Ukraine buana noh 5-na : Chyhsa 500,000 hlei Riahpaihpa (Refugee) ta ama y ha - UN

Ukraine buana chata Hriatuanoh kha noh 5 tloh ha, United Nations (UN) ta ama reipatina liata he Ukraine buana liana heta Ukraine chyhsa (Civilian) 102 ama thi hapa hawhta a palâsa. UN chata he buana heta Ukraine chyhsa 500,000 hlei tlai cha ama râh nata O nata lyu puasaipa ta, râh hropa lâ abohna tlua awpa ta a tuahpapua, a tah hra.

Hriatuanohta Belarus liata Russia nata Ukraine vyuhtuapazy apakyhna hneipa chata akachaheihna kyh reih ei ta; he nona heta Russia nata Ukraine pheisaihzy deikua amâ ka ngâhai.

Ukraine President Volodymyr Zelenskyy Office biepuapa chata he apakyhna liana heta akachaheihna (ceasefire) hnei pâ ha n'awpa kyh amâ ngiakhei aw, tahpa kha vaw phuah ha ta. Ukraine heta he apakyhna liana heta ama defence minister, hleikhôta Official peimawhzy a tuah.

Russian President Vladimir Putin, chata US nata ahrialâhpa râhzy cha 'Haihihpa beinarâh/Haipa beirâh' ("empire of lies") tahpa ta a aw ei. Putin heta French President Emmanuel Macron nahta phone ta bie amâ chhona liata, Macron hnohna heta he Ukraine buana kyh liana heta Russia abohna kyh awpa pachâ peimawhpa a châ khiah cha deita chana buana pathlâpazina a y chhôhpa a châ, a tahpa hawhta Report ta a palâsa.

He hleikhôna heta, Putin chata, "Ukraine ta pheisaih, adyuhna chhaichhi nano nanopa a hneipa/â vaopazy pachyh awpa" nata "Notla râhzy ta Crimea cha Russia râhchhôh a châ tahpa a pyh awpazy cha" adyuhna pachhâsa awpa ta cha hlaopatloh tua awpa a peimawh aw tahpa Putin heta a reih hra.

Russian nata Ukrainian zy he Belarus liata amâ tyupahmaoh khai tawhta Moscow nata Kyiv lâ kua rairie ha heih ei ta, atyupahmaohna ei 2-na hnei heih awpa ta achhuahnohna nata, râh luhpazy ama bie pachiapazy kyh liata asaohiahna ama hnei heih tua aw.