Aung San Suu Kyi ta Rohingya Muslim-zy pabohsa awpa ta reikah a pathlie para awpa â ngiah – UN Secretary General

UN Secretary General Antonio Guterres chata Myanmar râh luhpa hawhta khizaw ta a pachâpa Aung San Suu Kyi chata Myanmar pheisaih taolana a râsaipa ta Myanmar puasaipa ta Bangladesh ngai haipa Rohingya Muslim-zy pabohsa awpa ta daihti chyu ta a hnei ha bâ, tahpa ta, Myanmar pheisaihzy hmahlana chalihsa awpa ta reikah a pathlie leipa ta a châ khiahta cha ‘chhiena rarô ypa’ a tlô bâ aw, a ta.

Antonio Guterres chata he bie he BBC ta amâ pakyhna liata reihpa ta, thlaita Suu Kyi ta reikah a pathlie para lei khiahta la "Rohingya Muslim-zy chô liata hmo a tlô awpa he chhiena rarô y chaimâhpa a châ aw" a tah hra.

UN chata Myanmar pheisaihzy hmahlana cha ‘Rohingya chipho pamuana (Ethnic Cleansing)’ a châ vaw tah ha ta. Myanmar deikua he ama hmahlana he târi 25 Thlazoh liata Rohingya Muslim riahrupazy ta Myanmar Police Post ama tlahnaona chyh-eihna a châ, avaw tah ngâkaw hra. Rohingya Muslim riahrupazy ta Myanmar Police Post, Rakhine State maw lâtapa ama tlahnao tawhta Rohingya Muslim chôta tlahnaona he â thaopâ hapa a châ.