaw khaihpa ta, laikathi lâta chariah satlia hryta ama hyutuh via chaipa châ sala a pangiasapa cha a mopâ thlâh ha bâ.

A pachâna liata hmo hluhpi a vaw ngia ta. A Meithei cha a hmiepapa khiahta cha âvaw lie heih awpa cha anodeita cha avaw dyuh a ru kaw aw. A Meithei eikha a papa chata chariah Meithei sâhrawh hlei ta ama vaw chyh-eih aw, tahpa cha a pahno thlâh ha hra..a palôh cha bua kaw ta; cha nona chata, Ngôki ao nata reih a za thei ha heih..

“Hy Dôthâ! Na châta khâ ei y ngâthlâh ha la y..na vaw tlua la, na vaw pachhapapua cheingei ma y…Ei nâ..ei pâ..nama hnazô ei vâ rimâ bao chy..chariah nôchhiepazy ku liata nama nawhly raithlih chhao ei y hai hih” tahpa ta a kaw sihna-ipa ta, â kaw rôh ngâpa chata Dôthâ chhôhso chakhei ta, mohmia thlai za pasaih ta, Ngôki, thachhâ kawpa ta nata a sâ, seih pha kawpa nata mih kawpa, chariah ta a sâ tawhta amâ daophina vâta chhiehru khai hapa ry liata, mothlih ta a chapaipa hmi chata Dôthâ palôh a pakeichhei haw!

"Ngôki..He liata Dôthâ, na châta a hrona chhao I leipa, Khihhrâ khih châta thina ku paza awpa chhao chi leipa, Mara satlia, chariah-chakeih hmiakô liata dua leipa ei y hih..Kha he! Sâ-ia chariah chhiepa, riahchhiepa, Zôritlâh chaoliah ei chadai chhôhta ei khihbôhpi vaw chho ta, ei kyhpachâpa Ngôki avaw chhi tuhpazy cha…thi chi leipa Dôthâ Meithei nata vaihna ama tao thei tlai ma…Ngôki..vaw chi kha y..” tahpa ta a Meithei cha a za hmie papapâ haw! 

A theisâlô chata a mopa-ai ngâpa chariah hryta ama hyutuhpa châ sala a pangiasapa rao cha chaviepa ta, a luh cha dyuhtuhpa hnei leipa ta hawhta â zâ thliahpa ta, a pôhpa tawhta a hrona a puapâ ha, tahpa â hno kawpa ta theisâlô tha chata lâ kha rachhôh kei pazaw ta, a phei chatlaipa ta, cha-â leipa ta a thipâ ha. 

Meithei pyu nata Dôthâ chyhu sapa pyu vâta chariah zy chata thlai laikachha lâ cha kaw ka lymâ ei ta; china nata thlahzohna ao chhaota Khihrâ chanônah awhsâhpa pyu hryta chariah sahlao chyhu sapa ta, laikachha lâ Meithei ama kapa pyu chata cha su nata a chheipâ cha tôkalô a thuapa lochono he lyu ta, zaih roh nata Meithei khu ta a bie thlâh ha bâ..

 

 Bo 12-na

Chariahzy chata âmo vaw tlahnaotuhpa cha pakha ma a châ ma, ama hluh ma tahpa ama pahno leipa vâta Dôthâ yna cha eikhapi ta kaw tlahnao ngâh hra leipa ei ta; amâ pielyuzie tawhna chata theisâlô nata zaih hnei hluh khao vei ei, tahpa â hno thlâh ha. Dôthâ chata liahsa â nyuna lô achhaipa ta, a Meithei liana chata theisâlô nata zaih za ryh para ta, chariah sahlaozy amâ paryhpari chhôhna chata, a yna su kaw ngaipa ta a kaw ly ngâpa chariah pakha cha, a luh liata a za ka ha heih. Theisâlô thua châpa ta a luh ru a za pakeipa pyu cha â thei pha kaw.. 

Cha raohpa ta, laikathi lâ tawhta Meithei â pazipa ta kaw pa lymâ heih ta; Dôthâ yna su rachhôh cha theisâlô a kaw zawpa chata a kaw chathôh pha kaw..châhrasala, chariahzy chata a yna siapa ama pahno thei leipa vâta, a pai ta hmahta khai vei ei..

Dôthâ chata a zaih-ôh cha za la para heih ta, a Meithei liata za ryh awpa â chhuahpa cha a vaw chhâ haw! Hmo pachâ hluh n’awpa daihti châ vei, tahpa a pahno thlâh hapa vâta, a sahria liata Vaihna a pasâpa cha thlai za thaopa ta, ‘Thi khiah thi lâlao sy, Ngôki ei cha za pachhapapua hih’ tahpa pachâna chôta â nyuna alô tawhta a za pua pathlah awpa cha, “Khihhrâ satlia zy Zôrihtlâh lia chaoliah-chakeih eimâ chadai chhôhta…nâmo Sâ-ia chariah riahchhiepa zy ta, eima saw, lahpi nata nô nata paw zy thisaih nama vaw palo bao ma châ!” tahpa ta Khihhrâ satlia sahlao chyhu sapa pyu hryta Meithei, laikathi nata laikachha ta vaw papa chata avaw pachhai haw! 

