Premier League : Old Trafford liata khichhaipa hawhta Wayne Rooney a kua heihna akhaihna liata United ta si 4 ama vaw paphao

Romelu Lukaku ta a Club parohpa Everton kao lâ pangiapa ta a Club thiehpa Manchester United ta 4-0 ta pahniena ama to.

Wayne Rooney deikua Old Trafford liata âkhaih heih tua chaina liata thachhie kawpa ta daihti hmâh patlôpa ta, si 4 po phaohpa ta a Club parohpa United tlyliah liata a tiamana zydua cha hraoleipa deita a châ haw.

‘Toffees’ heta Season pathao pha tu leipa ei ta. Khaih 4 chhôh cha ‘Competition’ nano nanopa liata Goal pangia mâh vei ei.

Yard 25 ta â hlapa tawhta Antonio Valencia ta Everton kaohâtuhpa Jordan Pickford patu hmâ lei awpa ta za pangiapa ta, United hmia a sah khei ta. Everton lâ tawhta United châta goal khô hluh chaipa a châ tyhpa Rooney ta daihti ryhpaohpa ei no hnei ta; anodeikua khô thei vei. Minite 9 deita a y bâ tahpa liata tlyliah puasai ta. Minute 9 chhôhta United ta Everton kaw sao ama chapie thlu pazao kaw.

Lukaku ta Henrikh Mkhitaryan khô awpa a taopa khai tawhta ano tlai ta za khô heih ta, United si palihna he Anthony Martial ta daihti piechhipa liata penalty tawhta a pangiapa a châ.

Hetana heta Opa a iekhypa United nata Manchester City zy ta ei pangawh Premier League akhaih hapa liata record alyupa hnei ei ta – City he châhnawh (Alphabet) a pazina dâh liata U - United hlâta C – City a y tua hapa vâta a chô chai liata ama y hrapa deita a châ.

Everton puasaipa ta £75m ta United â pazaopa, Lukaku he daihti hluh via chhôh cha Everton ama hmiachhyna akhaihna liana heta alâluah tu leipa ta. A club paropa a hmiachhy zâ heta Mkhitaryan khô awpa taopa ta, he khai tawhta ano ta khô heih hrapa ta ano alypa ta vaw awh tyhpa Everton fans-zy hmiakô liata a Goal he â ly hra.

Belgium international Lukaka heta United châta ei pangawh âkhaihna liata goal pangawh khô ha ta; anodeikua zâhnia ta Everton ama hmiachhyna akhaihna liana deikua heta cha daihti ryhpaohpa pha chaimâhpa a pahlei. Everton defender-zy taochheipa tawhta daihti ryhpaoh chaimâhpa a hmôpa cha kao khôtho lâ a chapie syulyu ha. Châhrasala daihti ryhpaohpa hropa a hmôpa deikua chhei khao vei. A free-kick chapiepa ta Everton Player a kei khaipa, âvaw lie heihpa cha Jesse Lingard ta vaw veipa ta, he tawhta Ball âvypa he Lukaku heta avaw khô hapa a châ. Everton Fans-zy yna dady liata a nahkao chahupa ta a goal khôpa âlypa deikua Everton fans zy châta hâhpatha â chhih kaw thei.

Zâhnia zâ ta akhaihna liana khata Wayne Rooney ta ball ei 73 vei hmâ ta; Everton Player liata Rooney hlâta Ball vei hluh viapa cha pano deita ama châ. Kô 13 chhôh United liata a y chhôhta Rooney heta Goal 253 khô hmâ ta, United lâ avaw kua heihna liata Old Trafford zawpi ta aly kawpa nata thapha kawpa ta amâ vaw ly nota deikua a Club Everton apielyu dâh vâta thachhie kawpa nata matlamala kawpa alyu kaw.

A hawti no tawhta a Club â châhpa Everton lâta Khihpa thlâpâ liata a kua heih tawhna khata Rooney heta Premier League liata Everton châta goal no khô ha ta, he Goal nopazy he Everton ta atahmâ Season Premier League liata goal ama khô chhôhpa a châ thlâh ha chy.

Minute 80-na liata Rooney he â thlapa châ ta. A rônahna nata theina âvaw phuahluahna tyhpa Old Trafford zawpi ta tlyliah a puasai nona heta ano zana palâsa n’awpa ta avaw duah khai ei ta; United Boss Mourinho ta zana ku avaw chalyu hra.

Ball Ama Tonazie