‘North Korea heta râh hropa abohna parao theipa hmo a tao pazao lymâpa ta a châ khiahta cha eima parao khai aw’ - US

Photo : UN liata US lyuhchapa Nikki Haley. AFP

US chata North Korea cha ‘Nuclear’ liata hmahlana nata Missile mopachhipa tar â hropazy abohna parao thei awpazie ta â pielyu lymâpa ta a châ khiahta la eima parao khai, tahpa ta chyhu a sathlu ha heih.

Photo credits : AFP

US nata ahrialâhpa râhzy ta North Korea apielyuna dâh kohki achhuahpa ta hmah ama lana hryta US president Donald Trump ta mylâ ta UN General Assembly hnei awpa liata biereina hnei aw ta, he hleikhôna heta Pohbie noh khita Japan nata South Korea râh luhpazy â hmô hra aw.

Trump nata South Korean President Moon Jae-In-zy cha pachyh noh khata Phone tawhta bie a chhopa ta a pachyu viapa ta Kim Jong-Un kohki lymâ n’awpa chôchâh reih ei ta, South Korea President Office biepuapa chata North Korea cha ‘a sie pasih via lymâ khiahta la raokeina lâ a ngai via lymâ aw’ a ta.

Hâta hmiatuapa hriatua noh khata UN Security Council ta North Korea cha hriena thiehpa vaw chaluah thlu ha ta – anodeikua he hriena he China, N.Korea hrialâhpa nata N.Korea Economic apahniehna ta a chyh-eih pha nata pha leipa liata â pahnieh ta; he hleikhôna heta Russia, ama râh liata North Korea chyhsa vâro tlai rai pahriasatuhpa chyh-eihna dâh liata chhao â pahnieh kaw hra aw.

United Nations liata US Lyuhchâpa, Nikki Haley chhaota mylâ ta New York liata UN General Assembly saipâna chôta reikah pathliepa ta, US nata ahrialâhpazy pachhiparyna/abohna paraopakei theinazie ta â pielyu heih khiahta la, "North Korea cha paraopa a châ aw." a ta.