A yna laikathi liata chariah sahlao theisâlô ta a kei daipa zy cha hrona hnei khao vei ei, tahpa â hno kawpa ta â thy chheih thlâh ha ei ta; a viasanah, Khihhrâ satlia sahlaozy chyhu sana pyu chhao a paro via lymâ hra.. 

Cha hawhta Meithei pyu nata chyhu sapa pyu hryna chata, Dôthâ chata laikathi lâ cha mohmia za pasaih para heih ta, Chariah pakha ta Ngôki sâby tawhta pathyupa ta, a chahryna pathlâpa ta â daophi nopa cha a za hmô haw..

“Khihhrâ satlia saih u, kei Dôthâ he lia ei y hih..khâpa eima chi aw..Mara satlia, thi chi leipa eima châpa he..Ngôki, chi kha y, Dôthâ ei zu hih” tahpa ta a vaihna chaluahpa ta Ngôki a daophituhpa chariah satlia cha a za pangai pâ lymâ haw..

Khihhrâ satliazy chhao cha ama Meithei zy chhaota thothih hry tawhna chata avaw luah lymâ ei ta; Chariah zy cha theisâlô nata zaih amâ phahla hapa vâta, ama hryta a hroh tlakaihpazy chata ama tâkô chhaota Khihhrâ satliazy cha vaw thyuhnao hra ei ta; cha su cha tâkô â chakhyhpa pyu nata, tâkô tiah kawpa ta chyhsa sapa nata ru â chaipa pyu chata a bie ha heih..pasana taopa vâta satlia nata pawtlohpa a rôh ngâpa pyu zy, nô nata laihsa, chipa nata thlahzohpa ta awhsâhpa pyu chata cha su bie ta..Zohna ta cha su thyusaipa ta, khaihna avaw luah awpa ta kaoki âvaw aw ngâpa chhao chata a moh ngâh mâh leipa ma a châ ha ma, charâhta a hmi avaw luah ngâh vei!

Dôthâ chata Ngôki a daophituhpa cha thlai ngaipâ lymâ ta..Ngôki chhao chata Dôthâ cha thlai vaw hmôpa ta, “Dôthâ..na vaw pachha tyh..na vaw pachha tyh!” tahpa ta ano a daophituhpa chariah satlia tawhna chata a tlieh papua a chhuahpa ta a theina zydua a papua ngâhai hra..Ano a daophituhpa chata ama yna su tawhta laikathi lâ â zâ daophi achhuahpa ta â zâ pahiehkheipa cha, Ngôki âvaw tlieh hrapa vâna chata, ama pano chata pao ei ta, laikathi lâ cha amâ hluah syulyu haw..

Dôthâ chata thlai amâ hluana lâ cha za ngai para ta, “Ngôki, chi kha y..Dôthâ ei zu hih” tahpa ta awhpâ laihna chôta a zâ zaw ta…Ngôki adaophituhpa ta a sâby tawhta Ngôki paraipa ta, laikathi lâ za thy awpa â chhuahpa cha Dôthâ chata a zâ zawhnaopa ta, ama pano ta laikathi lâ amâ zâ hluah lymâ haw.

Ngôki cha china nata thlahzohna hryta Dôthâ hmi a hmôpa vâta hnabeiseihna lai kawpa a kaw hnei heihpa vâta, cha hawhta Sâ-ia chariahpaw ta a sâby liata patupa ta laikathi lâta thy awpa â chhuahpa kha athata avaw pachyupa ta, a tha pie hra ta; laikachha lâ tawhta Dôthâ a zâ zawpa ta Sâ-ia chariahpaw â hluakhei hapa khata Ngôki cha a kaw daophi hmâpa ta, â duana laikathi ta liata thokô thaby liana chata â zâ hluapâ ta a luh a zâ chakhyhpa ta, a theihlô leipa ta â thy thlâh ha. 

Laikathi lâta a hluah hapa, Dôthâ nata chariahpa cha khâchâ â pyh raihriepa ta â zâ hluah lymâ ei ta, chavahkaopa liana heta za tla ei ta. Ama za tlana cha alô thih, ti hmahta a loh tu khao leina he vaw châ ta. Dôthâ cha a chô lâ â daihpa vâta Sâ-ia chariahpaw cha tlao ama za tlana lâta alô liata za tlapa ta, a chai ru nata alô â chakhyhpa pyu chhao a paro kaw…thyu thei khao leipa ta a chai a chamaopa ta â rôh ngâkaw.

Dôthâ cha thlai thyupa ta, amâ hluana liata ama tâkô (Vaihna) ama pathla raihrie hapa vâta kuruapa ta cha chariah cha thie cheingei a chhuahpa ta a rao liana chata rie ta. Chariahpaw hu chhâ awpa a tliehpa nata ziza â phahlapa vâta a hmia kaw râh ngâpa cha mo khoh â chhih lei kaw…thapi tlai phiapa ta buakha chhôh tlai a rie tawhna chata Sâ-ia chariah paw cha a pôhpa liata hrona y khao vei, tahpa â hno kawpa ta phie dia haw ta.

Dôthâ chata thlai a chariah thiepa cha thyusai parapa ta, chavahkao tawhna chata laikachha lâ cha kaw ngai para lymâ ta. Ngôki tluapâ, a tâkô (Vaihna) tluapâ tahpa ta mohmia pasaihpâ lymâ ta. Khih cha deih phiephu ha ta, noh deikua a chhi mâh leipa vâta, tuhpi-thothih râhhmâh phapa ry liana chata mohmia pasaih chhao a ru kaw chy.

