Israel nata Hamas buana : Palestinian chyhsa 8000 hlei ama thi ha – Palestinian Health Ministry

Israel pheisaihzy ta alei lâ tawhta Gaza Strip ama tlahnao pazao lymâna liata, khizaw râh nano nanopa tawhta Palestinian zawmarâpa (civilian)-zy abohna pachâ awpa ta ahawna reikah paro via lymâ hai ta. United States chhao a chalih molo leipa ta Khazohpanoh khata Israel cha Gaza atlahnaona liata Hamas riahrupa nata zawmarâpazy pahrua awpa ta biesakâ vawpa ta, khizaw râh nano nanopazy ta Palestinian râh chhôh liata a pahrâpazy châta deichhyna hmo chata thlai Gaza tlô awpa ta amâ vaw hnaw hai hra.

Thâtih thieh chaipa liata Israel pheisaihzy chata a khô hapa dawh 24 chhôh khata riahrupazy yna su peimawhpa amâ nua viapa su 450 cha ziza tawhta ama tlahnao, tahpa phuah ei ta. He amâ nuapa su hry liana heta Hamasa achhihthana supipa nata Tank kana Missile ama kapapuana suzy â hlao, ama ta. Israel pheisaihzy ta ama tlahnaona vâta Gaza khihpi cha meikhu ta khu ta. Pheisaih biephuahtuhpa Rear Adm. Daniel Hagari chata ziza tawhta tlahnaona liana heta Hamas riahrupa vâro ama thi, tahpa a phuah.

Târi 7 Phiata liata Hamas-zy ta Israel angiahnaopa ta Israel chyhsa 1,400 hlei ama thie tawhna khata, Israel pheisaihzy heta Gaza he tlahnao pazao lymâpa ta, Palestinian Health Ministry ta a phuahnazie liata cha Palestinian chyhsa 8000 hlei ama thi hapa hawhta a phuah.

Israel ta Hamas a tlahnaona liata biethieh-hlathieh chaipazy : 

Palestinian chyhsa, Gaza Maw lâta a pahrâpazy ta ama reizie liata cha Hriatuanoh myrâh tawhta Israel pheisaihzy ta ziza tawhta hleikhôta alei lâ tawhta Tank chhaota vaw tlahnao pazao lymâ ei ta. Bomb hmâpa ta Gaza khihpi liata Shifa and Al-Quds Thohna-O cha a vaw nua ei ta, Gaza chho lâ liata Khan Younis khihpi liata Hamas nata Israel pheisaihzy amâ ka, ama ta.

United States chata Israel cha peihrialeipa Gaza khihsawzy cha amâ bohna pachâ awpa ta tahpa ta, Hamas riahrupa nata zawrâpa pahrua awpa ta â hnaw hra. He hawhta a châ nona heta, US Presidet Joe Biden chata “Israel chata anosasyh â vaih n’awpa ta hmah a la thei nota, khizaw ta dâh azyhpa zinazie ta zawpi abohnazie ta hmah a la awpa a châ," tahpa ta Israeli Prime Minister Benjamin Netanyahu cha biechhona (Phone) tawhta a pahnosa. 

Israel pheisaihzy heta atanoh Hriatuanoh heta Syria nata Lebanon liata su thokha ama ka, tahpa Israel Defence Forces chata ama phuah. IDF chata Lebanon râhchhôh liata Hezbollah riahrupazy su thokha cha zawtheina tawhta a tlahnao tahpa ta, Syria râhchhôh liata missile kapapuana su thokha chhao zawtheina tawhta ama tlahnao hra, tahpa ama palâsa hra. He suzy tawhna heta Israel ama vaw tlahnaopa vâta kapa ama châ, tahpa ama phuah hra. 

British Prime Minister Rishi Sunak nata French President Emmanuel Macron ahlaopa ta, khizaw râh luhpa nano nanopazy ta Gaza zawpi deichhy awpa ângiahzie phuah ei ta. Biden nata Egyptian President Abdel Fattah al-Sisi zy cha Gaza liata deichhyna rai thlaita hriapa a châ theina awpa ta hmah ama la lymâ hra.

He hawhta a châ nona heta Russia liata cha, zawpi ahmaohpakhypazy ta Israel chyhsa nata Zu chyhsazy kiana zawtheina a vaw tlô tahpa biethâh ama theipa vâta, Dagestan liata vaw tlôpa cha tlahnao achhuahpa ta thyuhnao ei ta, ama hryta cyhyhsa thokhazy chata "Allahu Akbar" (khazohpa a rônah chai) tahpa ta awhpa ta Ochhi nata chhôhpadâhpazy paraopa ta, thokha ta Zawtheina apahâna su ngaipa ta amâ pahmaoh hra. 

Buakha a y tawhta, Russian zawtheina biehnetuhpazy chata Airport khawpa a châ tahpa phuahpa ta, pheisaih ama vaw tlô pâ ha hra.