Paul Pogba ta thla 3 chhôh Football akhaih thei aw vei?

French international Paul Pogba chata thla thôh chhôh football akhaih thei leipa ta mohôh ângiah thlâh ha thei, tahpa ta Sunday Times thâtihbu chata atanoh khata palâsa ta, he thâtih he Manchester United châta cha nahthlie a ru kaw aw.

A phei liata hmahphaohpa kô 24-ta uhtheipa, United ta £89.3 million ($121 million, 105 million euros) ta Juventus tawhta ama lapangiapa he – hriaheihnoh ta Basel nahta Champions League amâ khaihna liata hmah phaohpa ta, a hmah phaohpa he pachâna hlâta a pasa viapa hawhta reipa a châ.

Pogba he hâta ei 12 rachhôh cha tlyliah kâ lâ a y chy awpa ângiah thlâh ha thei. United tawhta biepuapa ta a palâsana dâh ta, "A hmah phaohpa he pachâna hlâta a pha lei via syulyu," ama ta. He hawhta a châ nona heta Pogba hmah phaohna chhâpa he Club Training khôlâ ta ano khohta athata âvaw training tyhpa vâta a châ via pachaihpa hawhta reipa a châ hra.

Pogba he hâta ei 12 chhôh â pahâ hapa vaw châ sala, Champions League match 5 akhaih thei leipa aw ta; Premier League liata Liverpool, Tottenham Hotspur, Chelsea, Arsenal nata Manchester City ama hmiachhy tita akhaih thei hr’aw vei, tahna a châ aw. He he United châta cha  apei kaw thei aw.