India President 15-na châta Tribal chanô Droupadi Murmu atlyhpatlohpa a châ

 

India President atlyhna hneipa liata Bhara tiya Janata Party (BJP) candidate Droupadi Murmu cha India President 15-na châ awpa ta atlyhpatlohpa châpa ta, tribal hryta India President a châ tua chaipa nata a châ thei chhôhpa a châ. Kô 64 ta uhtheipa Murmu he Pratibha Patil khôlâ ta chanô hryta India President a châ heih thei tua chaipa a châ hra.  

President atlyhna liana heta Droupadi Murmu nata opposition candidate veteran politician Yashwant Sinha zy cha â chakho ei ta, ryureih haipa BJP candidate Murmu heta pahniena a to hapa a châ. India President a châ haipa Ram Nath Kovind he Khihpa noh 24, 2022 heta a daihti chhâ ha bâ aw ta, Murmu heta â kaw thla aw. 

Odisha thotlâh khih chyhsa Murmu he BJP-ta athlipasoh awpa ta ama chaluahpa candidate 20 hryta a hlao ta, Presidential candidate châta raopa a châ tahpa he TV siepahliepa ta tlâ pahno hra ta, ano tlai chhao a no-âh ta â ly kaw hra tahpa a reihpapua. Atahmâ cha India râh luh chaipa a châ haw.  

Murmu he kô 1958 khata Baidaposi, Mayurbhanj District, Odisha-liata vaw pih ta, tribal chipho miakha Santhal chipho chyhsa châ ta. Santhal he India râh liata Tribal lai chaipa ama châ. Khahlâ ta cha Odisha sawhkhâ ry liata clerk rai hria tyh ta, kô 1979-1983 likah khata Irrigation and Energy Department-liata junior assistant rai a hria.  

Murmu he Jharkhand governor chhao vaw châ ha ta, BJP liata cha chyhsa peimawh kawpa hry liatahpa a châ.