Ama nôvah ta Jain zyhna theihthaipa ama châ khohpa vâta ama sawchanô kô 3-pa nata ama hneina sôh tlaw thysâh 100 (Crore) hlei ama siesai aw

NEEMUCH, MADHYA PRADESH:  Madhya Pradesh liata khihpi sâkha liata Jain zyhna azituhpa nôvah baokhazy chata ‘Jain Theihthaipa (monk)’ ama châ khohpa vâta ama sawchanô kô 3-ta uhtheipa nata ama sôh nata thih tlaw thysâh 100 (crores) hlei ama siesai.

Kô 35-ta uhtheipa Sumit Rathore nata a lahpinô Anamika, kô 34-zy he châthaipa rairie châ ei ta, ama khihsa chhao a pha kawpa, rai pha kawpa a hriapa châ ei. Anodeikua thlahpa lâta pihpathina amâ tlyh via hapa vâta ama zyhna Jain theihthaipa châ awpa amâ tlyh via hapa a châ. Sumit heta ama chhôhkha sôhpaliena Neemuch liatapa mohôh ta, sôhthih chhao tlaw thysâh 100 (crore) hlei ama hneipa hawhta ama chhôhkhazy chata ama rei. A lahpinô Anamika he engineer châpa ta, Hindustan Zinc Limited liata a hria tyhpa a châ hra.

Henah nôvah heta hâta heihpa liana khita ama chhôhkha nata O nata lyu zydua siesaipa ta Jain zyhna liata theihthaipa châna lâthlôh achhih pathao awpa ta târi 23, Thlarâh liana khita Surat liata Jain theihthaipa Sudhamargi Jain Acharya Ramlal Maharaj-ta â lyapangia aw ei. He alypangiana liana heta ama vaw tao tyhna dâh hawhta ama luh ngyu aw ei ta; poh râhpa abu aw ei ta, ama pakah chhao pohthladipa ta pamaipa a châ ha bâ hra aw.

Ama sawchanô kô 3-pa Ibhya cha a manô nata mapawzy hnohta siesai aw ei ta. Anamika paw, Ashok Chandaliya, Neemuch district liata BJP President parohpa chata Idhya cha a mohôh aw, a tah ha hra. Ama mapaw heta, "Ei sawchanô Anamika ta Jain theihthaipa â pazao awpa he pei tahna hnei va na," a ta. Sumit paw Rajendra Singh, Neemuch liata sykhao taopapuana a hneituhpa deikua ta a sawchapawpa ta Jain theihthaipa châ â chhuahpa he khoh tu vei.

Kô palih a khô hapa liata âhneipa, Sumit nata Anamika zy nôvah deikua he ama khotlyna kyh liana heta reikah pathlie leipa ei ta; khâchâ achalih ei ta, ama chhôhkhanah kiah liata chhao y khao hra vei ei.

Sumit heta thla hmiatuapa liana khata theihthaipa châ â chhuahna he reih ha ta. Jain zyhna ta â hnawpa hawhta a chhôhkhazy ta a lahpinô pachâna la tua awpa ta chho ei ta. A lahpinô heta âvaw pyhkheipa dei châ leipa ta, ano tlai chhao Jain chanô theihthaipa châ hr’awpa a khoh, tahpa avaw reih ha hrapa a châ. 

Sumit nata Anamika-zy heta ama sawchanô thla 8 deita a châ nota he bietluna he vaw tao ha ei ta. Athaota nota cha chhôhkha lâ tawhta kholeina pyu paro taraw hra ta; anodeikua daihti vaw sie via ta amâ pyhkhei ha hrapa a châ. Anodeikua ama sawchanô siesaipa ta he hawhta a manô nata mapaw ku liata ama soh thlâh ha awpa deikua Meenuch District Child Protection Officer Raghvendra Sharma ta cha apyh tiarâh leipa ta,  "He he hawtipa (ama sawchanô) adona tovyuh dythana nata chakhiapa a châ. Ama maophaohna arâsaipa amâ chhuah... eima pakhâ awpa a châ."a ta. He hleikhôna heta  Sharma heta Madhya Pradesh child protection commission cha he chôchâh liata a chahraoh awpa ta âhaw aw, a tah hra.