A CHEIHCHALO SUH VY

 - Judson KT Zephatha

India ta khotalaina (Independence) vaw hmô ta, ano kuphei tlai ta avaw duah ha bâ awpa a châna daihti liana khata India Prime Minister ta Meeting peimawh ngâsâpa aw ta. He meeting liana heta Defence Minister zy, Senior party Leader nata Officer peimawhpa thokhazy chhao amâ hlao hra. He meeting liata ama bie pachiapa cha - Chief Of Army Staff (COAS)  raona chôchâh châ ta. Prime Minister ta, "India he Independent râh thiehpa châ pi ta, India chyhsa tawhta Pheisaih Hyutuh chaipa châ awpa heta a tlâh a châpa ama ypa ta pahno vana. Chavâta British chyhsa rao ei sih la a pha ngyu aw" tahpa ta pahruana tao ta. Officer nata Defence Minister zy chata apyhkhei ngâsâ sai ei ta. Cha nota pheisaih Officer pakha, a moh Lt. Gen Nathu Singh Rathore chata riahpha kawpa ta, ”Papu, Râh chhihtha awpa chhaota experience hneipa eima y leipa cha khazia ma Prime Minister lia chhao he British chyhsa tlâ eima rao hrâ vei e”  tahpa ta kaw reih ta. Cha bie chata ama meeting hneina su cha ziazi parohsa thlâh ha ta, Prime Minister ta meeting cha a pachhâsapâ haw.

Prime Minister ryraona hawhta Defence Minister ta Lt. Gen. Nathu Singh Rathore cha Chief of the Army Staff châta rao awpa ta a office liata charei hrua ta. Anodeikua he pheisaih officer heta "Sir, he Pheisai Hyutuh chaipa châ awpa heta keima hlâta chyhsa pha viapa ama y mâh tâ" tah ta. H pheisaih officer ta ano hlâta chyhsa pha viapa ta avaw reipa he ahy hropa châ leipa ta,  Lt. Gen KM Carriapa, India chyhsa tawhta Chief of the Army Staff a châ tua chaipa kha a châ. Lt Gen KM Carriapa heta mohphana nata hlaotlohna hluhpi to ta, adyuhna liata a ryraothaina zy, a riahphana zy, Pakistan nata India amâ dyuh nota a raihria rônah kawpa zy kha khati hmahta my thei rimâ khao aw ma pi. 

Lt. Gen Nathu Singh khata sasyh kyh â pachâ kawpa ta India pha n’awpa hlâta mopakha athôhna zy kha vaw tlua ha sala Lt. Gen KM Carriapa he India History liata su peimawhpa to ngyu vei. Anodeikua Nathu Singh ta ano hlâta chyhsa pha viapa ta a pahnopa, riahpha kawpa ta areih papuapa vâ chyu chyu ta a moh eima pahnopa a châ.

He hawhna hra heta keimo Marasawzy chhao, chyhsa phapa zy, reithaitlâh a châpa zy he isina palôh phaoh leipa ta ama hro noh chyuta liata palyupalih lymâ suh vy. Keimo nata keimo eimâ cheihchalo lei khiahta la, ahy ta hmahta Marasawzy he miah vaw cheihchalo aw vei ei.