Laikachha lâta Khihhrâ pasaiphazy nata Sâ-ia chariah a hroh tlakaihpazy a tlahnaona pyu cha â thei pha kaw hra.

Cha hawhta a vaihna tluapâ, Ngôki tluapâ tahpa ta mohmia a pasaihpa cha thlai vaihna cha chhobuh hryta kei hmôpa ta, a kei huah para ta. Bâhta khy via heihpa ta, thokô thaby liata Ngôki a theihlô leipa ta a thy thlâh hapa cha kei hmô heih ta.

“Ngôki, Ngôngô!” tahpa ta pahra a chhuahpa ta chalyu ta. Tho liata â chakhyhna vâta a khi tawhta thi za loh ngâpa cha Dôthâ chata a hmô patawnah ta hru parapa ta, chalyu lymâ heih ta. Cha hawhta buakha chhôh tlai a buakhei tawhta Ngôki cha a kaw hrapa ta, a luh pasapa vâta nata a luh tho liata â zâ chakhyhpa vâna chata a maorih khai ha.

“Ei nâ, ei pâ..khona, na pathlie tuuu..na pathlie tuu..â uh Dôthâ..na vaw pachha tyh” tahpa ta china nata thlahzohna a pahlaopa ta kaw awhpapua ta. Dôthâ chata thlai a pyhpa ta, “Ngôki..Ngôngô..chi awpa y khao vei la y..na kiah lia Dôthâ ei y ha hih..khâpa hmahta chi awpa y khao vei..ei cha vaw pachha ha la y” tahpa ta a luh cha chamaochahliapa ta. 

Ngôki chata Dôthâ lâ cha kaw uapa ta, a thlahlôhna nata a hnabeiseihna chaipa hmi a hmô hapa vâna chata, “A uh Dôthâ..nâma tlai na châ tah tyh? Ei nâ nata ei pâ zy kha kheita ama y? Ama hroh ma ama thi maw? A uh Dôthâ, na siesai khao kha y” tahpa ta athata kaw cha papua ta. Dôthâ chata khâchâ a pyhpa ta, “Ngôki, Ngôngô..chi khao kha y, chi’awpa y khao vei la y…Na kiah liata khâchâ ei y ha hih..Kha he thyu la, laikachha lâ khy para tua sih y” tahpa ta Ngôki cha a pyhpa ta chakhâ kiahpa ta laikachha lâ cha kaw ngaikhei ta.

Cha hawhta Dôthâ ta Ngôki a pyhpa ta chakhâ ama kaw kiah ngâ nona chata laikachha lâta Sâ-ia satlia a hroh tlakaihpazy nata Khihhrâ satlia a tlahnao ngâpazy pyury cha â thei thei thlâh ha chy. Ama yna su ama kaw pua pahlie hlâna chata Dôthâ chata Ngôki hnohna chata, “Ngôngô..he lia vaw y chy ma y..Eima khih satlia zy cha sôkha ta kaw baokhâ tua sa y..” tahpa ta Ngôki cha su a ryh kawpa ta a pahnopa liana chata patyusa ta. Ngôki chata, “A uh Dôthâ, Khihhrâ khih thlahlôhna cha na vaw châ tlai na..Mara satlia dopa, ei saduthliena zydua a kina cha na châ..va khy la, Sâ-ia chariah zy cha ama zydua ta si kaw padia khai ha la, â bohpa ta vaw kua heih ma y..kyh ei cha pachâ” tahpa ta Dôthâ chakhâ kaw kiah ngâpa cha a ry lâ tawhna chata tlaichhai hmi kawpa ta kaw saih ta.

Dôthâ chata a vaihna cha â I kawpa ta chahupa ta, a hrohruapâ kawpa ta Khihhrâ satliazy nata sâ-ia chariah satliazy a tlahnaona su cha kaw pua pahlie ta. 

Sâ-ia chariah satlia hluh viapa ri cha avaw thy chheih thlâh ha ta; cha nota a hmiakô liata Khihhrâ satlia pakha ta Sâ-ia chariah pakha rao liata a vaihna â pamôh ngâna taihta a vaw chhawh ngâ nopa zy, laikachha lâ tawhta Sâ-ia chariah hryta satlia daw viapa, chipa nata a chalyupa ta â zâ râ ngâpa, seichhi ta ama za chakhaopa ta a ky lia za khaipa ta, a py lâta a kaw pua pahlie ngâpazy cha kaw hmôpâ lymâ ta.

Sâh-ia chariah pakha ta ama chanô patupazy tâkô chhaota ngaipa ta, thie lâlao khai awpa â chhuah nopa cha a mo chaki ta kei hmô chho ta, â kei zawhnaopâ haw..

Cha chyhsa chata a bâ kaw hypa ta a hmiakô liata chi kawpa ta a chalyu ngâpa nô pakha a za chhawh awpa cha Dôthâ chata a hnôhkyh lâ tawhta a vaihna chata a bâh cha kei chhawh hmâ ta, cha chariah cha pasa taopa ta ao tlilihta sâh ta. Dôthâ chata, “Chanô nainyu viapa cha ma zua na thyuhnao..Dôthâ, Khihhrâ satlia palôh dia na chakhei kaw..kha he nâ phuhna rakha ta sy” tahpa ta a tâkô chata a rao za chhawhpa ta, chariah sâh ngâpa cha phie a diapâ ha..

