ECM (MARA AWNANOPA) HE TA MARA LITERATURE KYH LIATA KU PATHLAPA A HNEI MA?

- Rev KP Azyu

BIEPAHYNA

Atahmâ hlâ eima thlyutlia thokhazy liata Mara literature ahrana ta miah chanaoh pathao ta, ei lyna tuna vâta pua ei na pangiahma sa. A rôhnah hmeihseih. 21st century â thaona he Mara literature reformation miah a vaw tlôkhei hmeihseihpa ta ei pahno.

Tlai chu literature kyh liata eima dâh a phi pathao ha bâ tlai he zaw!! khizaw hmahsie lymâ' ta, eima dâh a phi via lymâ awpa chhao a lyu.

(He liata ECM ei tahpa he CCIM chhao pahly pâ ta, Mara Awnanopa moh hmiatuapa zydua kha a a pahly khai aw)

Mara literature kyh liata eima kho pahâ tuna vâta Awnanopa maochhiena eletronic social media liata tha ta hmô awpa a hluh kaw. Mao tiarâh veih ei, achhâpa cha Awnanopa he chyhsapa mohôhpa a châ hrapa vâta taopasina chhao hluhpi a hnei thei tlai hra.

KÔ 1923 HMIALÂ TA MARA LITERATURE DUAHMO

R.A. Lorrain ta kô 1907 tawhta a no dei ta ta Mara literature he a vaw mohôh. Gospel of John cha 1912 liata patlô ta, NT chhao 1923 rachhôhpa liata patlôpa hawhta pahnopa a châ hra. He he Sârô Nôhro baona vâta a patlô theipa a châ. Hla chhao vâro tlai a palie hmâ hra. Mara literature kyh liata Awnanopa â chahraohpa ta a lâ mâh vei.

KÔ 1923 KHÔLÂ TA MARA LITERATURE DUAHMO

R.A. Lorrain ta Awnanopa cha ano dei ta siekhei thai awpa hawhta a rao leipa vâta Mara saw nôpawzy a saohiah laihna chô ta awnanopa nata Mara literature cha a vaw siekhei. A.B. Foxall chhao ta a kuphei pakha a châ lymâ hra. Kô 1923 khôlâ Mara literature chhao hmah vaw sie lymâ bâ ta, Awnanopa chhao â chahraoh pathao laih bâ hrapa a châ. Awnano chyhsa phahnai a ngiah viapazy ta Mara reih tlai ta châbu zy ama vaw roh pathao laih bâ hra. Awnanopa cha kô 1923 rakha tawh kha ta Mara literature he tha ta hmah vaw la ta, a tanoh taihta he duasu he miah a kaw tlô khei. Mara NGOs nata MADC â vaw dua hlâ via zydua kha Awnanopa ta Mara literature he a vaw mohôh lymâpa a châ.

MARA NGOs, MADC NATA VOLUNTEER ASSOCIATIONS NATA MARA LITERATURE DUAHMO

Eima pahnopa hawhta eima râh liata NGOs, MADC nata Volunteer Association zy he ta Mara literature he tha pasa leipa châ ei sala Awnanopa he mohôh pahnie khai tiarâh aw vei. MADC chhao ta hmah tha ta a vaw la hra. NGOs nata Volunteer Association zy chhochhi he cha tlaw kha chhao hlao leipa ta, Mara Literature hmahsie n'awpa ama hriapasa zie ei hmô ti ta, Mara sawzy he a lynabie hlâna châh pahno via sih la pha ei tah kaw kyh. Amâ piena he a rôhnah tah lei thei vana.

MTP cha kô 1951 lia a vaw duah ta, MSO- 1961, M.CH.P - 1995, Board of literature cha kô 1975, Mara Academic letter- 1995, 

Mata hlasa Py- 2003, Mara Write's Club- 2014, nata Hrâsie picture- 2016 zy he py nata amâ duana kôzy cha a châ. Âmo sahlaozy he ta Mara literature he tha pasapa ta kao nano nano lâ tawhta Mara literature he ama cheihchalo tyh. (Ei pahno paki leipa Py a y thei hra aw)

He pyzy â vaw dua hlâ via kô 30 nata kô 40 rachhôhpa zydua deikua cha Awnanopa he ta literature he a vaw mohôh tyhpa a châ.

ECM HE ZAW MARA LIATA KU A PATHLAPA HRA MA?

ECM he Mara literature pasaiphapazy pakah tawhta reipachhina ao hluhpi thei awpa a y tyh. Â dona kao chhao hluhpi a y. Chazy cha; Assembly liata Tlaikao reih a hluh tu haw tahpa zy, Krizyhapa Chiahmie Tlaikao reih copy ama tao tahpazy nata kao hropazy chhao hluhpi rei awpa a y tyh.

ECM he ta press and book room (Mara literature)châta kô kha ta Rs 2,800,000/- to 3,000,000 /- , 28-30 lacks he Annual budget a châ. NGOs zy literature châta ama annual budget deikua pahno lei khâh na ta pei ei tah kaw. MADC, Board of literature cha kô 2015 lia kha ta Rs 500,000 /- , 5 lacks annual budget amâ tu hra(biehnawh: MC.Pabei, chairman, Board of literature, MADC, 2015). ECM ta Mara reih châbu he kô kha ta copy hluhpi papua tyh ta, KC 500 hlei copies thla no or thla thôh liata ei kha, A pahrana bu, Sunday school text bu, mydi thlachhâna, KTP monthly magazine, KNP Magazine, Assembly agenda nata minute bu, a zydua ta ECM tawhta Mara reih ta châbu kô kha liata a pua tyhpa he copies 26,000- 30,000 he a puana dâh tlâhpipa a châ tyh. Châsala a thapha rei awpa la a chyh kaw tyh. He tlupo ta Mara reih châbu copies hluhpi hry liata Tlaikao reih ta copies 500 chhao a tloh leipa eima pahlao tyhpa he hmô thei kaw tyh pi ta, mara reih copies 29,500 eima hmô thei leipa deikua he la pei ei tah kaw tyh.

ECM NATA REIH HROPA KYH

Chata tlyh, ECM he ta official reih no hnei ta, chazy cha Mara reih nata Tlaikao reih zy he a châ. Achhâpa cha ECM chhôh liata Mara reih a pahno leipazy ama ypa vâta a châ. ECM he reih thoh reih palih chhao hmâ awpa a ngiaroh hlei leipa ta, Khazohpa khihnarâh kawh via n'awpa a châ khiah cha khâpa reih chhao hmâ awpa he a ngiaroh hlei vei. Mara literature deikua hmah pasiesa lymâ awpa â chhuah.

BIEKHAWNA

Mara saw he mo chyhta châ pi ta, a reipachhie khi chhao pha lei khâh pi ta, kheitarai châ sala, a reipachhie khao leipa ta eima tao theina rakha chyu lia he ta a cheihchalo chyu sih la, tha a pathyu raihri sih la, Mara literature kyh liata a baokhâ vei châhna chô ta, literature miah pietuhpa Khazohpa lâ he saina chô ta reiraoh kawpa ta hria khoh chyu ei suh vy.

Literature he chipho miah taotuhpa a châ. Vârâh lia chhao Mara reih pyly he cheih awpi ta, khizaw hmo zydua he siesai khai aw pi ta, LITERATURE DEIKUA HE VÂRÂH LÂ EIMA NGIAKHEI AWPA A CHÂ. awpa a châ. MARA LITERATURE tlâh parei mawh sy.