"DUTY”

~ FC. Chhuasa

Khâpa bie rimâ ma cha tlupo ta reih chanei ngâthlâh ha awpa ei khoh tly? Bie hropa châ bao vei, Duty tahpa chôchâh he bao na. Thokha châta no-ai a chhih kaw hra sala, kei chhôhso liata za thi thei tlôh va! A yzie deikua la reih hlei ma pi. He he cha Satlia Robert nata S. Thakhai zy hmahta ama pahnothai thlâh ha aw!

Khâpa bie rai he reih na ta, Duty tahpa lâta papua khai khoh thlâh ha bâ na ta. Ei parikhei dâh â chieh ngaita kaw. Atahmâ chhochhi cha Zisu Krista ta a Duty a patlô vâ deita ta pachha a châpa eima châpa vâta vârâh nata Duty tahpa he khâchâ â pazao hapa ta ei pahno cha maw! A mopazi n’awpa ta Bible vaw pakai tua ei sih la.

I Samuel 15:1-35 moh tua ei sih la. Abei Sawla cha Amalek mozy a dyuh ta, ama hmo hneipa zydua nata ama sahroh zawzy taihta thie khai awpa ta Abeipa ta Samuela siepahliepa ta chho ta. Châhrasala, Amalek beipa a pahlôh hleikhô ta, atheihna hlâ n’awpa ta Mietakupa nata Viahchaotôhpa pha chaipazy pahlôh ta, Gilgal lâ a siekhei.

 Sawla cha hmopha ngaitapa ataopa hawhta â pachâ. Anodeikua, avâ Khazohpa a palôhtlâh vei.

“Israel khih nata râh cha Abeipa ta a cha chhu haw”, tahpa ta â chhy syulyu thlâh haw.

 Chadei châ vei, “Khopathliahpa ta y chi ta, tloh khao va chi”, a tah pazi. Khazia rimâ maw? Khâpa hropa vâta châ vei, a Duty na a patlô khao vei. A Duty a patlô lei hleikhô ta, a chakaona châ leipa, atheihna hlâna, Samuel Duty liata a chahraoh pâ lâlao heih ta. A mietakupa nata viahchaotôhpa thawh ngaitapazy cha Khazohpa ta saw ta reih leipa ta, “….atheihna hlâta reingiahna a pha via..”, tahpa ta amâ chhy syulyu thlâh haw.

 Eima Duty chhao patlô leipa ta, hmo hropa lâ zy eimâ chahraoh pathlei tlamaw aw. Duty nawh chaipa chhao châ hra sala, eima patlô lei noh ta thaileichâpa châ pi ta, chhiesapa eima châ pâ haw.

Zawna châbu eima moh heih khiata cha, Khazohpa ta Zawna cha Niniva khih lâ tuah ta, arâsaipa ta Tarsi lâ a sie syulyu thlâh haw. Thlihpipa hmâpa ta Zawna cha a chadai ei ta, Tilaipi liata thypa ta a y tahpa eima pahno. Eima Duty eimâ arâsaipa vâta Abeipa ta maniah â chadai hra tlamaw aw, asohsi ei suh u.

 Balyh liata chyhsa hluhpi ta rairuna amâ tyhpa hawhna khata eima Duty eima tao leipa vâta chyhsa hluhpi châta rairuna eima tlôkhei thei tahpa pahno ei suh u.

Eimâ phuhsiahna rakha ta Duty pie chyupa châ pi ta. Anodeikuala, Bible za moh laihpa chhaota mopakha chô liata Duty hluhpi za pahnieh hlei vei. Chavâta, Rome 12:7-8 liata cha, “Pachutuhpa chhao liahsa pachu mawh sy…ryureihtuhpa chhaota tiama ngaitapa ta ryu reih mawh sy”, tahpa eima hmô.

 Rai no rai thôh pakaoh ta, patlô awpa ta hnabeiseihpa nata ahnawpa châ ma pi. Eima rai chyu aphapa ta hria awpa ta tlao maniah â hnaw. Cha cha chakaona a châ. Bible liata Khazohpa a palysapa chyhsazy cha a Duty pachâ peimawh ta a patlôpazy he ama vaw châ tyh.

Lyuhneituhpa ta a lyu pachâ leipa sala, khitlyh ngâthlâh ha sala, kheita e sâh a hnei hluh thei rimâ aw? Dawty ta thohna-o nata tlâhleipa puasaipa ta a khodâh hawhta charei ngâthlâh ha sala kheita e eima pachâ aw?

