KHEITA NÂ CHHY AW?

~ Presley D. Khaimeichhô,

ECM Vaih, Siaha.

Tlâh nata thothi râhhmâpa zy, pawpi angia kawpa nata rainô ulia ao ngia kawpa zy, râhsa nata hmotaopa chi nano nanopa zy ta, âmo ataotuhpa ta ama yna su awpa a raona su liana cha ypa ta pahrâ ei ta, taotuhpa reithaipa ta nata ama pahrâna ti nata râh cheihchalo achhuapa ta ama ao hneichhôhpa zy, amâ ngiana toraizy papuapa ta paw ama pakai tyh. Ahy pahno leipa ta Mara râh tobipa ta cheichalotuhpazy ama vaw châ tlai na.

AlynaArtibie reina: Hmotaopa zydua hryta rônah chaipa, chyhsapazy heta khâpa hmo tlyma taopa ta, kheita e eima râh cha eima cheihchalo hra aw? He tlupo ta khizaw kawhpa hry ta chi nata pho thokha ama buana chhâ chaipa cha, râh sianopa ama hnei leipa vâta zy, râh-ri chôchâh liata zy a châ tyh, cha zy hry ta Mara chi nata pho ta maniah a paduapa hleikhô ta, râh pha kawpa liata eimâ boh thei n’awpa ta chavah nata tlâhzy hmâpa ta râh-ri maniah pakhâhpa ta, keimo khota ryu â reih thei awpa ta District Council eima hneipa vâta Khazopa reithai lei thei lei awpa châ ma pi. Châhrasala, cha reithaina dei cha a daih leipa ta, râh cha ano khota ypa ta a chhôh liata pahrâpazy ta eima mohôh vei khiata cha, râh chawhpa nata pahrâna tlâh châ leipa ta eima papua pathlei aw. Râh phapa nata hmotaopa to thlahtlana râh ta tao ta palaiseihsa awpa ta a chhôh liata pahrâpa Marapa sawzy heta maohphaona lai ngaitapa eima hnei.

Thaina nata sonazy he sahsyh châ dei ma? : Thaina nata sona â sosâh lymâ ta, 

Châhrasala cha thaina nata sona eima hneipa zydua cha a kheihawhpa châta ma eima hmâh tly? Pho hropazy hmiakô lia chhaota, thaina lâta apalaikhei awpa hluhpi eima hnei ha na, chazy chata eima ti nata râh châta hmasiena kyh liata khizaw pahnopa ta phopipa châ hra awpa ta, kuhnie hnei hrapa ta chhâ avaw y lymâ awpa liata Marapa chhâ thiehpa duasu maniah ama tlôkhei hr’aw vâ ma? Eima thaina nata sona zy, sawkhâ rai liata eima pachhâsa thlâh ha tyhpa he a pâhria ei tah kaw na. Mopakha nata chhôhkhazy hmasiena la a châ thei ngyu aw, anodeikua cha râh châta ku ama pathlana theilâpa deikua hmô awpa a chyh kaw na. Uphawh châmaih â paryupa hawh dei ama châ, eima thaina nata sonazy he, sôh hmô n’awpa dei châ leipa ta, a lymâ eima dao leipa chhaota khitlâh, awnanopa, chi nata pho hmasie n’awpa nata aboh thei n’awpa ta eima hmâ/thyu hra’pa he na eima thaina nata sonazy a sôh viana tlao a châ tyh.

A chi nata pho châna liata sia ta râh kypachâna hmeiseih ahneipazy ta cha, ama thaina, sona nata ama daihti sô kawpazy cha râh châta hlâ ei ta; râh, chi nata pho kyh ama pachâna chata ama thisaih liata thari thlapa ta, thina taihta ngâchhipa ta râh châta amâ vaw hlâ tyh, cha hawh penawhzy cha râh châta hniehnôh paryu awpa ama hneipa chata ama hro thlâh no bawlaw ta âmo sasyh ta lôbô â bô ha ei ta, he khizaw puasaipa ta chhaolei ry chhôhpadâh liata chahyh hra ei sih la, ama siesai penawh palôh lia khâ hrohpa ta ama rie tyh. Ama hmotaopa nata ama ku hniezy hmô pi ta, eimâ thei ngâthlâ ha tyh. He khizaw tawhta ama moh pahlei-padia thei awpa châ khao vei ei. Râh asosâh kawpazy he ano khota asosâh chiehpa ta ama hneipa châ leipa ta, a chhôh liata pahrâpazy hriapasana nata mohôhna tawhta â kaw sosâh lymâpa a châ. Sahdô cha a hneituhpa ta a daihti ta liata raihria ta a mohôh khiahta cha, thei phapa hluhpi papuapa ta â tivy tyh. Eima râh, chi nata pho châta a daihti ta liata eima hria lei khiata cha, eima chheipâh liata chihropazy ta maniah pahrâ khâhpa ta maniah ama disao pathlei aw.

