Israel nata Palestine Arab-zy buana : A thaby tawhta
Kô hluhpi chhôh, I nata mie hawhta vaw ykhohpa ta, ama likah buana ziza a dia thei leipa vâta a châh via chhie deita chhao châ leipa ta, buakha chhôh chhao adyhryh hmâ leipa hawhta bua chhyh hapa, Israel nata Palestine likah liata atahmâno he buana pua heihpa ta, Palestine riahrupa py, HAMAS-zy ta Israel a môkua no pachhai pasupa ta ama tlahnaopa ta a sapapuapa vâta adyuhna tah thei awpa ta Meithei pyu rai a chalih thei khao heih vei. Khizaw ta he râh khapa tah thei awpa ta ahniahnipa, anodekua I nata mie hawhta adyhryh leipazy likah buana he pathi sâhdaih ngâna chôta a sai hai.
Israel nata Palestine buana nohpahlih liana heta khâpa hmo ma a zie ta, he buana he khatluta a pathuhpa ma châ ta, kheita a vaw thaotôpa ma a châ? tahpa eimâ laichadai tua aw.
Israel nata Palestine likah buana he â hnykhaw kaw tah thei awpa hmo châ ta. Ama buana he chipho (national), râhryureina (Political), râh/bia (territorial), Phoryhpa nata Zyhna (cultural and religious)-zy liata khâchâ â pahniehpa a châ. Israel nata Palestine chyhsazy khochaipa nata achhuah chaipa cha – Râh (Land) hnei awpa he a châ rairie.
"Hiakha lâtahpazy ta râh hnei ei ta, hiakha lâtahpazy ta hnei vei ei” tahpa ta Dr. Serpil Atamaz, Professor, Department of History and Director of the Middle East and Islamic Studies Program, California State University, Sacramento, USA liatahpa cha Israel nata Palestine likah liata hmo a ypa kyh he reih ta. “He buana he râh kyh de chhao châ leipa ta, sasyhta ryu a reina kyh liata he buana he a pahniehpa a châ hra. He he Zu-zy nata Muslim-zy (Jews and Muslims) tlyma Zu-zy nata Arab-zy (Jews or Arabs) likah buana châ leipa ta. He buana he Biehrai daihti tlyma, Biehrai Parohpa daihti tawhta athaopa nata he Biehrai-zy liata hmo arohpa vâta châ hra vei. He buana he cha atahmâhlâ daihti liata buana a tlôpa tlao a châ viapa a châ.” a ta.
Israel nata Palestine buana a vaw thaotôna he kô zabi 19-na tawhta alaichadai theipa châ ta. Ottoman Turkish Beinarâh (Empire) khata kô 1516 tawhta 1917 taihna khata Mediterranean nochhi daih lâ râh kawh ngaitapa ahlaopa ta Middle East kha a vaw vao ei ta. He râh he zyhna kyh liata a pahlaopacho kawpa a châ. He râh liana heta Zu, Muslim nata Krizyhpazy hleikhôta zyhna nano nanopa ama hluh kaw.
Prof. Atamaz chata, "Zu zyhna (Judaism), Muslim nata Krizyhna-zy he Middle East tawhta avaw thaotôpa sai châ ei ta. Ottoman Empire ry liana khata he su he zyhna nano nanopa ama châ tarawpa ta a vaw hly chyu ei ta, buana nata adyuhna tlô hraoh vei. Kô zabi 19-na nata kô zabi 20-na athaona lâchhâh liata khâpa hmo ma a vaw nano haw? Zu phopi (Jewish nation/Israel) vaw lai ei ta. British râh lana (colonialism) vaw lai ta. He hawhpa ananona/athlana vaw tlôpa heta he râh he athata a panano hapa a châ.” tahpa ta Middle East ziza a vaw nano laihna dâh a rei.
Kô 1516 tawhta he râh, bia avaotuhpa, ‘Ottoman Beinarâh; cha kô 1918 liata Adyuhpi ei I-na liata ahrialâhpa py (Allied Powers)–zy ta Central Powers ama tahpazy ama pahnie raohpa khata vaw pao pâ ha hra ta. Kô 1920 a vaw pahiehpapua ta, khizaw abohna kyh pachâtuhpa, râh nano nanopa apazaopakhypa py ‘League of Nations’ chhao paduapa a vaw châ pâ ha hrapa kha châ ta. Kô 1922 liana khata, he py League of Nations heta Ottoman Beinarâh liata a ypa Palestine cha Great Britain mohôhna (administration) ry liata y awpa ta ryh ama vaw rao. (League of Nations he kô 1946 liata phiepa châpa ta, kô 1945 liata paduapa, United Nations liata amâ ngia/pahlyh hapa kha a châ.)