Chanônah cha sâh chhie ta sâh ei ta. Dôthâ chata pakha pakha ta ama buhna cha pathlâpa lymâ ta; ama thlahzohna nata ama hmo hmôpa vâta ama china chata ama zydua ta a pielyuna châh chhao pahno khao leipa ta, amâ duah pakhy khai thlâh ha bâ. 

Cha nona chata, a hnôhkyh lâ tawhta, “Dôthâ,…!” tahpa ta ama vaw awsaona ao cha theipa ta, Dôthâ â kei pahiehpa cha, Biekhâ, thihnia chhaota â thy thlâh hapa, Sâ-ia chariah pakha ta tâkô ta chhawh a chhuahpa ngâpa he kei hmô ta. Thlai a kei zawhnaopa ta a hnôhkyh lâ tawhta a rao khâchâ riepa ta â die khei haw; Sâ-ia chariahpaw chata a tliehpapua a chhuahpa ta athata kaw chatôh ta, châhrasala, thâ nata zâh liata heih zy hlâta pachyu via syulyupa, Dôthâ riena tawhtapa cha a tliehpapua thei vei.

Cha hawhta buakha chhôh tlai a tha zydua hmâpa ta a rie tawhna chata, ziza a phahlapa, a husona nata a hrona hnawh chaipa pamaipa ta a y hapa Sâ-ia chariah satlia cha dusawta ta a tha za nai lymâ ta, a tlieh awpa y khao vei. Dôthâ chata a rao a rie ngâpa cha liahsa a hu a chhâ ha, tahpa a pasia tawhta pathliepa ta Biekhâ cha thlai kei ngai ta.

Biekhâ cha thihnia chhaota, a kâ chachâh lâta tâkô ta ama chhawna, kha kha daihmâ ta laipa chahupa chata a vaw zia thlâh ha ta. A hmiaphaozie liana chata thisaih a pahlei hluh kaw bâpa vâna chata a tha liahsa chhâ ha ta, rei a daih khao sala pangiasa a chhih vei.

Dôthâ chata, “Uhta Biekhâ, a pei dâh châ..! Kha he hao lâ via hao a pasie tua sih y..na palôh pachhyu la, khâchâ na hmah kha chahu ha ma y..” tahpa ta patyusa ta. A ky liata a vaw bai awpa ta a ky cha dao ta; Dôthâ chhao chata thachhâ kawpa ta Dôthâ ky cha avaw baipa ta, Khihhrâ chanônah amâ duapakhyna lâ cha ngaikheipa ta, cha liana chata kei pazia ta. Chanônah chata thlai vaw buakheipa ta, ama poh zy cha hriepa ta Biekhâ hmah cha vaw khâsia para ei ta.

Dôthâ chata Biekhâ hnohna chata, “Pakhazie hroh bâ ei? Keimo lâ hrona a pahleipa eima y tlâ ma?” thlai tahpâ lymâ ta. Cha nona chata laikachhâ lâta Khihhrâ satlia sahlao ao nata reih, chyhu sa ngâpa pyu ta, “Nâ Sâ-ia chariah chhiepa, za chô tyh..Khihhrâ satliazy y lei chhôhta eima chanô peihria leipa nata machâ khâpa tao thei leipazy zua nama vaw tlahnao…za chô tyh” ama tah ngâpa pyu cha kei thei ta. 

Chanônah hnohna chata, “Laikathi liana khuta Ngôki y ta, nama hryta pakha khata za dy muh vy..a luh liata hmah a phaohpa vâta â theihlô lei chhao a thlâ ha thei..” tahpa ta Ngôki yna lâ cha dy ta. Laikachha lâta Khihhrâ satliazy ao vaw puana,  chyhu ama sa ngâna su lâ cha ngaipâ ha heihpa ta, thlai a kaw pahlyh ta. Biekhâ ta a kâ liata hmah a phaoh, tah leipa ta cha ahy hmahta thina-leina avaw tyhpa y hraoh vei ei. 

Dôthâ ama vaw hmôpa cha ama thapawh via heih ta, “Dôthâ, khi thokô liata khâchâ y ha ta, za chô khoh leipa ta, kheita eima tao vâ? Chaihrai hnei tlô ta, kiahnao thaipa châ tlô vâ!” vaw tah para ei ta.

Dôthâ chata, “Kha he a vaw hnei tua u..kei kaw kiahnao tua sâ..cha Sâ-ia chariah chhiepa cha kei Mara satlia, Khihhrâ satlia, Dôthâ ku liata a thi awpa na tlâ châ!” tahpa ta a hâh ta a vaihna cha siepa ta, pawtho cha a kaw kiah lymâ haw. Satlia hropazy chata Dôthâ riahphazie cha pakah â khaipa ta ama sai thlâh ha bâ. 

Thokô â sâhpâ kawpa a châpa vâta Dôthâ cha kiah chatlie thei leipa ta. Cha hawhta Dôthâ ta a kaw kiahnao ngâpa cha chariah chata a vaw hmô patawnah ta a tâkô chata za pathla thlu ta; vâhneichhi kawpa ta khai leipa ta, khâpa chhaichhi hmahta hnei leipa ta thokô liata chihupa nata thlahzohpa ta a y thlâh ha bâ. 

