Maraland Idol tahpa cha Mara Idol tahpa ta pananopa châpa ta, Mara idol 2017 ta lymâ tlaw thysy 1 a dao aw.

Zâkhania zâlâ dawh 2:00-pa kha ta Pihnô Nakho Solo (W/o Puhpa K. Chhuabei, EM, MADC) pahrâna O liata Mara Idol Organising Board(MIOB) meeting hneipa châ ta, atakô Mara Idol tao awpa chôchâh liata ahniahnipazy reina hneipa a châ. 

Meeting he Mara Idol Organising Board Vice Chairman Pihnô Nakho Solo chhihthana ry liata hneipa châ ta, meeting chata târi 12 Thlarâh, 2017, Hriaheinoh tawhta Mara Idol 2017 Registration Form rai papua awpa ta ryraopa ta, he hawhna heta Mara idol Form lapapua n’awpa su a rao - NSV Building, New Colony, Siaha.; MSO General Headquarters Office, New Colony, Siaha; MTP General Headquarters Office, Council Vaih, Siaha; MTP Branch: College Vaih Office, AOC Square, Siaha.; MHP General Headquarters Office, New Colony, Siaha tawhtazy idol Form he lapapua theipa a châ aw. 

Meeting chata Registration Form he Rs.10/- ta chalei thei awpa ta ryrao ta, Form-zy he târi 17 Phiahta, 2017, Hriaheinoh zâlâ dawh 5:00 PM hlâta pangia awpa a châ aw. Form pangia n’awpa su zy cha MHP General Headquarters Office, New Colony, Siaha nata NSV Office, New Colony, Siaha liatazy châ aw ta. Mara Idol Contest liata a pua awpazy cha kô 15 – 35 likahta uhtheipa ama châ awpa châ ta. Târi 18 Phiata, 2017, zâlâ dawh 1:00 PM pa ta MTP Hall, New Colony, Siaha liata Idol Contestant zydua nata MIOB member zy apakyhpakhyna hneipa a châ aw.

Mara Idol 2017 châta hlapipa, Theme Song châta “Mara reih palaiseihsana” lâchhâh aheihpa atlyhpa châ ta, hla ahyrai ta ama phi thei aw.

MHP General Headquarters paryhsana hawh ta Mara Idol 2017 châta atlyhpa ta tlaw thysy 1 dao aw ta; 2-na ta tlaw 75,000 nata sâthôhna ta tlaw 50,000 a dao aw.

Mara idol ataopasuana liana heta Mara reih ngâlâh hmâ pasaipa châ aw ta; Live Telecast ta piepapuapa a châ aw. He ataopasuana liana heta Marasaw, East & West Maraland tawhta ahyrai a hlao pasaipa a châ.

Mara Hlasa Py General Headquarters: Siaha paryhsapa hawhta atakô liata Idol ataopasuana châta cha Maraland Idol tahpa kha paso chypa ta "Mara Idol" tahpa ta pananopa a châ.