Nobel Peace Prize dao awpa ta Nuclear adyuhna chhaichhi pahlei awpa ta hmahlatuhpa py 'Ican' atlyhpa ama châ

Khizaw liata palyupalihna pasô a hlao chaipa, Nobel Peace Prize cha khizaw liata Nuclear pahlei awpa akhohtuhpa py ‘International Campaign to Abolish Nuclear Weapons (Ican)’ ta ama dao.

Berit Reiss-Andersen, Nobel committee chairman chata, he py hnohta Nobel Peace Prize ama hlâna chhâpa cha, ‘Nuclear hmâ pasaileina/pakhâna dâh tao awpa ta ama hmahlana’ vâta a châ, a ta.

Nobel Prize daotuh awpa atlyhtuhpa Chairman heta, "Eima daihti hmâ haipa he khahlâ zydua mopa ta Nuclear adyuhna pua thei awpa duasu liata a duah haipa eima châ," a tah hra.

Atakô Khihpa thlâpâ liana khata râh 122-zy ta UN ry liata Nuclear pahleipahlô awpa nata hmâh lei awpa ta bietaina/aryhna roh ei ta. Anodeikua he aryhna/bietaina he Nuclear chhaichhi ahneipa – US nata North Korea a hlaopa ta râh 9 zy ta roh vei ei.

Ican, py nano nanopa 10 a pazaopakhypa he kô 10 ta uhtheipa châ ta, Geneva, Switzerland liata supi hneipa ta a bôpa ama châ. Nobel Prize for Peace lymâ heta Swedish phusâ kronor ($1.1 million, £94,000) hleikhôta Medal â chakaih ta, atakô Di thlâpâ liata lymâ he hlâpa a châ aw.