United Nations ta ryh a raonazie liata cha, British ta Palestine a mohôhna, â vaona cha UN ta Palestine râh cha khotalaipa râh ta a padua/a pachâsana taih ngâlâh, buakha chhôh châta a châ aw, tahpa a châ. châhrasala, Palestine râh he ama vaw rei chhielie hapa hawhta khotalaipa râh, sasyh ryureina hneipa ta khotalaina a hneipa râh deikua pachâsa khao vei ei.
He hawhta a châ nona heta, British-ta Israel phopi châta râh padua awpa ta hmahlatuhpa/Teituhpa – ‘Zionist’-zy cha Palestine râh liata Israel râh padua awpa ta bie amâ vaw taih, tahpa UN ta a pahno ha hra.
Prof Atamaz chata he ‘Zionist’ kyh he reihpa ta, "Zionism eima tahpa cha Palestine râh liata Israel râh, Zu-zy pahrâna râh padua awpa ta pachâna, pachuna hiezawhna nata hmahlana, teina a châ,” tahpa ta, “He daihti nota Europe nochhi lâta a ypakhypa Zionist-zy bie apachu chaipa cha, Israel/Zu chyhsazy cha phopi, râh a hneipa ama châ, tahpa he châ ta. Zyhna py hawhpa dei châ leipa ei ta, chipho phu kha, sasyh ta ryu a reina râh a hnei theipa ama châ tahpa cha khâchâh amâ ngiapâ” a ta
Kô zabi 19-na chhâna lâchhâh liana khata Russia nata Europe Nochhi lâ râhzy liata Zu chipho ahaona (anti-Semitism) athata vaw pua pathi heihpa ta, taolapa nata tlahnaopa ama châ pathao lymâpa vâta Europe liata Zu chyhsa a ypazy cha Palestine lâ he amâ paih lymâ hapa a châ. Europe tawhta dei châ khao leipa ta, Zionist-zy hmahlana vâta Muslim râh thokha Yemen, Morocco, Iraq nata Turkey tawhtazy chhao Zu chyhsazy chata Palestine ama vaw pangai lymâ ha hra.
Zionism he kô zabi 19-na liata Europe liata â vaw thaotô tarawpa ta, chyhsa thokha ta cha Zionism he cha hlâno thâtih (History) liata Palestine râh nata Zu chyhsazy azaokhina thâtih tawhta â vaw thaotô hapa hawhta ama rei. He he kô za hluhpi khô hapa tawhta ama mahnô-mahpawzy ta ‘râhtaihpa (Promised Land) ama vaw tah tyhpa tlaichhaina vâta nata, taolana tao awpa china vâta Palestine râh he ama vaw ngai pakhypa hawhta a pachâpa chhao vâro ama y hra.
Kô zabi 19-na nata 20-na rachhôh kha chipho nano nanopazy ta âmo châta râh padua awpa ta ama vaw tei lichih, râh nano nanopa hluhpi a pih lichih châ ta; Zu-nahzy chhao heta âmo sasyh châta râh padua achhuahpa ta ama tei ha hrapa a châ, chhao eima tah thei aw. Râh hropa liata ypa ta, râh nano nanopa liata taolapa nata thietupa châ ei ta, he zydua tawhta amâ boh thei nawpa nata, khotalaina ama hmô theina awpa ta âmo châta râh padua awpa amâ chhuah hapa a châ, chhao eima tah thei hra aw.
He hawhta Israel râh padua awpa achhuahpa ta Zionist-zy hmahlana he Palestine liata vaw pahrâ ta, râh eihhrâhpa tei hai hrapa, Arab chhituhpa nata py nano nanopazy chata vaw khoh lei kaw ei ta. Ottoman Empire a pao tawhna khata he Palestine liata a pahrâpa Arab-zy heta âmo châta râh padua awpa achhuahpa ta hmah ama la hrapa a châ.
He hawhta ziza a y hai nona heta, râh hropa tawhta avaw paihpakhypa tah thei awpa, Zu râh padua achhuahtuhpa Zionist-zy chata Palestine râh liata râh padua awpa ama khoh khiahta cha, Zu chyhsa a hluh thei chaina hawhta ama pahrâ awpa a byuh tahpa pahno ei ta; Europe nata su nano nanopa tawhta Zu chyhsazy cha ama palypangia lymâ hapa a châ.
Adyuhpi ei I-na chhâ hlâ, kô 1917 liana
khata Great Britain khata ‘Balfour Declaration’ vaw phuah ta; he he Isreal nata
Palestine likah buana liata hmo peimawh kawpa a châ hapa a châ.
