Article : Mohropazy palyupalihpa

Adyuhpi ei 2-na daihti rachhôh khata African Campaign-liata Ahrialâhpa (Allied) pheisaih nôhtuhpa, 'Desert Fox' ama tahpâ ngâkawpa German pheisaih Hyutuh rônahpa Field Marshall Erwin Rommel kha a German-heihpa, a pheisaihzy nata a hmiahaopazy taihta ama pasâhsapa kha a châ. 

A khakhaipa lâta General thatlô kaw hrapa, Claude Auchinleck, Archibald Wavell, George S. Patton,  Bernard Montgomery zy ta ano he cha mo pasâh kaw ei ta, âmo hlâta hmahta ama soh pasâh via tah thei awpa kha a châ. Yom Kippur Adyuhna liata pahnie totuhpa Israel Chakeibarôhneipa ama tah tyhpa General Ariel Sharon-ta chhao, Rommel-ta adyuhna liata ryraona a hmâpazy cha, Bernard Montgomery Tactic hlâta a chônô viapa ta a pahnopa kha a châ.

Mililary Merit Order, Iron Cross, Pour le merit nata pheisaih palyupalihna nano nanopa dao ta. German Phopi pasaihpha hawhta a pyhpa châ ta, amâ palaikhei kaw tyhpa kha a châ.

20th July Plot ama tahpa, 1944-liata Hitler thie awpa achhuahna liana khata Rommel cha a hlaohli hrapa hawhta baipa châ ta. Hitler heta, Rommel he German German pasaihpha hawhta amâ pyhpa a châpa vâta â lâhâh kawpa ta thie awpa khoh leipa ta. Anosasyh hrona la awpa ta tah ta, anosasyh hrona â la khiahta cha, a chhôhkhanah zydua hrona pahlôh awpa ta bie â taih hra. 

General Rommel cha anosasyh hrona â la ta. Normandy liata Allied pheisaihzy nahta amâ dyuhna liata hmah a phaohpa vàta thipa hawhta phuahzâhpa a châ. State Funeral piepa châ ta, â phuhpa hawhta palyupalihna zydua chhaota pabupa a châ.

Rommel kha Hitler thie awpa achhuahna liata â hlaohli tlaima tahpa pasiana deikua y leipa ta. Â hlao hrapa ta baipa a châ. A pheisaih â palaikhei chaipa cha ano thie awpa achhuahtuhpa hryta â hlao hrapa ta reipa châ ta, Hitler palôh chhao a pasa kawpa hawhta ama rei tyh. A khakhaipa châ ha hrasala, General Rommel cha German chipho pasaihpha a chàna lei leipa ta, maohphyuh kawpa ta thie awpa khoh leipa ta, a runga thei chaina hawhta pasopanôna dâh a tlua hnolo. A thi tawhta chhao thina dâh tyhpa hawhta thi ta, palyupalihna a dao awpa hawhpa zydua nata a ri pathliena dâh awpa dopa ta pathliepa a châ hra. Ama baina dâh hawhpa duasu liata cha, maohphyuh kawpa ta thina lytlâh pakhôsa awpa a châ taraw, chahawhpa cha Hitler pachâdâh deikua châ vei.

Keimo hry liata deikua chyhsa apalaikheitlâhpa, reithaitlâhpa nata palyupalihtlâhpa hnei pi ta. A Palyupalih awpa a vaw chhuah pi ta, “Ano la cha ta kha ta,” “cha hawhta zy a y tyh”, “Chahawhpa thuthâ leipazy chana a châ bao” eimâ tah thomo tyh. Chyhsa palyupalihtlâh ama châna kao ta liata palyupalih thlâh ha leipa ta, ano leipa lâ tawhta vaw reipasipasua ta, khâchâ ama tlohleina eima tlua thomo ha tyh.

Chyhsa palyupalihtlâh a châpa cha tlâ palyupalih ei suh u. Achu awpa eimâ ngiah kaw. Cha hawhta a châ nota deikua hmo chyhnawh kawpa lia taihta palyupalihtlãh a châpa hawhta à phuahzâh ta, khâchà â palyupalihpa deikua a za y tlamaw thei hra thlyu aw.

Chyhsato he tlohleina nata tlâh châ-âh leina deikua eima hnei chyu. Chahawhpa vâta palyupalihtlâh ama châna nata reithaitlâh ama châna kao hmô lei eimâ pachãh tyhpa deikua he chipho hawhta eima laiseih lymâna châta hmo pha chaipa chà vei.

General Erwin Rommel daihti chhâna lãchhâh kha khâ â thei ei suh u.

(Reih hropa tawhta paliepa)