INDIA : Covid-19 hri-ohpa 12,213 hmô chhi; Pakhynoh hlâta 38.4% ta ama pôh via

Delhi, târi 16 Chhiepa, 2022 : Dawh 24 a khô hapa chhôh khata India liata Covid-19 hri-ohpa chyhsa 12,213 hmô chhipa châ heih ei ta, hetana heta India liata hri-ohpa hmô chhipa cha zâhnia hlâta zakha liata 38.4 ta â kaw sâh via, tahna a châ. He hri-oh thiehpa ama hmôpapuapa chhao heta Covid-19 hri a charei tawhta India liata he hri a oh hapa zydua zie cha chyhsa 4,32,57,730 ama tloh ha hra. Union Health and Family Welfare Ministry-ta a palâsana liata, atahmâ duasu liata India liata hri-oh haipa chyhsa 58,215 ama y hai. He hawhta a châ nona heta, dawh 24 a khô hapa chhôh khata hri vâta chyhsa 11 ta hrona ama pahlei.

Atahmâ duasu

- Covid-19 hri oh thiehpa hmôpapua hluhna State 5-pazy cha - Maharashtra (4,024), Kerala (3,488), Delhi (1,375), Karnataka (648) nata Haryana (596)-zy ama châ.

- Hri-ohpa hmô thiehpa hry tawhta zakha liata 82.96-zy cha he State 5-pazy liatahapa châ ei ta, Maharashtra liana deita hmô chhipazy he hri-ohpa hmôpa zie tawhta zakha liata 32.95% ama tloh.

- Dawh 24 chhôh khata hri vâta chyhsa 11 thi ei ta; hetana heta India chyhsa 5,24,803 tlai Covid-19 vâta ama thi ha, tahna a châ.

- Covid-19 tawhta atlâhpapuapa hluhna lâ he zakha liata 98.65 a châ hai.

- Dawh 24 chhôh khata tlâhleipa 7,624-zy ta he hri tawhna heta tlâhna to ei ta; hetana heta Covid-19 tawhta India chyhsa a tlâhpapua hapa zydua zie cha 4,26,74,712 ama tloh ha hra.

- Dawh 24 a khô hapa chhôh khata hri-oh thiehpa mohôh haipa chyhsa 4,578 ta ama kaw pôh.