He ‘Balfour Declaration of 1917’ ama tahpa heta Palestine liata Zu râh padua awpa ta paryhsa ta. He hawhta a châ nona heta, Palestinian Arab-zy deikua cha râh paduana kyh tlyma, sasyh ryu areina kyh tlyma liata khâpa hmahta tovyuh piepa châ leipa ei ta; he heta Arab chyhsazy palysa lei kaw ta, chaihrai alapa ta, adyuhna lâthlôh amâ chhih hapa a châ..
Great Britain heta Zu chyhsazy râh padua
pasaina a piepa hawhna pyly heta, Palestine Arab-zy chhao adyuhpi achhâ tawhta
kô 2 chhôhta râh padua awpa ta bie â vaw taih hrapa kha châ ta; anodeikua he he
a hlaotlohna hmô awpa a y khao leipa a châ.
British mohôhna ry liata Palestine a y nona heta, Zu chyhsazy cha athata avaw paihpakhypa ta, Palestine Arab-zy cha kyh nano nanopa liata pho lymâ ei ta, râh chaleipa ta, O nata lyu padua ei ta, sôhpaliena nata nietluana rai nano nanopa liata Palestine Arab-zy cha ama pho lymâ hapa a châ. He heta chipho mianopazy likah ziza pasah lymâpa ta, buana ziza â vaw thao haw. Ama likah ziza a su thai khao vei.
British chata thlai Zionist-zy nata Palestine Arab-zy likah liata aryhna tao awpa ta hmah a la tarawpa ta hlaotlohna y leipa ta, kô 1936 liata chhochhi cha Arab chyhsazy palôhtlâhleipa ta, buana ‘Arab Revolt of 1936’ tahpa ta pahnopa cha a vaw pua hapa a châ. He he kô zakha chhôhta he Palestine Arab-zy ta buana ama papuapa eikhana a châ. British sawhkhâ ta buana papai awpa ta thlai Palestinian Arab nata Zu chipho likah liata buana a ypa alaichadaituh awpa padua pâ ha ta. Kô 1937 liana khata, he achupasiatuhpa ‘Peel Commission’ heta Palestine cha su thôh lâta : Arab râh, Zu râh nata râh ahlypa (Neutral) – zyhna su pathaihpa nata peimawhpa yna su zy lâta pachhaih awpa ta pahruana a tao hapa a châ.
Buana a vaw paina lâchhâh liata, British sawhkhâ chata kô 1939 liata ‘White Paper’ ama tahpa papua heih ta. Palestine râh 3 lâta pachhaih awpa ta Peel commission pahruana cha dytha/apyh leipa ta, ‘hmo rairu’ kawpa a châ tahpa ta dytha ta. White Paper liata ama rozie ta cha, Palestine cha râh 3/su 3 lâta pachhaihpa châ leipa ta, râh deikua paduapa a châ aw, tahpa a châ ha heih.
He ‘White Paper’ heta Palestine liata Zu chyhsa a vaw paih theipa zie cha pachyh via ha hra ta. Châhrasala, Adyuhpi ei II-na liana khata Zu chyhsa a paih theipa zie pachyhpa chata yzie hnei khao heih leipa ta, Nazi-zy taolana nata thietuna khôkhâh achhuahpa ta Palestine cha athata ama vaw ngai pyly ha heih.
British sawhkhâ heta atheina rakha ta he Palestine chhôh buana nata ziza he padia achhuah taraw hrasala, yzie a hnei hlei leipa vâta kô 1947 liana khata he Palestine kyh he, Britain heta United Nations lâ hlâpachhuah ta. United Nations heta ‘Special Committee On Palestine – UNSCOP’ paduapa ta, he committee he Palestine lâ siepa ta, chyhsa pahrâpazy apakyhpa ta, hmo nano nanopa alaichadaipa ta pachâna thiehpa ama vaw puakhei ha heih hra. Palestine cha râh no lâta – Zu pahrâna râh nata Arab chyhsa pahrâna râh, su no lâta pachhaih awpa tahpa a châ ha heih. He pahruana he Palestine Arab-zy chata a pyh thei heh vei ei. Achhâpa cha Zu chyhsazy he maluh zydua tawhta zakha liata 3 tlâ châ ei ta, râh chhao a zydua tawhta 10% dei tlôh ei ta, cha nota râh zydua tawhta 55% piepa ama châpa cha apyh thei vei ei. He hawhta a châ nota, he daihti nota maluh hluh viapa Palestinian (Arab)-zy cha 45% dei ama piepa cha a pyh a ru ama tah kaw.
Kô 1948 a vaw pahiehpapua ta, British ryureina daihti vaw chhâ ta, Palestine ziza ama pathlâpazi hmeiseh hlâta ama mohôhna daihti vaw chhâ ta, ama puasai ha. Ama siesaipa râh cha buana nata athietuna ta a hâ thlâh ha bâ, tah thei awpa a châ ha bâ. Patô 14, 1948 a vaw pahiehpapua ta, Israel râh a pihpâ ha hra.