Dôthâ chata thokô cha kaw kiah hnolo lymâpa ta, Chariah atyuna thochiah cha a kaw tlô daihmâ ha bâ. Kaw paza sala a phei chakoh a kaw hria thei thlâh ha bâ aw tah thei awpa a châ.

Ary lâ tawhta Khihhrâ satlia sahlao ta ama kaw saipa cha chô lâ tawhta Sâ-ia satlia chata za hmô thlâh ha ta. Ano kaw kiahnao ngâhaituhpa, Dôthâ hmi liata hiehâhna nata ngiachhiena raita a hlao leipa, phuhla byuhna tily chahra kawpa cha hmô chhei sala a ngia vei. Chipa nata thlahzohpa ta ano a kaw paza pha daihmâ hatuhpa Dôthâ cha tao theipa hnei leipa ta avaw hâ thlâh ha aw.

Dôthâ chata a hmao ta a vaihna a siepa cha a ku chachâh lâta kaw chahupa ta, a ku chavei lâta khâchâ thochiah a patupa ta, a luh chôta liata Sâ-ia satlia chipa ta a chalyu ngâpa cha  a kaw mopa-ai thlâh ha bâ. A ry lâta Khihhrâ satliazy chata kheita ma Dôthâ chata a kaw tao aw, tahpa kaw sai khai thlâh ha ei ta; khihhro râh hro rai a heih thei vei ei.

Dôthâ chata a ku chavei lâta khâchâ thokô a patupa ta, a ku chachâh lâta a vaihna chata Sâ-ia chariahpaw cha a tha zydua piepa ta a kaw chhawh haw..A tâkô chata Sâ-ia chariahpa ngialy cha kaw chhawh ta, a vaihna tiah kawpa ta sâ-ia chariahpa phei vo nata sapa siepahliepa ta a rupa â kaw tyhpa pyu cha a paro pha kaw. Thisaih kaw zâ papuapâpa ta, Dôthâ hmia nata luh cha a za lo thlu khai haw. Chariahpa pasa taopa awhsâhpa ao nata reih cha theikhoh a chhih vei..Dôthâ chata thlai a phei cha kaw paraipa ta, a lei lâ a zâ daophi ta, a za parai pathla haw..Thokô a sâhpâ kawpa tawhna chata Sâ-ia chariah satlia, a hroh chhôhpa cha awhsâh ngâna chôta za tla ta, alei a za tlôpa cha sâh awpa y khao vei. Ao nata reih rai papua thei khao leipa ta â nôh thlâh ha bâ.

Khihhrâ satliazy chata thlai chadôpa ta, a khopa maihta tly ei, chapie ei, ama seichhi ta dy ei, thokha ta vaw chhawh ngâkaw ei, tah ei ta. Dôthâ chhao cha thlai za chôpa ta, chariah satlia cha thlai za pangaipâ lymâ ta. Satlia daw kaw chypa he vaw châ ta. Châhrasala, ngiachhiena palôh ano liata phaoh vei.

Ama hryta Sâ-ia chariahnah reih cheipa a thaipa, Thykhai cha a ku ta a keipa ta, Dôthâ chata chariah satliapa hnohna chata, “Khâpa khih chyhsa ma ama châ? Ahy Sâ-ia beipa ta ma cha vaw tuah ei? Khâpa vâta eima khih vaw chhopa ma nama châ?” tahpa cha hiahrih ta; Thykhai chata Dôthâ biereipa cha paliepa ta, chariah satlia cha hiahrih pachhuah heih hra ta.

Chariah satlia ta â chhyna liata cha, Thlâtlâh lâ tawhta chhie kheipa ta za tla laihpa châ ei ta; Khihhrâ khih chhao heta kô hluhpi a khô ha chiehpa, atahmâ ta ama bei, Thalai mahpaw daihti nota Thlâtlâh bei hnohta chhie amâ vaw bâhpa, ama pie leipa vâta cha hawhta vaw tlahnao thlâh hapa ama chânazie nata, ano cha rie a hrona pahlô awpa ta chariah satlia chata athata ahawpâ ta. Châhrasala, Khihhrâ khih satliazy mopadei liata hiehâhna, mei hawhta a ia ngâpa a hmôpa chata, cha chariah satlia hnabeiseihna cha hlaotloh aw vei, tahpa a sia thlâh ha.

Bo 13-na

Chariahpa ri cha laikathi lâta mohropazy ama paziana su lâ cha za ngaikhei ei ta, chariah hropazy ri kiah liana chata ama pazia ha hra. Chariah maluh ama vaw reipa cha, syno nata papangawh tlai he vaw châ ei ta; khih a dei hlâ nata, a zo thâ ta a tlahnaopa ama châpa vâta maluh a pahno paki awpa chhao avaw ru kawpa tlaina a châ ei aw. 

Dôthâ chata thlai chanônah yna lâ cha kei ngai para ta.

Ngôki ta Dôthâ a vaw hmô patawnah chata thlai vaw ngaipa ta, “A uh Dôthâ, nap ha ma? Hmah zy na phaoh ma?” thlai vaw tah lymâ ta.

Dôthâ chata, “Ngôngô, ei pha..keila ei ph any..Na luh a pasa khao ma? Biekhâ kha khâpa alyu?” tahpa ta Ngôki luh cha mopa ta. Chanô hropazy ta ama vaw mohôhpa vâta Ngôki khi cha a thi vaw phih hraoh khao leipa ta.

