CHHÂ KHA KHÔ TA, CHHÂ HROPA A VAW PUA TYH

~ Rev.L. Chunglinga, Siaha.

“Noh nata daihtizy he ahy ta hmahta patu thei leipa pi ta, pasai leina chôta a khô lymâ tyh."

Zâkha cha a mô thei leipa na ta, palôhrupa ta hmo hro hropazy pachâ laih lymâ na ta. Awnanopa siezie nata a laiseih lymâ n’awpa zy, chhôhkha khihsa-tôhtuna kyh zy, chyhsa hro anano chatliena zie zy, ei daihti a khô chiehpa nata ei hmâ haipa; ei pachâ lymâ no chata, a chô liata bie khi “Champion” kheipa ta ei môkheipa cha a châ.

Chhâkha khô ta, chhâ hropa a vaw tlô lymâ awpa châ tlai ta, keimo chhao eima khô cheingei awpa a châ, tahpa ta ei chahnaopa-i haw. Eima mahnô-mahpawzy ta ‘Chô lâ noh nata thlâpâ’ ama tah tyhpa kha atahmâ ta eima hmô haipa pyly he châ ta. Zâhnia lâta a tla hapa kha atamy ta avaw chhi lilawpa he a châ. Châhrasala, chyhsapa deikua cha, cha hawhta châ ma pi. Chhâkha khô ta, chhâ hropa a vaw pua tyh. Hawti no daihti pha kawpazy khô ta; thyutlia, satlia-laihsa, akhoh lichih daihtizy khô ta, nôpi-pawpi daihtizy vaw tlô ta, ama lochona daihtizy a khô tyh. Daihti a khô ha chiehpa nata lochona daihtizy he patu thei’pa châ leipa ta, vâhneina cha chyhsa hropa châta avaw châ ha tyh. Eima hawti no daihtizy kha aw..!!

 Hrochhôh khihsa-tôhtuna nata phusâ tâkâ pachânazy khata, maniah pabua leipa ta, daihti a khô awpa nata vaw tlô awpa chhaota maniah pabua hra vei.

Eikha cha Vaihthieh nata Vaihparoh Nyu (Cup) achhu ta a khaih awpa khoh hra pi ta; châhrasala, nyu achhu awpa cha hnei leipa pi ta. Pihnô Viapy ta nyu laipa (YMA Nyu) pha kawpa chhao a châ leipa cha hnei ta, a sahdô dôh n’awpa ta Ramawh khoh ta, cha Ramawh cha hawti zydua ta apia pi ta, nyu nata eimâ ri haw. Zâlâ dawh 3 a paro nahta Tlyliah liata cha Cup achhupa chata akhaih pi ta, khih khapa châ hr’aw sih la, khih hropa nata khih hropa akhaihpa hawhta thapi eima phia. Yellow Card hmô awpa chi leipa pi ta, Red Card hmô awpa chhao y hra vei. Zâlâ ta Cup (Lymâ) eima la thlâhpa cha eimâ lyna â sâh ngaita kaw. Atahmâ ta Gold Medal ama lapa hlâta eimâ ly lei viana chhao pahno ma pi! Cha daihtizy cha patu thei’pa châ leipa ta a khô khai haw.

Cha tawhta, Satlia-Laihsa lochona daihti vaw tlô heih ta, khonô/khopawzy chhao nahta ahy hmahta uahva leipa ta lyu lâpi lia apazipa ta pahneisilina chôta siekhoh pi ta, lôdu bieparuzy eima reikhoh no daihtizy kha, ‘khizaw he keimo châ deita khiama a châ’, tahpa ta eima palôh a tlâh ziezy kha… Bie ta reihpasia thai’pa rimâ chhao châ vei! Mokhaoh ta eima mopazy chhao kha khatlu ta alyna nata thaphana ma a châ? “Khizaw liata nâma deita….” tahpa bie ta maniah a hria dâhzy kha! Patu thei’pa châ khao vei… a khô khai haw.

Eikha cha, my pakhy bâ, chyhsa ama hluh lichih ta satlia thokhazy ta Itôhpa thie awpa kha avaw chhi ei ta, ama tha a pawh ngaita. Aphysaotuh awpa heih hra ta cha, “Khihpi liata charei chiehpa, lei pachârôh taopa ta na â rôh," tahpa ta awna chôta za physao ta, amâ ly dâh kha Churchill ta Hitler a tiah/pahnie nota amâ lyna hlâ khata aly lei via hlei veih ei.

 Thyutlia, Satlia-Laihsa lochona daihti he a khô aw tahpa pachâna chhao hnei vei ei. Châhrasala a khô khai haw!

Cha cha khizaw dâh, ahy hmahta ama panano thei leipa nata ama khôkhâh thei lei awpa ta Ryhraotuhpa ryhraona cha a châ. Atahmâ ta Nôpi-Pawpi a châ haipazy he ama hriapasana vâta nata ama rie a thei tu hapa vâta nata ama thatlô khao leipa vâta alopa châ veih ei. Atahmâ ta Satlia-Laihsa rai hria khao leipa ta nie pahâhpa torai niepa ta, High School nata College tlyhmia liata akhiekhâ tyhpa, hmo KG sâhrawh (10) hlâta ahri viapa a chalo beih leipazy chhao he lopa ta lytlâh ama khôna daihti avaw tlô aw.

 Chakeibarôhneipa chhao he hmahta a thatlôna daihti a khô nahta cha lôkhaohzy liata amôpa ta Sazy sie thei khao leipa ta, amâ môsao thlâh ha tyh ama tah.

 Hnabeidyna tlâh-laki liata aduahpa ta, hlaotloh leina saikaopa na sai tita cha taopathi theipa châ khao aw vei! Chhâkha khô ta chhâ hropa avaw pua. Cha chhao cha khô aw ta, chhâ hropa avaw pua heih aw. Na nô ta a pi haipa nata a cha-ao haipazy he, nâma a châ kaw thlatuh awpa châ ei ta, amâ vaw luah haw. Na khô n’awpa daihti a vaw tlô bâ aw.

 Na daihti na hmâh pha ma? Atanoh he, atahmâ daihti he na châta daihti phapa a châ.

He deita he nâ vaw chhy teh- Na daihti na hmâh pha ma? Hmopha taopa ta moleina adyuh la, hrona lâpi achhih la, cha tawhta tlyzaw hrona na hnei aw. Daihti anano khao leina liata.

(Rev. L. Chunglinga he UPC (NEI) Pastor châ ta, a chakaona patlôpa ta atahmâ cha a Pension haw)