Article : Mararâh liata Mara reih he Azipa a châ

Rohtuhpa : S.Hrachu (L)

Mararâh liana heta reih sâpangawh (5) hnei pi ta. Eima reih chyu ta cheih chyu pi ta. Chônôchaipa eima Khazohpa achhyna liata deikua cha eima Missionarynahta Hlabu nata Biehrai reihta a châ awpa ta ama vaw hmâpa ''Tlôsai'' reih he eimâ hly khaipa a châ. Mararâh liata reih a ypa zydua he Marapa ta eima hmâ chyupa sai a châpa vâta Mara reih sai ama châ. Anodeikua Hlabu-Biehrai nata Achuna bu torai nata Châbu rona liata eima hmâpa cha ''Tlôsai Reih''  a châpa vâta Marapa ta eimâ syhpakhy chaina reih Tlôsai reih he '' Mara reih thlôpi chaipa'' cha a châ.

Kô 1987 liata Mara Literature Board ta he hawhna heta bie a pathlu - 

''Achuna bu zy, châbu hropa zy nata khâpa bu rai roh khohpa ta cha Tlôsai reih sai ta ropa châ aw ta. Tlôsai reih liata mohchho a y leipa; Hawthai, Chapi, Zyhno nata Vyhtu liata a ypa a châ khiahta cha reih hropazy la awpa hlâta cha hmâh lymâ awpa a châ aw'' 

tahpa ta a pathlu. Chavâta atahmâ taihta Puhpa S.Vadyu, CEM a châ nota Literature Board ta a pathlupa he hmâ lymâ chypa a châ.

Kyh maniah a pachâtuhpa Khazohpa ta Marapa châ eihta Sawhkhâna eihpa 'LÂCHAO' a chatypâpa MADC he maniah bawkhei awpa ta su to tawhta Mararâh he vaw pangai ei ta. He Siaha Khih nata Tipa Khih nata Khi to liata Mara râh pangaipa ta avaw paihpa zydua he eima lâchao maniah a hlyzi awpa ta Marârâh avaw pangaipa sai ama châ.

Mararâh liata Mara Reih acheihpa maih he Marapa châ pi ta. Reih hropa acheihpa zydua cha khichhaipa tah thei'pa ama châ. Chavâta keimo ta Khichhaipa cha eima reih ta bie eimâ chho awpa châ ta. Atahmâ he sawhkhâna eihpa hneipa ta eimâ dua tawhta kô 39 (atahmâ cha kô 50 a vaw pha ha bâ.admin) avaw châ ha bâ. Cha kô 39 chhôh zydua liata maniah avaw ngaipa zydua cha ama reih keimo ta eimâ hly tua lymâ hapa vâta atahmâ cha keimo hmâhchhâh ary lâ eima daih palie ha bâ vei ma he!! Nôhmeinô na, ''Ano saw athipa ri pazawh thlâh ha ta maniahpa saw ri a kiah e'' ama tahpa su liata eimâ duah ha bâ he zaw!! Eima pikheipa reih hmâhchhâh hnôhchhy pi ta, maniahpa reih cha thapawh kawpa ta eima hiahzaolaokhei ngâkaw bâ e!!

Eima pikheipa reih hnypa ta maniahpa reih eima pasâhsa vianazie vaw sai tua sih y. Noza â chhih na tah hr'aw vâ ma?

Satliapa: My Dear, Zozial na hnei ma?

Laihsanô: Zozial dia ma ei vaw hnei vei.

Satliapa: Ch'aw khiah la thopi nata sawhchiar n'aw pie thlâh teh.

Laihsanô:Y, thopi hangpa nata Vaosa sawhchiar cha pie lah vâ na.

Satliapa: A hangpa hlâta la athlôhpa la ei ngaina via.

Laihsanô: A thlôhpa ngaina via chi cha, nâ patahsa bik kaw dia.!

Satliapa: Zochhang hnei pâ va chi mâ?

Laihsanô: Zochhang he thlawhmâ eima tao khao leipa vâta a vang kaw bâ.

Satliapa: Â ngia kawpa la ei chei tua aw.

Laihsanô: Kei chhao hnawihsen avaw thu hra tua sah y.

Satliapa: Hnawihsen ringawt dei ma nâ thu aw..?

Laihsapa: Y, ei luh liata bakil chhao ei tei pâ hra aw.

Satliapa: Atamy la ei y nuam thai vei.

Laihsanô: Na y a nuam vei khiahta cha nachhawkna nie châ chi.

Satliapa: Atakô la ngaihzawng hnei na ta ei palôh âlie kaw.

Laihsanô: Cha na ngaihzawng cha dia ma hmô chak âchhih kaw.

Satliapa: Hmô hra la pha ta lem hlei bao va chi.

Laihsanô: Cha cha Laihsa pangai ma nuthlawi maw?

Satliapa: Laihsa pangaipa ma nuthlawi ma tahpa dia ma ei chhinchhiah vei.

Laihsanô: Na mawl tu ha na!!

Satliapa: Nâma zaw bialpaw na hnei ma..?

Laihsapa: Keima bialpaw cha la a ngawichawi hleikhô ta, a thing kaw bao na.

Satliapa: Hia awpa ta Palai ama vaw tuah tlâ ma..?

Laihsapa: Palai la vaw tuah mâh vei ei.

Rei awpa hluhpi y hrasala he via he châ chy sala, eima vaw pazao laih heih aw. 

A chô liata Satlia-Laihsa bie amâ chhona dâh khi moh la zakhei achhihna taih nata mohnao achhihna taihta reih hropa eima pahlao. 

Marapa Bieso liata ''O pazu na râh pazu ta a pho'' tahpa biephôh kha keimo Marapa sawzy chô liata miah vi pachaih khiah maw tah theipa a châpa ta â lâ.

Na pina, na liahritlona râh reih nata na vaw pi  tawhta chyhsa cha pachâsatuhpa Mara reih he vaw mohnaopa ta, na zakhei lymâ khiahta la, hmia lâ tôh thei khao leipa ta hnôh lâ eimâ sy pathlei la y!!

'Ei vaw pikhei ei reih cheina;

Hy a lei awpa pasaih va na!!''

- H.Zacho