Khihhrâ chanônah ta ama vaw buakhei haipa, Biekhâ cha Dôthâ chata kei khâsia para ta. A tha avaw chhâ kaw bâ tlaina. A thisaih puapa a chhâ thai khao leipa vâna chata rei a daih khao aw vei, tahpa sia thlâh ha ta. Chanônahta ama theina hawhta ama chheipâh liata chhohna nata sihnapa zy tluapa ta, a hmah liata ama vaw hniapa tarawpa ta, yzie hnei tu vei. 

“Uhta Biekhâ, khâpa na lyu? Bie na reih thei ma? Tiama ma y…” thlai Dôtha chata kei tah lymâ ta. Biekhâ chata a tha zydua piepa ta, a pasaipa-I hrohrâpa ta Dôthâ cha kaw mohpa ta, “Dôthâ, ei chôta na palôh phaozie phana hawhna heta khahlâ zydua khata na chôta palôh ei vaw phaoh hra awpa tlaita aw…nâ ngiathai…ma…y” tahpa ta biereipa cha a ru a tah kaw bâ, tahpa cha sia thlâh ha ta. Châhrasala Dôthâ cha a kaw chyh-eih hnolo ngâkaw. 

“Uhta Biekhâ, cha hawhpa reina daihti châ vei la y..khih lâ thlai pangai pi ta, na pha papua heih la y..” tahpa ta Dôthâ chata Biekhâ ku cha patupa ta thlah palôh ta.

Biekhâ chata, “Dôthâ….keima châta khih lâ kuapa yzie hnei khao vei..nô nata paw….O nata lyu tah awpa hnei khao vana…..chariahzy ta ei nâ nata ei pâ hrona la ha ei ta;…eima O nata lyu mei ta ama rao khai ha hra..ei hmah he ei thikhei cheingei aw tahpa ei sia..hnabeiseihna pakheipa rie na pie kha y..ei bie rei awpa he pakhâta ta vaw nahthlie ma y…Kha he Ngôki kha zaw?” tahpa ta rairu tah kawna chôta a kâ lâ kei mohpa ta, Ngôki hnohna chata, “Ngôngô…..Dôthâ….kiah liana heta a….vaw tyuh tua bao…” kei tah ta. Ngôki cha thlai Dôthâ kiah liana chata avaw tyuh ta.

Biekhâ chata, “Dôthâ, khahlâ zydua tawhta eima duasu â pahliena nata, na hârapa châna vâta cha vaw mohnaopa ta, viasazy kiah liata na châna leipi hawhta ei cha vaw reipachhie tyh..keima vâta sikhôh chhao a pameih na tah kaw tyh aw. Kyhto liata hawti viapa na châ tarawpa ta,…châ tlu leipa na ta…hrozie nôchâ liata ei uhta châ chi ta..riahphana nata daotheina liata chhochhi la, ei zakha hmahta pih chanei sala châ tlu aw vana…” kaw tah ta. A tha a chhâ kaw bâpa vâna chata buakha a zâ chalih ta, Dôthâ chata thlai a pyhpa ta, Biekhâ luh cha a byh chô liata pachhaipa ta, a luh cha chamaopa ta.

My noh vaw chhi awpa chhao cha nochhi lâ tawhta â vaw luah pathao ha bâ. Cha su nata chheihpâh liata pavaw zy chhao chata pyury vaw papua pathao ha ei ta. Ama kiahpâh liata thina ta hrona pho a chhuahpa ta, a tha zydua a pie hai nopa cha pahno khei ei sala a ngia vei.

Khihhrâ chanônah, chariah satlianah ta ama patupazy chata, khâpa hmahta reih hlei leipa ta, Biekhâ cha mothlih chhaota vaw sai thlâh ha ei ta. Khihhrâ satlianah chhao chata rei awpa rai pahno vei ei.

Biekhâ cha dusawta ta a mo kaw padeih heihpa ta, Dôthâ cha kaw mohpa ta, “Dôthâ, keima hlâta hawti via chi ta, keima hlâta dyhchhie via chi ta, cha thota hârapa na châpâ laopa khata na chôta palôhchhiepa na paphaosa vei; châhrasala, kyhtotie liata ei châ tlu leinazy khata keima liata hiatliana pha leipa he thaoh ta, cha chata ei kholeina lâta ei hro cha a ngaikhei hapa a châ. Eima khih laihsa hryta ei mothai chaipa nata chhithai chaipa, palôhru hmeiseihpa ta ei vaw vâ-ia kaw tyhpa, Ngôki ta kyh a cha pachâ, tahpa ei pahno tawhna chhochhi ta cha na chôta hiehâhna nata hiatliana palôh kha, mohnaona lâta vaw pua ta, na palôh pasasa awpa kha ei chhuah chaipa avaw châ hapa a châ. Châhrasala, nâma khiahma ei cha pasasa ei tah ngâkaw nota, keima a pasasa na ta, na hro khiahma ei parao ei tah ngâkaw nota, keimasasyh hro tlao ei vaw parao hapa a châ. Na chôta ei khihsana dâh zydua vâta nâ ngiathai ma y….” tahpa ta Dôthâ hmi cha a mopadei thachhâ kawpa chata kaw moh ta, Dôthâ chata, “Uhta Biekhâ, ei chôta hmo na taopa, a ngiathai awpa abyuhpa khâpa hmahta y vei..keima hena a do vein a..hlâta uhthei viapa zana châh vaw pahno tyh leipa na ta..bie rei khao mâh kha y..na tha a chhâ tu aw..” tahpa ta Biekhâ luh cha za chamao heih ta. 