British ta Palestine mohôhna thyusaipa ta ama puasai aw tahpa ama phuah raohpa khata Israel PM hmiatuachaipa a châpa, David Ben-Gurion khata Israel râh paduana phuahpâ ha ta, Israel cha Palestine liata râh thiehpa, khotalaipa râh ta paduapa a vaw châ hapa a châ. He heta Palestine opa liata Arab râhzy palysa leipa ta, Arab nata Israel adyuhna, ‘Arab-Israeli War’ a pua pâ ha hra. He adyuhna liana heta Israel ta pahniena topa ta, a râh a pakawh lao ha hra.
Adyuhna a pai tawhta, Israel nata a opa râh - Egypt, Lebanon, Transjordan, nata Syria-zy likah liata aryhna ama rozie liata cha, adyuhna liata râh ama lapazy tawhta amâ sy aw tahpa a châ. He adyuhna he Israel ta "Khotalaina adyuhna (War of Independence.)" tahpa ta pahnopa châ ta; he adyuhna tawhna heta United Nations bietluna ta kô 1947 liata Palestine Arab-zy râh a vaw piepa thokha cha Israel heta lapakhua ta. Egypt nata Jordan-zy ta Gaza Strip nata West Bank amâ vao pazao hra.
Kô 1948 liata Israel a vaw pih tawhta cha, Palestinian Arab maluh hluhpi, Thyza hluhpizy cha ama pahrâna tawhta amâ pasie ha awpa vaw byuh ha ta, khahlâ tawhta ama vaw pahrâ tyhna cha Israel râh a châ hapa vâta ama puasai awpa â vaw ngiah ha bâpa a châ.
He kô 1948 Adyuhna tawhna heta Israel nata Arab-zy likah liata adyuhna ei thôh tlô ta, kô 1967 adyuhna kha a peimawh chaipa ta reipa a châ. Israel khata â chieh kawpa ta pahniena to heih ta, Palestine Arab-zy râh a la chhi ha heih. He adyuhna liata a lapa râhzy he buakha châta a vao awpa a châ nota, â vao pazao lymâ ha. He he United Nations ta dâh pasaileipa tah hrasala, Israel heta thyusai pyly vei. Palestine Arab-zy ta ama râh hawhta ama pachâpa - West Bank, East Jerusalem nata Gaza Strip zy Israel heta (Occupied Territory hawhta – Israel nata Palestine biehneina ry rairie liata ypa hawhta) â vao pazao lymâ hai.
Kô 1967 Adyuhna liata Israel ta â vao hapa (Occupied Territory) – West Bank, East Jerusalem nata Gaza Strip-zy heta khotalaina hmeiseihpa hmô awpa ta tei pazao lymâ ei ta; kô 1964 liata paduapa, Palestine Liberation Organisation (PLO) hmo achhuah chaipa, Palestine râh, sasyh ryureina hneipa ta khotalaipa râh padua awpa cha ama tei pazao lymâ.
Kô 2007 liata Muslim riahrupa py, ‘Hamas’ ta Palestine liata ryureina ama vaw to tawhna chhochhi khata cha, Israel ta â vaopa Palestinian râh-zy khotalaina pie ta, Islam râh padua awpa cha amâ chhuah chaipa châpa ta, kô 2007 tawh chhochhi heta cha Hamas heta Israel he ziza tawhta nata, alei lâ tawhta a ka ngâthlâh ha bâ; Israel ta chhao ziza nata alei lâ tawhta achhypaliepa ta, ama ka ngâthlâh ha hra.
Hamas he Israel, United States, European Union nata UK-zy chata riahrupa py (Terrorist Org.) hawhta a pyh ha ei ta; âmo he Iran ta sôh nata thih hleikhôta, adyuhna chhaichhi ta a bao tyh ei.
Palestine Arab-zy heta râh eihhrâhpa ama padua thei hlâlei nata, Israel ta â vao haipa Palestine râh bia thokhazy ama puasai hlâlei cha adyuhna he chhâ thai lei awpa a lyu ha
Hiahrihna a y hapa cha – Great Britain nata United Nations ta Palestine Arab-zy hnohta bie amâ vaw taih hapa hawhta Israel râh â duah raohpa khata Palestine râh vaw padua ha hra ei sala buana he a y khao ma? Palestine chyhsazy he UN nata Britain-ta ama dôveipa vâta atanoh taihta buana he a dia thei leipa a châ thei ma? Palestine Arab-zy tovyuh awpa kha Israel ama pie hapa vâta he buana he a chhâ thai khao leipa a châ thei ma? Chata leipa ta, Biehrai liata chhochhieliena kha tlao a tlô hai, eima tah aw?
No comments