MEC nôpawpazy ta College Vaih Awnanopazy apakhykhei

SIAHA, 27 Thlazoh, Abeipanoh (MNN) --- Zahnia Abeipanoh my dawh 10:00 AM Pakhyna Service liata Mara Evangelical Church(MEC) nôpawpazy ta ECM College Vaih Local Church liata apakhy hrapa ta Greetings reina ama hnei.

College Vaih Awnanopa liata MEC nôpawpa apakhypazy:-

1. Rev. Satu Ve-u, Moderator

2. Rev. A. Rakhai, Executive Secretary i/c Mission

3. Machâ Zasaw, Treasurer, MEC Assembly

Rev. Satu Ve-u he ta MEC Awnano zawpi vyuhpa ta Greetings reina hnei ta, India nata Myanmar liata Marasawzy pi he unawh châ pi ta, eima Missionary chhao â miakha tahpa ta a reih hleikhô ta, râh-ri ta maniah pachhaih hra sala, unawh eima châna he âpachhaih thai’pa châ mapi tahpa ta a reih.

Rev. Satu Ve-u biereipa thokha, peimawh viapazy:-

1. Niebao rairuna daihti liata India Marasawzy ta Myanmar Marasawzy nodi dâhphipa ta eima y awpa maniah pasaih leipa ei chi ta, baona nano nanopa hmâpa ta maniah pachha papua tyh ei chi ta, eimâ ly ngaita.

2. Mission Field nata Krista chakaona liata azaona phapa hnei via lymâ awpa eima khoh.

3. Awnanopa laiseihpa, thatlôpa nata pitlohpa thari cha ngâchhihna, ryureina liata adona, chakaona liata kyhpachânazy a châ.

4. Nôkha saw hawh ta Abeipa liata pathluana pa-eihna hnei leinazy he Awnano pitlohpazy hro a châ tyh.

5. Eima chakaona cha Khazohpa bie nahta âhmie awpa a châ.

Mara Awnano zawpi zydua ta, Abeipa liata thaphapa nata aly ngaitapa ta ypa ta, Abeipa liata hnatlâna phapa to lymâ awpa ta khokheina a hlâ.

MEC nôpawpazy he, Siaha su liata ECM nôpawpazy nahta ahmôpakhyna hnei awpa ta zâsiepa châ ei ta, hmialâ daihti liata Myanmar Sawhkhâ tawhta India chyhsa nahta azaona tao awpa ta pakhâna thata ama taopa nata India lâ liata Maw pheisaih nah zy ta India lâsie pakhâna ama hnei vâta MEC nata ECM he azaona(atlypahlaona) phapa vaw hnei khao leipa pi ta, atahmâ tawh deikua cha rairuna y khao lei awpa hawh ta hnabeiseihpa a châ zie chhao, Rev. Satu Ve-u he ta a reih.

Rev. A. Rakhai nata Machâ Zasaw zy chhao Speaker Machâ FC. Machô ta bie reina a hnei hlâta nata a hnei khai tawhta a khawna daihti liata thlahchhâna hnei awpa ta hruapa ama châ hra.

- MNN