Khihhrâ chanônah cha ama mothlih a pathla leipa rai y vei ei. Ngôki chhao chata a mao-oh a ru tah ta..a hmao a siepa ta a mothlih â kaw hru ngâthlâh ha bâ. 

Biekhâ cha buakha chhôh tlai a mo pasopa ta â chalih tawhta, bie kaw reih heihpa ta, “Ngôki, Ngôngô, nâma chhao nâ ngiathai ma y…Kha he, na ku na vaw pie tua” tahpa ta Ngôki ku cha kei paza ta, Ngôki chata thlai a ku cha vaw chaluahpa ta, Biekhâ chata Ngôki ku cha Dôthâ ku liata kei piepa ta, “Khihhrâ khih satlia nata laihsa zy châta amopâtlâhpa, ahy chô liana hmahta palôh chhiepa a phaoh beih leipa, duasu a lyu lei kawna chôta kyhpachâna, ngâchhihna hmâpa ta cheihchalotuhpa, Kyhpachâna pathaihpa miah pahmôsa ta, Khihhrâ khihsawzy cheihchalotuhpa Ngôki nata Dôthâ, Hiahvâ cha nama hronoh zydua chhôh liata cha hrôbie ei sala, nama hrozie nôchâ a ngia kawpa hmâpa heta mohropa vaw pahnie lymâ muh vy…Kei deikua, nama chôta ei palôhphaozie pualei kawpa vâna khata rie nâ ngiathai muh vy…” kaw tah ta. Rairu tah kawna chôta kaw pakie ta, Dôthâ nata Ngôki ku cha a ku sâno ta chahupa ta, “Atahmâla, liahsa ei palôh tha a dâh ha na…Chhôhkhih ngaipa ta, vahlâ ei zohna liata chhao..rairu atymâna a tyh khao aw vana..Aw! Khihhrâ, ei laozaolaona, Phurie chie leipa ta hrozô ei vaw hmâna..ngiahbâh kawna chôta cha siesai bâh la vâna……” tahpa ta a eikhapi ta a hu kaw so ta, a phei kaw chatlaipa ta, thina chata hrona cha a tiah haw..

Ngôki nata Khihhrâ chanônah cha ao papuapa ta kaw cha ei ta; Dôthâ nata Khihhrâ satlia hropazy châta chhao rei awpa a sôh ngaita kaw na…A biereipazy cha Dôthâ palôh liata deikua paro chanei ngâkaw ta…ano tlai chhao cha Biekhâ biereipazy vâna khata, pua â hua khai hapa ta pahno ta..a byh chô liata a ziapa Biekhâ cha za moh ta, a hmi liana chata zachhihna dei leipa cha hmohropa za hmô khao vei..

Nochhi tlâhthlôh chô tawhna chata noh chhao cha vaw chhipâ ha hra ta. A ry lâta Khihhrâ khih satlia nata laihsazy palôh vâ â sâhna cha â hlykhei ha hra khiahma I, tah awpa ta a palôh a hiah hmi kaw hrapa he lyu ta; eikhapi ta â kaw luah thlâh hapa chhao cha kâchhie kaw sala na â ngia..chata tly, Khihhrâ khih, a chhiena lâta palôhpahawhtuhpa, a noh chhâ chaina noh liata palôh phana zydua phaohpa ta lytlâh a khô hapa Biekhâ khiahma a taokhei hra haw vâ tly?

Khihhrâ khih satlianah chata thlai Biekhâ ri a syna awpa cha buakhei lymâ ei ta. Za kawpa ta Biekhâ ri cha a sypa ta, a hmialâ siekhei ei ta. A hnôh lâna chata Khihhrâ chanô sahlao chata mâchhiesana hmi nata, mothlih pathla laina chôta vaw zipa ta, Satlia hropazy ta hnôh ama vaw khaw. Dôthâ chhao chata Ngôki cha vaw chhy laihpa ta, ama hmo a tyhpa pachâpâ laina chôta cha su cha ama puasai haw.

“A uh Dôthâ, atahmâ la khizaw liata nâma deita ei cha hnei ha bâ. Nâma ngâlâh eima pahniehna châ ha bâ chi ta, nâma leipa ta khizaw hropa rai hnei khao vana…” tahpa ta Ngôki chata liahsa a ngiahma khaipa ta ano cha-aotuhpa Dôthâ cha kaw moh ta.

Dôtha chata Ngôki cha za chakupa ta dusawta ta hmialâ ngaikhei laihna chôta, “Ngôngô, na palôh a pachhyu ma y..a sie hapazy thângiahna pasazie he ei hawti no tawhta atanoh taihta khâ ei palôh chhôh chaipa liata ei vaw tao hnolo lymâpa a châ tyh. Châhrasala, âmo cha khô ha ei ta, daihti thiehpa a vaw pahieh papua awpa lâna chata lâsie eima paryh awpa â ngiah ha tlô…na kiah liata y lymâ aw na ta, eima hmialâ daihti liata hmo a vaw tlôpa maih eima pano ta eima chatôh lymâ sy..” kaw tah ta. 

