Afghanistan losihpa liata chyhsa 280 hlei ama thi

 

Kabul, târi 23 Chhiepa, 2022 (Pakhynoh) : Atamy mydi ta Afghanistan liata Richter Scale 6.1 ta pasapa ta lo asihpa liata chyhsa 280 thi ei ta, chyhsa za hluhpi ta hmah ama phaoh tahpa sawhkhâ biepuapa chata palâsapa ta, he hrona pahleipa zie nata hmah phaohpa zie he khih chaki-chakâ viapazy tawhta thâtih ama pahno thei tita chhochhi cha ama pôh via na ta ama pangiasazie ama reih.

US Geological Survey (USGC)-ta ama palâsana liata cha he losihpa he Afghanistan liata Khost khihpi tawhta 44 km (27 miles) ta â hlapa, Pakistan râhri kiah tawhta a vaw thaopa hawhta ama palâsa.

"Losihpa he a tlô hleikhôta â sih parei kaw," Afghan khihpi, Kabul liata a pahrâpa chyhsa pakha ta a reih, tahpa European Mediterranean Seismological Centre (EMSC) chata ama palâsa.

He losihpa liata athipa hluh viapazy he Afghan nochhi lâ bia, Paktika liatahpa châ via chai ei ta, he bia liana heta chyhsa 255 thi ei ta, chyhsa 200 hleita hmah ama phaoh, tahpa Afghan Interior ministry official Salahuddin Ayubi ta a rei.

Khost bia liata cha chyhsa 25 thi ei ta, chyhsa 90 rachhôh thohna-O ngaikheipa ama châ.