Mararâh liata awnano nano nanopazy ta Krismas kyhchhihna noh 2 chhôh ama hnei tawhta atanoh lâna khata awnanopa chyh viapazy ta kyhchhihna ama pazao lymâ chy

Mararâh awnanopa nano nanopazy ta kopi kôkha chhôh ama vaw hâdy chaipa, Krismas daihti alyna cha awnano hluh viapa ta noh no chhôh kyhchhihna ama hnei tawhta atanoh lâ chhao khata Awnanopa chyh viapazy ta cha kyhchhihna he ama pazao thlâh ha chy. Atlâhpipa ta Awnanopazy heta Krismas alyna kyhchhihna châta Vao thie via chai ei ta, khih thokha liata vao nata seih thiepa ta alyna kyhchhihna pachhuahpanohpa chhao ama y hra. Awnanopa sâkha ta kyhchhihna ei kha ama hneipa liata tlaw thysy 5 hryuh lymâpa hawhta a châ. Krismas alyna daihti chhôh heta Mararâh liata hmopha leipa tlyma buana nata atymâna tlyma a tlôpa pahnopa châ vei.

Siaha Police Station liata Krismas daihti chhôhta patupa tlyma, biebua pa-aopa tlyma ama ypa ta pahnopa châ vei.

Mizoram liata awnanopa nano nanopazy chhaota noh no chhôh kyhchhihna he hneipa ta, atanoh lâ tawhna khata nohto khihsa tyhpa hawhta kyhchhihna a chalihsaipa ta amâ ngiahpa chyu ama hria pathao ha heih. He hawhta a châ nona heta awnanopa thokha deikua ta kyhchhihna he ama pazao lymâ chy hra.

Pahno theina rakha liata Kolasib District-liata Police Station 5 a ypa liata Kolasib PS-liata  Bike parupa case sâkha rohpangiapa châ ta, Bike he khihpadei zâ liata chyhsa pathôh ta Garage tawhta parupa ta, meter 100 rachhôh ama nâ tawhta hroh thei leipa ta, YMA Duty-pazy ta patu awpa amâ chhuah nota â râ ei ta, zâhnia khata ama hryta pakha patupa a châ tawhta biebuapa taopa châpa ta Magistrate pahnokheina ta Kolasib Dist Jail-liata sopa a châ. 

Bilkhawthlir PS-liata duty-pazy ta Buhchangphai liata O sâkha liata phusâ parutuhpa pakha cha Krismas noh khata patu ei ta, biebuapa taopa a châ tawhta Kolasib District Court-lâ paphaopa ta, Dist Jail-lia patâhpa a châ.

Kawnpui PS-liata satlia panozy Bike parutuhpazy cha biebuapa pa-aopa ama châ tawhta Bike hneituhpa nata Bike parutuhpazy ta ama su paraopa ahluahtheipa a hneituhpazy amâ paryh theipa vâta biebuapa he siekhei pazaopa châ leipa ta, he leipa biebuapa hropa a ypa ta pahnopa châ vei.