Dôthâ pachâna liata deikua, Ngôki, ta a nô nata a paw a tlaichhaizie zy, kyh a pachâzie zy cha lai chai leithei leipa ta…ama pangai ngâhaipa, mâchhiesana pyury ta a chathôh ngâhaipa Khihhrâ khih a ngia awpa cha hmahta a ngiaroh ngaita kaw..Châhrasala, Khihhrâ khih hmialâ daihti awpa cha, âmo sahlaozy ku liata â pahnieh ha bâ tlô ta. Khihhrâ khih amâ ngia tita Ngôki pachârôhna nata palôh pasana baichhipa ta a za y heih awpa deikua chata ngiarohna nata palôh a hrina pie leithei vei.

Ngôki cha za moh tyh ta, a hmia liata ama khih a ngia awpa ngiarohna nata, angiahtiahleina a pahlaopahlipa cha za hmô ta. Ama khih amâ ngia tita hmo vaw tlô awpazy cha a pachâna liata avaw luah chhieliepa ta, a ngiaroh ngaita kaw. Ano tlai chhao cha hmahta Khihhrâ khih mâchhiesana pyury thei chanei heih awpa cha a hmo ngiaroh chaipa za châ leithei vei.

Cha hawhta dusawta ta Ngôki chhy laipa ta ama sie ngâpa cha buakha a zâ duahpa ta, Ngôki cha za chaku pa-I viapa ta; a hmia liata pachârôhna, ngiarohna hmi hryta, a kiah liata ano a y hapa vâta hnabeiseihna nohkhaihpa, mâchhiesana hmi ta a kaw pho daihmâ ha tyhpa avaw lâpa cha mohpa ta, Dôthâ chata, “Ngôngô, na nô nata paw, na tlaichhaipa nata na kyhpachâ chaipa zy cha aw ngâpa ta vaw kua khao aw vei ei..châhrasala, ei hrochhôh noh zydua na kiah liata y ha bâ aw na ta..na pachârôhna nata mâchhiesana zydua châ hlykhei aw na ta, nâ lyna nata hnabeiseihna zydua liata khâchâ ei hlao lymâ ha bâ hra aw…atanohta eima pachârôhna he nohta tlakhei aw ta, Nohthiehpa vaw chhi awpa lâna cha ngaipa ta, khâchâ cha cha-ao aw na ta, cha patu aw na ta, cha pathlie khao aw vana” za tah ta.   

Ngôki hmia liana chata mothlih za loh leithei vei! A kyhpachâ chaipa Dôthâ reihkah vâta a za châ nota, ama khih ama tlô tita a nô nata paw vaw dy tuh awpa ama y khao leipa chata a hmialâ daihti ngiarohna pie ta; cha nota, a hmialâ daihti a kaw hmâ lymâ n’awpa liata ano châta hro lâthlôh â kaw chhih lymâ n’awpa liata mei-ôh khâ a kaw châ lymâ ha bâ awpa, Dôthâ vâna chata, a pachârôhna nata mâchhiesana cha a kaw zie-y via tlai thlyu aw. 

Mohropazy chhao cha ama vaw siesaipa su liata pahniena topa ta, pahniena hladyu pathluah thei hra ei sala; ama hmiakô liata mâchhiesana ta vaw dy pyly ta..hmialâ daihti zoh kawpa kaw hmiachhy laih awpa ama châ, tahpa cha ama palôh liata a lai kaw hra pyly.

Cha hawhta Biekhâ ri a sy laina chôta nata, palôh a hri kawpa ta nata, mâchhiesana hmi phaohpa ta buakha chhôh tlai ama vaw sie tawhna chata, ama khih, Khihhrâ khih, khih ativypa nata, chariah-chakeih ama chi beih leina khih hawka cha amaw tlô ha heih. Biekhâ ri asyna cha alei lia za kawna chôta pachhôpa ta, khihchhôh lâta chariah ta ama thiepa O chhôh tawhta mâchhiesana ao nata reih vaw pua ngâpazy, chariah ta O ama raopa kâ khai mâh leipa tawhta meikhu a kaw khu ngâpazy cha saipa ta, ama hmiaphaozie liata pachâna nano nanopa ama phaoh, tahpa cha hmô chhei thai’pa châ tlai vei.

Dôthâ chata ama khih hawka liata lô ama paryhpa cha vaw ngaipa ta, a Meithei liata a viasanah Meithei zaih cha khôpa ta, a Meithei cha a vâ lâ paheipa ta, kaw hmie papapa ta,   

‘Khihrâ khih la dialei khih ny,

 Viahpa Meithei phurie chie vei’ 

tahpa ta hladyuh za pathluah haw ta!

A châ tlaina, Khihhrâ khih liata la, Meithei pyu chie leipa ta, alyna Meithei pyu tlai la ama vaw papa tyh. Ama bie nata hla hmâpa ta ama khih, amâ palaikhei kawpa Khihhrâ khih ama vaw pathâhsa tyhpa cha, â do tlai na! Alyna nata hladyuh pathluahna Phurie chie vei!

Châhrasala, atahmâ ta PHURIE deikua he la, Khihhrâ khihsawzy mâchhiesana pa-ipachatuhpa phurie tlaina tlao avaw châ ha! Khihhrâ khih rônahna nata ativyna phuahluahtuhpa PHURIE tlai kha, mâchhiesana nata vâsâh ama taona PHURIE a vaw châ ha heih!

A Chhâ Haw!