Hmotaopa ta sy : Phopi penawh ta, “action speaks louder than words” ama tahpa zy heta eima palôh a khai hr’aw vâ ma? Reikah hlâta la hmotaopa heta eima châna dopa a phuah lymâ tyh. A py ta zy, a hri ta zy, ypa ta bielôhawhpa reina daihti liata cha, Mara râh kyhpachâ ta tha apasatuhpa eima za hluh kaw tyh, hmo hmeihseihpa nata a peimawh chaina daihti lia deikua cha, râh châta hmia â sah ta keih chakâpa ta hriatuh awpa hmô’pa eima sôh ngâsâ. Sasyh kypachâna nata mopakha ativyna tluatuhp’enawh châta cha, râh taopathina nata padona lâpi â chhih a ru ngâsâ aw. Hiachhiepa nata ahrakâna palôrupa tawhta cha thapasana nata kyhpachâna cha a khakhai lai chaipa châ awpa ta â thyukhei tyh. Lupahiah papa ta, “Marasaw, Chapaw saw” tahpa ta khiliah liata thatlô bâhseih kawpa hawhta a lieluh p’enawhzy heta râh kyh ama pachâna kyh lia heta khâpa ama tlôkhei hlei? A râh kyhpachâ kaw tlôh hra ta buana atlôkheituhpa dei tlao ama châ. Bie deita ta râh kyhpachâtuhpa châpa hlâta cha, hmotaopa ta palâsatuhpazy he râh kyhpachâtuh hmeiseihpa cha tlao ama châ. Eima râh hneichhôhpa pabohsa ta cheihchalo lymâ awpa he eima tao awpa peimawh chaipa châ ta, atahmâhlâ thyutlia hluhpi palôh liata cha he hawhpa pachâna ahneipa eima chyh kaw bâpa ta â lâ. Eima khiliahzy liata châtawpa (sign board) lai kawpa liata “Na râh châta khâpa e na tao hra aw” tahpa rohpa ta, hiahrina eima hmô tyhpazy heta, eima palôhzy a hria beih hra tly ma? Pachâ pasiana châh chhao pahno leipa nata tao pathi khohna palôh chhao a hnei leipa hluhpi eima y ngyu aw. Châhrasala râh chata keimo liata hnabeiseihna laipi hneipa ta maniah a hiahri ngâ kaw.

Eima Biehrai liata “ngiapâna cha hmotaopa hnei leipa ta ano deita a y khiahta la athipa a châ” tahpa eima hmôpa hawhta eima râh, chi nata pho abohna nata laiseihna cha eima tao hriana vâta tlao a châ. “Ngiachhiena vâta pachhana” tahpa vâta keimo lâ tawhta taohria awpa ahnei khao leipa hawhta mochao sa patupa hawh deita ta pachhana he eimâ patu khiata la, hmotaopa ahlao leipa ta ngiapâna athipa hawhta eima râh, chi nata pho he athi ngâ haina tahpa my khah ei s’u. Eima Râh, chi nata pho pabohsana kyh liata ahriatuhpa châ chyu’pa a chhuah ei sih la, thapasana nata kyhpachâna hnei leipa ta hniehnôh eima hnei leipa chhaota aparaotuhpa châ â chhuah khah ei s’u.

