Barôthu niepa vâta chyhsa 30 hlei tlâh vei ei

Mamit District, Tripura râhri liata khih a ypa, Darlak liata chyhsa 30 hleizy cha barôthu ama niepa vâta pasa/tlâhleipa ei ta, ama hryta chyhsa 15 cha thohna O ngaikheipa ama châ. He barôthu ama pathupa liana heta chyhsapa châta phaleipa y na ta pangiasapa a châpa vâta atanoh Hriatua Noh heta mopasiapa a châ awpazie biehnawh ta a palâsa.

Darlak VCP ta a reina liata cha Hâta hmiatuapa Pohbie Noh khata chyhsa pakha ta bârôthu a vaw zuapa cha Odyh vâro ta vaw chalei ei ta, he ama barôthu chaleipa ama nie khai tawhna heta ama chhôhzy patlai ta, ama chhôh pasa ta, ama palipa hawhta a rei.

VCP chata “Pohbie Noh zâlâ tawhta rairuna amâ tyh ha tarawpa ta barôthu ama niepa vâta a châ na ta pangiasaleipa ei ta, thohna O chhao ngai hlei vei ei. Châhrasala chyhsa hluh viapazy he hawhta rairuna amâ vaw tyh lymâ hapa vâta Chutyh noh khata thohna O ama ngai ha hrapa a châ,” a ta.

Thina leina deikua tlô hraoh leipa ta, Mamit district Thohna O rakhô adaihleina vâta chyhsa 15 rachhôh thohna O liata mohôh ei ta, ahropazy deikua O lâ amâ mohôh.

Barôthu he tlâhchyhsazy âhmie kho kawpa nata, pasô kawpa a châ nota, thokha ta ama pathu nota a thyu patoh thei n'awpa ta tahpa ta chyhsapa châta thohna phaleipazy ama pahlao thlâh ha tyh. Mizoram liata chhao he hawhpa vâna heta thina leina taihta a vaw tlô tyh. Asohsi â ngiah ngaita.

Dawhtyzy nata State Food and Drug Administration (FDA) zy chata he hawhta barôthu tlyma, hmohropa chhao rai, niepasi bawpasi a y tyhna chhâpa he barô chi/chikaopa, lyu liata chhei awpa, lôvâpa thiena hlyu (pesticide/insecticide) ta patohpatia chiehpazy ama pathu tyhpa vâta a tlô tyh, ama ta. He hleikhôna heta, barô ama pathuna tlyma, ama pasina beihkoh/chhaichhi pathaihleipa vâta a châ thei hra, ama tah hra.