 Missionary ta thâtihpha chho leipa ta sôh palie ngâthlâh ha sala, Motor â râ ngâhai nota Driver amô thlâh ha sala zaw…?? Ahy tlyma nohkha ta tlaw zakha hlao awpa ta rai pie aw sala, hria rai rai leipa ta a hlao na hiah thlâh ha sala zaw? Â… a ryh thai tlâ vei. A tao awpa a tao leipa cha chyhsa nata Khazohpa mohmô ta moleipa a châ.

Marapazy pi he eikhapi ta Abeipa ta ano pôhpa tlai a zupa ta, Inspection maniah hneikhei tlai mawh sala, eima Duty n’awpa su Duty Post liata a y leipa eima hluh ngaita kaw tyh nahta ei pangiasa!

 Chakhia cha, ngâchhih leipa eima hluh tahna châ thlâh ha vei ma? Ngâchhih leipa cha Khazohpa ta pasi tlôh ta… rohpadyna a pasi khoh bao cha! 

Tao awpa maniah pie ei ta, eima tao leina daihti liata cha, rai maniah apietuhpa hmia hmô awpa eimâ ngiaroh kaw tyh vei ma kha? Siku hawtizy hnohta Homework pie ei na ta, ahy hmahta aly kawpa ta ama tao leizie na chho beih vei ei. Kheita zieta e, Abeipa ta tao awpa maniah â hnawpa chhao hmahta eima pachâ peimawh leipa tlai ta, a hmia hmô awpa ta achhyna O zy eima pangai ngâh hra bao tly??!! Hmiakai kawpa ta Necktie-zy cha a ao pâ lâlao heih tyh pi! Mietakupa nata Viahchaotôhpa pha chaipazy a chei tyh hra ei sih la; Sawla hawh deita ta châ thlâh h’aw ma pi ma?

Pawla ta Timawthy hnohta bie rônah ngaitapa, Zai-o khihpi taihta a khaipahlie theipa, Amen bâh leipa ta pie hialia awpa reikah, ‘…pheisaih ahy hmahta adyuh nota hrochhôh khihsanazy ta patypamâ beih vei…”, tahpa hi. He tlai he na Chhâzaw Paw hmochhuahpa cha avaw châ.

 Zisu Krista chhao kha pachhana rai a hria nona khata, vâ khihpi liata a khihsa-tôhtunazy ta patypamâ thei vei. Pheisaih deita ta ma Duty a hnei thei ei? Châ bao vâ, keimo chhao eima hnei chyu.

 Chakhiatala, pheisaih deita ta ma adyuh awpa a hnei ei? Châ hra vei. Dawty ta pasana hri a dyuh ta, pachutuhpa ta zohna nata hruna a dyuh ta, Supply Department ta nodina amâ dyuh. Adyuh nota hrochhôh khihsanazy ta maniah a pabua awpa châ vei. He he Bible bie châ ta, bie hropa y vei. 

Nehemiah ta Jerusalem Kû a paduapathi nona khata, zawpizy cha Duty a pie khai ei: Mistiri, Pheisaih, Chiamie tôtuhpa etc.. Zawpizy khata ama Duty chyu patlô leipa ei sala, Kû kha paduapathi tlai aw vei ei. Râh nôpawpazy saih u, eima Duty eima patlô tlâ leipa ta a châ khiata cha kheihta e eima râh he eima paduapathi thei rimâ bao aw? Râh thyutliazy saih u, keimo thatlô bâhseih viapazy pi heta eima Duty patlô leipa ei sih la, nôpawpazy heta riah ama vaih pahnie vâ tlyma? 

Eima râh duasu moh ei sih la, ama Duty a patlô tyhpazy ta byhnâ to ei ta, ama tusaw chhâ (generation) taihta byhnâ ama za to tyh. He kyh liana heta pachutuhpa ei châna hawhta sie tuapa pachutuhpa, Duty a pha kawpa ta avaw patlô tyhpazy amopâ awpa hluhpi ei hnei. Ama sawzy ta byhnâ hluhpi pakhy ha ei ta, ama pakhy via lymâ thlyu aw. Paw ngâchhihpa hnei ei ta, nô ngâchhihpa ama hneipa vâta ama nohlao tlai na! 

Atahmâ tawhta cha Khazohpa, eima chi nata pho, khitlâh châta ngâchhih kawpa ta eima Duty Post liata y ngâthlâh ha bâ ei suh u. Eima Post deikua a lyu tlâ thlyu vei. Dawty, Engineer, Pachutuhpa, Ryureituhpa, Politician, Pastor etc a kheihawhpa rai châ sala; râh, chi nata pho, eima Khazohpa châta eima hriana kao liata Duty patlô chyu ei suh u.