KMTTP : India Maw-nochhi nata Mizoram châta hmahsiena chhikao â pahy hmeiseih ha bâ aw

[Zâhnia târi 9 Patô, 2023 khata Sittwe balyhpahâna liata Kolkata, India tawhta chhaichhi hmobaoh a phaohpa balyh (Cargo) cha kaw tlôpa ta India-Myanmar likah asiepahliena châta Beinô chavah (Kaladan) tilâpi (waterway) hmâna kyh liata chhâhchabi peimawh ngaitapa cha pathaopa a châ haw. Châhrasala, he tilâpi hmâpa ta asiepahliena ta athôhna hmeiseihpa a vaw tlôkhei thei n'awpa daihti deikua 110-km ta pasihpa, lâthlôh ama patlô tita a châ thei aw.]

Sittwe tilâpi (waterway) he India-Myanmar likah sôhpaliena hmahsiena châta nata India Maw-nochhi siepahliena peimawh ngaitapa châta pachhuahpanohpa 'Kaladan multimodal project' liata a hlaopa châ ta. He hmahlana he kô 2008 liana khata apyhpa a vaw châ ha tarawpa ta, Myanmar râhchhôh buana vâta rairuna nata atymâna athata â vaw tyh tyhpa a châ.

He hmahlana a pyhpa a châ tawhta nata kô 15 a khô tawhta, he Kaladan Multimodal Transit Transport project (KMTTP) a hmeiseihpa ta hmâh pathao awpa ta târi 9 Patô, 2023 khata, Kolkata, India tawhta chhaichhi hmobaoh a phaohpa Balyh laipa cha Sittwe, Myanmar balyhpahâna tlôpa ta, he hmahlana theilâpa cha a hmeiseihpa ta nie thei awpa ta chhikao â vaw pahy pathao hapa a châ.

He Sittwe balyhpahâna he Rs thysâh 3,200 (crore) hryuhna Kaladan Multi-Modal Transit Transport Project (KMTTP) ry liata hmahlana pyly châ ta. India sawhkhâ ry liata Ministry of External Affairs ry liata siekheipa nata, kô 2008 a pyhpa kha châ ta, he hmahlana heta India nata Myanmar likah sôhpaliena nata, Asia Chho râhzy (South Asian countries) nahta asiepahliena naosia viapa tao awpa cha â chhuahpa a châ. Liahsa patlôpa a châ tita cha he hmahlana heta India râh apathuh viapazy nahta asiepahliena kyh liata rairuna athata a tyh tyhpa India Maw-Nochhi state zy châta asiepahliena kyh liata chhikao kawh kawpa a pahy ha bâ aw. 

India sawhkhâ Union Shipping Ministry ry liata a ypa, Inland Waterways Authority of India (IWAI) ta ama taopa — Sittwe balyhpahâna (port) he kô 2018 liana khata patlô hapa châ ta. Anodeikua, pakhâpadiena nano nanopa vâta thlaita hmâ theipa châ leipa ta, Myanmar buana vâta nata, Chin nata Rakhine state liata rairuna a tlôpazy vâta he balyhpahâna hmâ pasaina nata apyhkheina he thlaita ama hmô thei leipa hawhta, IWAI official pakha ta a rei.

IWAI ta ama reinazie liata cha, “He Sittwe balyhpahâna hmâ pasaina he Myanmar heta atakô Nawh thla liana khata miah pie ta. Pasaina nata tao awpa peimawhpa nata angiahpa zydua pasia khai hapa châ ta, ahmiatua chai ta Cement a phaohpa balyh cha Kolkata tawhta Sittwe balyhpahâna lâ a kaw tlô thei haw,” ama tah.

Atakô Pamih thla liana khata sahphâ a phaohpa balyh cha Sittwe balyhpahâna tawhna heta Bangladesh lâ pasiesapa a vaw châ ha hra. “He he mopachhina châta pasiesapa a châ,” ama tah. Tilâpi he chhaichhi hmobaoh lai viapa a hri viapa - cement, sâh lâchhâh nata niebaw lâchhâh hleikhôta hmo hropazy phaona lâthlôh châta hmâ viapa a châ aw, ama tah hra. 

KMTTP heta Kolkata nata Sittwe balyhpahâna pazao aw ta, he heta Paletwa, Myanmar cha Beinô chavah (Kaladan) hmâpa ta a pazao heih aw. He Sittwe nata Paletwa likah tilâpi, IWAI ta ama taopa he patlô hapa a châ. 

Paletwa tawhna heta, India nata Myanmar râhri liata a ypa Zorinpui, Mizoram siepahlietuh awpa lâthlôh 110 km ta pasihpa chhia haipa a châ hra. Ircon Infrastructure and Services Limited, Ircon International pachiahpa — Ministry of Railways  — ry liata a ypa cha he lâthlôh khâsiatuhpa ama châ. Zorinpui tawhna heta Lawngtlai cha 100 km ta pasihpa lâthlôhta a pazao heih hra. Lawngtlai tawhna heta cha NH achhihpa ta Aizawl tlô aw ta, he tawhna heta Guwahati a hlaopa ta India Maw-nochhi state nano nanopa siepahlie khai theipa a châ ha bâ.  

