CHÂ CHHAI THEI VA NA By A.CHHUALAI

- Beimozachhi Hlychho

Photo Credits : Pinterest.com

Khotuapazy hnohta nata, kyh eima pachâ kawpa nahzy hnohta kheita ma eima lyubie he eima hlâ tyh hr'aw vâ tly?

Ahyzy tlyma sia patluapa nata ai achhih ngâ nataihta khazohpa ângiapâpa nahzy pakah tawhta bie pua tyhpa cha "Vâ-iana hla he moleina..." Tahpa he a châ thlyu tyh. Eima Baibul he moh sih la, 

"Hlazy Hla" lia khata asia ngaita kaw. Khazohpa chhao heta kyh âpachâ awpa ta lei sawzy he miah a pachu cha maw! A châ tlai, khazohpa cha kyhpachâna châ tlôh ta.

Queen nah vocalist 'rônahpa' Freddy Mercury ta "I was born to love you" a tahpa zy, 'Love me like there's no tomorrow' a tahpa zy, Elton John ta,"You are my Original sin" a tahpa zy ta hrisyh syta miah a sy hai nota kei deikua kaliah kawpa ta ei reih cheingei ta he hlâ ei sa tyhpa heta ei D thâh na pavâsa ta, ei molei chaina nata hro awpa ta ei hluhpi ei thi tyhna a châ châmaw!

Ei rei chiehpa hawhta eima vâ-iapa hnohta heta lyubie hlâ he aru ngaita kaw. Na pachâ beih ma? Marareih ta 'kyh eicha pachâ" tahpa ta palôh hmeiseihta rei aruzie hih?!

A châh khana he moh tua sih la,

"Châ chhai thei va na na tah khiah

Ei hnôh na zi laih la,

Sihnôh kuata hnôhlâ aheih kha,

Ei hnôh na zi lymä teh!

Eima hmia lia rairuna hluhpizy

Miah vaw chaby hra sa,

Chi lei ngiaroh leita eima tôh aw,

Bâh lia acha-aopa ta."

He bie hmotaotheizie na pahno mâh ma? Mara Film tua chaipa liata Achâtuhpaw nata Achâhtuhnô kha atahmâ taihta kha daihti nota "Châ chhai thei va na" ama vaw tah hapa kha zilih liata meih hawh pai mâh vei. Noh to chhihta thieh viata, saliah nawhly chhaota hrozô tlailai ama kiah ngâ chamaw! Mara hla he athlathli kawpa ta vaw la beih kha y!

A hla he moh chanei via la, reih pasia via la, chhiehrupa hawh deita ta dua-âh apasy tyhpa, y chakhyhpa pho châ ma pi tahpa na sia kaw aw.

Chaucer zy, Wordsworth zy nata, William Shakespeare zy daihti no tawhta pathli lymâpa, khizaw liata hmasiena tlôkhei hluhpa chaipa, "Romance Thlihpi" he khoh leipa Pastor nata Machâ ama y aw mâ? Eima khazohpa he kha tluta romantic-pa ma a châ aw tahpa he reih thei va na. Kyhpachâna pahnopasiapa maih he eima cha chhao a thuh; deikua, thu muarua hlei ma pi.

Nôpawzy ta lyuchâpa ama tua hlâta nata, thuasoh ama soh hlâta he hla chaneina he na vâ-iapa hnohta na hlä ngâh aw ma?

"Achhai khao aw ma pi(2)

Hrozô chhâ lia 'chhai khao ma pi."

He hla ei pachâpasia na ta la, Puhpa Ulele (W. Shakespeare) Drama 'Romeo & Juliet' kha pachâ lei thei tyh va na. Kyhpachâna vâta hneirôhpa chhôhkha pano, âhmiahaopa likah liata adyryhna lyuchâ tuatuhpa ama châna khaw, kei la my thei va na.

"Châ chhai thei va na ei ch'aw tah tawh,

Sihnôh kua khao aw va,

Na thina lia maih ei thi hra aw,

Sihnôh kua achhuah khao va,

Akhei hawhta chichhihna y hra sa,

Ei tôh lyma hra aw,

Nâ hleikhô ei hnahngâhna y vei.

Eicha zi laih lymâ aw."

He hla ei nahthlieh châta la, MLTR nah ta "Blue night" ama sapa zy, Diamond Rio ta "Leave me wishing still one more day with you" a tahpa zy ta ei chhôhso palie thei vei ei.

Hetan'heta a hla cha pachhâsa ta :

"Lailah pawmaizy na sikhoh hr'ei sala,

Ei chhôhso he pahie thai khao va,

Chariah hmia chhao chi thai khao va na

Sikho riah chhao chi va na,

Ei khotly nô lâ ei sie aw,

Lailâhzy n'aw sikhô tlâ khao kh'u vy."

Khazia ma kyh eima pachâpazy tlai cha täkhie miah ama sei tyh tly, kei la ano A. Chhualai tah dâh hawh heta "Ei lailâhzy n'aw sikhô tlâ khao kh'u vy!"