Football: UEFA Champions League liata akhaih awpa Manchester United

Liverpool deikua Europa League lia amâ khaih aw

Manchester United chata Champions League liata amâ khaih aw tahpa a sia haw. United heta ama Tlyliah Old Trafford liata ama khichhaipa, ahrapathina rai ta a to thei khao mâh leipa Chelsea pahniepa ta, Season heihpa liata Europe liata Club ataopasuana asâh chaipa liata amâ khaih aw, tahpa a sia haw. United heta khaih kha akhaih via awpa ama hnei hra.

Casemiro ta Tlyliah hneituhpa hmia asahna cha a luh hmâpa ta khôpa ta, he he Anthony Martial ta Jadon Sancho ta â hniapâ thlâh hapa tawhta ball a vaw piepa Chelsea kaochhôh lâ a phi pangiapa hmâpa ta United hmia asahna a baichha.

Wesley Fofana ta Penalty a cheipa cha United châta Bruno Fernandes ta pangia heihpa ta, si 3 ta hmia amâ sah haw. Chelsea lâta Fofana vâduana Noh a châ ha ei aw, a taochheipa ei nona hmâhphahnaipa ta Marcus Rashford ta United goal 4-na za khôpa ta, Chelsea goal y chhôhpa he Joao Felix daihti chhâ chyta a khôpa a châ.

Hetana heta Chelsea he Frank Lampard ry liata khaih 10 amâ khaih hapa liata khaih 8 po pahniepa ta ama y ha, tahna a châ hra. Premier League liata 16-na liata ama y hai.

He akhaihna chhichâna vâna heta Season heihpa liata United heta amâ iekhyh zôzawpa Liverpool cha Europa League akhaih awpa ta chatipapuapa ta; United deikua Champions League liata amâ khaih ha bâ aw, tahpa a sia ha.