Jerusalem: UN ta US President Donald Trump ta Jerusalem Israel khihpi ta a phuahpa cha a dytha haw

UN General Assembly chata Jerusalem chôchâh liata US President Donald Trump ta Israel khihpi ta avaw phuah hapa cha dythapa ta, US cha a bie vaw phuah hapa phie pakhua awpa ta a ta. UN General Assembly bietluna chata, Jerusalem chôchâh liata Israel khihpi hawhta reina cha bie yzie hnei leipa, a pyh beih lei awpa a châ, tahpa ta châ a papua hra.

Zâhnia ta UN General Assembly liata Jerusalem khihpi chôchâh liata Vote lana liata râh 128-zy ta UN Resolution ‘Jerusalem he Israel khihpi châ vei’ tahpa cha apyh ei ta, râh 35 ta Vote pathle leipa ei ta, râh 9 ngâlâhta UN Resolution he a pyh vei ei.

Kheita UN manôhzy ta Vote ama pathla?

• UN Resolution apyh leinazie ta Vote  apathlapazy he US, Israel, Guatemala, Honduras, the Marshall Islands, Micronesia, Nauru, Palau nata Togo-zy châ ei ta; râh 35 Vote pathla leipa hry liana heta Canada nata Mexico amâ hlao.
• Resolution apyhnazie ta Vote pathlapazy hry liana heta UN Security Council manôh râh 4-pazy - China, France, Russia nata UK a hlao ei ta, Muslim râh, US hrialâhpazy chhao amâ hlao hra. He hawhta a châ nona heta râh 21-zy cha he vote pathlana daihti liana heta a hlao vei ei.

Ahyzy palôhtlâh ta ahyzy palôh ma tlâh vei?

Jerusalem duasu he Israel nata Palestine likah buana liata a liamarih chaipa a châ zôzawpa châ ta. Israel heta kô 1967 khata Jerusalem nochhi lâ he a vao ta. Palestinian-zy ta East Jerusalem cha Palestine râh â dua tita ama khihpi awpa hawhta reihpa ta, a duasu dopa cha aryhna ama rei tita pasia theipa a châ aw, tahpa ta khâchâ amâ pahawh hra. Israeli ta Jerusalem a khihpi hawhta a pachâpa he khizaw râh nano nanopazy ta apyhkheina bie papua beih leipa ei ta, Tel Aviv liata râh nano nanopazy Embassy deikua ama hnei chyu. He hawhta a châ nona heta President Trump deikua ta US Embassy cha Jerusalem lâ pasie awpa ta US sawhkhâ chyhsazy a pahnosa hai.

Jerusalem Map

Israel nata Palestinian-zy ta khâpa ama reih?

Israel Prime Minister Benjamin Netanyahu chata UN bietluna cha a pyh vei ei, tahpa ta, UN cha ‘Haipa Opi’ (House of Lies) a ta.

PM Netanyahu heta bie a papuapa liata : "Israel chata President Trump cha Israel a khokheina vâta alynabie hlâ ta, Israel a châhnazie ta Vote pathlatuhpa zydua chhao alynabie a reih hra."a ta.

He hawhta a châ nona heta Palestinian President Mahmoud Abbas biephuahtuhpa chata he he "Palestine châta pahniena a châ"a ta.