Hmahsiena nata Mara hrozie: Râh hropazy khihsazie nata â pielyu zie hâ â la tyh pi ta, eima O nata lyu taotia dâh nata eima tobina liatazy râh hropa liata eima hmôpa nata eima pahnopazy cha eima chhôhkha liata tao hra pi ta, thokha châta cha hmahsiena a za châna kao chhao a y hra, “Anodeikua cha” tah awpa a byuh ha heih tyh. Asosâh kawpa nata hmahsie kawpa ta eimâ zâ rei nona heta thyutliapazy palôh liata Marapa hrozie (Culture) za hmô pahnaina zy, eima châna (identity) chhao zakheipa nata a pahnopasia leipa eima za hluh kaw bâ, cha dei chhao châ vei, Marapa hro angia kawpa veiseih palôhâhna nata bao angiahpazy bao ta deichhy khohna palôh a phaohpazy eima za chyh via lymâpa ta â lâ. Hlâno mahnô mahpawzy daihti liata cha krizyhna ama pahno lei tarawpa ta ama khitlâh nata chyhsazy hro liata râh, chi nata pho kyh liata ngâchhihna hnei ngaita ei ta, ahy hmahta uahvana hnei leipa ta, ama ngâchhihna khochhih kawpa cha o puasaipa ta lyurâh lâ zy ama sie châhta ama ochhi pipazy cha thothu sâkha deita ta dyuhpa ta thlalôh kawpa ta o ama puasai tyh, cha ama ochhi ama hraina thothu chata ama khitlâh nata opa lyuhrizy, a chyhsa pahrâpazy ngâchhihna a palâsa ngaita kaw, atahmâ chhâ eima khitlâh hro liata deikua cha ngiâpana bie liata â sâh via lymâ pi ta, eima ngâchhihna deikua cha a diah via laih ngâ kawpa ta â lâ, nohto ta eima ochhi nata eima ryubyhzy hrai n’awpa ta Tâlâ eima hmâpazy a lai via ngâ kaw he zaw!! He zydua he taopathi ta padua pathi heih awpa he, thyutliapazy maohphaona a châ. Eima châna nata eima thyutuanazy pahnopasia tua leipa ta cha khatino hmahta asosâh thei aw ma pi.

Chhâ vaw y awpazy châta sy: Thyutliana daihti pha eima hnei chhôh liana heta “Râh châta khâpa ma ei tao thei hra aw” tahpa pachânazy hneipa ta eima thaina, sona nata daihti sôh kawpazy he râh châta hmâh bâ hra ei sih la, keimo chhâ liata a paw ngiana ti eima zyh hmâ leipa chhaota chhâ a vaw y awpazy châta râh phapa nata khochhihpa padua awpa he eima tao awpa cha châ vei mâ? Paw phapa chata ano châta châ leipa ta, a saw chhâ vaw y lymâ awpa châta hmophapa hluhpi patohpatia tyh tlôh ta, râh châta paw phapa châ chyu awpa ta Mara râh heta maniah â hnaw, y chakhyh thlâh ha leipa ta eima theina rakha chyu liana heta tiamana nata ngâchhihna chôta eima râh ta taopathi â ngiahna zydua he taopathi ta cheihchalo awpa ta eima palôhzy pachhuahpanoh bâ ei s’u. Châbu sâkha ei reipa liata ei palôh na hria kawpa cha, liahpahlô kawh kawpa liata machâpa paw pakha heta Coconut daw he bô ngâkaw ta, a bôna kiah liata thyutlia p’enawhzy chata, “Mahpaw y, kha Coconut daw na bôpa kha a thei na nie hmâ khao mâ?” tahpa ta hiahri ei ta, a kô khih mopa ta chhâ thlai palo awpa â hno thlâh hapa machâ paw chata, “Nama kiahpâh liata Coconut kô athei pathei ngâpa kha nie hmâ hra na ta, châhrasala ahy lopa ma tahpa pahno hlei va na”, tahpa ta a chhy ta. “He Coconut daw ei lohpa chhao he keima châ châ leipa ta, ei siesai awpa chhâ thiehpazy châta na ei paryu.” tahpa ta â chhy.

Puhpa A. Zakia ta…..

“Eima râh nawhpa cheihchalo awpa ta

Bie ngâlâh ta râh phapa tao thei’pa châ vei

A chhôh lia thyutlia saw chareipazy heta

Tiamana nata ngâchhihna hnei’pa a byuh”.

tahpa ta hlabie ta maniah chho ta. A châ tlai na, tiamana nata ngâchhihna a hlao leipa ta cha râh he padua pathi thei aw ma pi.