HLAPHÔH/POEM

Sonnet

Kyhpachâna

              

Ahy e nawhly hawh riahpaw raithli  ,

Chô rohti hawh pasuasa thei tyh tly;

Dinô nah khydi thlua leita iahdi

Hawh zaipa ta khochhina pawti zy?

Ahy e pahneisilih laina chô,

Nohlychhiki lyna pachâsa ta;

Hlato hlazaw zawh laipa ta Hrozô ,

Lôhhri phaolei lei peirâh pachâsa?

Ahy e pa dua thei riahpaw chhôhso,

Vâ peirâh nata lei phanazy chhao;

Hraolei pachâsa thei ta lyna noh,

Thosôh hawh thlieta chhohnah hawh paraoh?

Na vaw châ tlaina hraoleina zydua,

Thabypa nata athaona deikua!!

(Sonnet tahpa yzie cha ‘Hla chyhpa” tlyma “Pyuhchyhpa” tlyma ( Little Song/little sound) tahna a châ. Sonnet eima tahpa he Hlaphôh/Poetry miakha, Europe liata ama vaw pathaopatôpa châ ta. Kô zabi 13 tawhna khata Hlaphôh tlâh hrawh hleipalih/14 a hneipa, apyu, biekawh (syllable) nata pyuripatlaina (Rhyme) yzie hnei kawpa ta paryhpa lâta papuapa châ ta. Sonnet liana heta Italian Sonnet nata English Sonnet ama tahpa a y rairie hra.  Italian Sonnet liata cha hlabiezy cha Tlâh 8 nata tlâh 6 hneipa ta paryhpa châ ta, tlâh 8-pa cha Octave tahpa ta tlâh 6-pa cha sestet ama vaw tah heih tyh. Tlâh 8-zy cha a-b-a-b ta aripatlai ei ta, tlâh 6 heihpazy cha a-b-b-a ta amâ ripatlai heih tyh hra. Giocomo da lentini kha Italian Sonnet pathaopatôtuhpa hawhta pachâpa châ ta, ano khata Sonnet 250 hlei a vaw phipa a châ. English Sonnet tlyma Shakespearan Sonnet ama tahpa liana heta cha ‘Quatrains’ ama tahpa, hla châh 3, châh kha liata tlâh 4 a hneipa y tuah ta, cha cha tlâh 2 a hneipa, Couplet ta apazi heih tyh. Shakespearan Sonnet pyuripatlaina dâh cha, a-b-a-b, c-d-c-d, e-f-e-f,g-g a châ. Khi a chô liatapa khi Shakespearan sonnet sie zieta phihpa a châ.)