MARA REIH NATA CHAO IEKHIE

- Beimozachhi Hlychho

"Tlaikao reihta eima reih a disao daihmâ haw" tahpa bie post-pa a y rai khiahta la reih papua beih va na, kei la. Eina ai sao thlâ ha!

Chao-iekhie sia tlôh leipa ta chapasyry eimâ pasy tyhpa he eima chao a thu kho kaw ngyu nah ta ei pangiasa! Mara reih he achu tyh hran'ta pahlaopahli anao kaw. Chata a châ nota pahlaopahli awpa chhao pahno khao lei ngâ nataihta thai leipa, chha kalôpa chhao eima hluh kaw hra. He hawhpa nah hnohta mara reih cheih via awpa nata roh hluh via awpa ta eimâ pachu tyhpa he la hawtipa kô 1 hlâta uhthei via leipa hnohta paracetamol dose 1 piepa nahta miakha a châ thlâh h'aw khiahmaw!

Eima karânie nahzy heta bie interesting kawpa, "pleasure reading" he roh hluh via sih la; cha dei vei, pahneisaisona nata eima kho viapa kheihawhpa rai he roh tyh sih la apha khiahma i, ei tah!

Khâparai châ sala, social media he mara reih achuna pha chaipa a châ tah sah la reih chhei aw va na. Mara reih roh dâh he achu via tua suh eima thai lei tu sai. Roh dâh eima thai vei khiahta la eima reih cheih dâh chhochhi la "Chhôngia" deita ta a châ aw.

Mara reih roh dâh chhao hmah thai hleipa ta mara reih tha eimâ pasasa kaw tyhpa he la iekhie sia hlei leipa ta underpant apasypa hawh deita eima châ aw. Mara reih he reih nao kawpa châ vei. Thai hmeiseihpa y thei hra vei, reih laiseih haipa a châ hnaihta.

Eima reih he leidia aw vei tahpa he ei iekhie hruna bâh chavei lâ chaluah nachôta ei reih ngâh. Laiseihna liata deikua palaiseihsatuhpazy dusaw kaw pi ta, eima pachâ hoh vei khiahta la kâna râh tlô awpa ta kô 100 hlei tlai eima peimawh thlyu aw!