‘He hmahlana ta athôhna a vaw tlôkheituh awpa deikua Paletwa tawhta Zorinpui pangaina, 110 km ta pasihpa lâthlôh patlô tita a châ aw’

Kô zabi 19-na daihti liata sâh paphao papuana su lai chaipa miakha Sittwe he Beinô chavah (Kaladan) hnawh, Rakhine state, Myanmar liata a ypa a châ.

Sittwe balyhpahâna thiehpa heta 20,000 DWT (deadweight tonnage) ta a hripa taihta pahnie ta, balyhpahâna parohpa deikua ta cha 2,000 DWT ta a hripa a pahnie. Sittwe balyhpahâna tawhta balyh â pielyu hmeiseih tita cha, India nata Myanmar likah sôhpaliena dei châ leipa ta, South Asia nata East Asia zy nahta sôhpaliena nata asiepahliena chhikao a vaw châ ha bâ aw.

He hmahlana achupasiatuhpazy ta ama reina dâhta cha he hmahlana tawhta athôhn hmeiseihpa a y thei n'awpa daihti cha hmoto ama patlô liahsa tita a châ aw, ama tah. He hry liana heta 110-km ta pasihpa lâthlôh Paletwa nata Zorinpui asiepahliena lâthlôh, KMTTP hmahlana hry liata peimawh chaipa, Myanmar nata India Maw-nochhi asiepahliena awpa cha a châ.

Gautam Mukhopadhaya, Myanmar liata India vyuhtuapa parohpa chata Kaladan project heta India Maw-nochhi châta hmahsiena kyh liata peimawhna hnei ta, anaosia kawpa ta India Maw-nochhi siepahliena nata, asiepahliena kyh liata rairuna lai kawpa a tyh tyhpa, Mizoram nata Chin state su chaki-chabâ viapazy châta asiepahliena pha kawpa a châ aw, a ta.

“Anodeikua he lâthlôh liata sôhpaliena kyh liata hmahlana deikua pakhâta ta hmahla a byuh aw. Myanmar buana vâta chipho nano nanopa riahrupa py nata People’s Defence Force (PDF) zy nata sawhkhâ pheisaihzy likah buana heta rairuna a tlôkhei thei hra aw,” a tah hra.

Sawhkhâ ta KMTTP he thla 18-20 hropa chhôhta patlô awpa a tah tarawpa ta, Myanmar râhchhôh ziza â thlâzi nata zi lei liata â pahnieh kaw aw.

"Paletwa tawhta Zorinpui pazaotuhpa lâthlôh, 110 km ta pasihpa lâthlôh heta Chin nata Rakhine state chapia aw ta, he a chapia awpazy he riahrupa Arakan Army amâ pielyu viana Suzy a châpa vâta rairuna y thei aw ta. Abohna kyh pachâ ngiathia awpa a byuh aw,” tahpa ta he lâthlôh taotuhpa Ircon official pakha ta a rei hra.   

Rairuna nano nanopa vâta KMTTP project he a daihti taihpa liata patlôpa châ thei tyh leipa ta, rairuna hluhpi amâ vaw tyh tyhpa a châ. 

He hmahlana kyh liata rairuna a tlôpa hryta ngiatlâh kawpa cha, kô 2019 liata Arakan Army ta Engineer pano ama patupa (abducted) pazy, lâthlôh taona raihriatuhpa company 2, Engineers Projects India Limited nata C&C Construction Limited zy nahta biehraina (contract) ama hneipa India sawhkhâ ta a phiepazy kha a châ.

He lâthlôh taona rai a hria haituhpa, Ircon chata “Myanmar râhchhôh ziza â thlâzi khiahta cha, atahmâ tawhta kô 2 chhôhta cha eima patlô thei aw,” ama tah.

He KMTTP he a hlaotloh hmeiseih tita cha, India Maw-nochhi châta athata athôhna - sôhpaliena kyh liata nata, hmahsiena nata khizaw nata India râh kawh viapazy nahta asiepahliena kyh liata naosiana a vaw tlôkhei awpa ta a hnabeiseihpa a châ. Chhaichhi hmobaoh mâ nata, hmo mâ chhao 50% ta a tlapahnai nahta pangiasapa a châ. Cha nota deikua, he hmahlana heta athôhna nano nanopa nata hmahsiena raohpa ta khâpa hmo hropa ma a vaw tlôkhei aw? tahpa deikua pachâ chhielie ta, achupasia ta, hmiachhy awpa ta achhuahnoh a byuh ha bâ.