Mizo Chief Council-ta India sawhkhâ cha hlâno daihti liata ama biehneina piepakhua awpa tlyma chârithôna (compensation) châta tlaw thysâh 509 (Crore) pie awpa ta Supreme Court liata â kho

NEW DELHI : Mawrâh liata bei pathla, abei avaw châ tyhpa (Chief) sahlao apazaopakhypa py Mizo Chief Council chata India sawhkhâ cha hlâno daihti tawhta amâ beina râh, ama biehneina râh liata ryureina tlokhuh pie heih awpa ta tlyma kô 1954 liata sawhkhâ ta amâ beina râh a lapa zydua chârithôna (compensation) tlaw thysâh 509 (crore) pie awpa ta Supreme Court kô ama tlôkhei.  Hlâno daihti liata abeizy heta ti nata râh hneipa ta, ama khihsawzy tawhta chhie vaw khei tyhpa ta, ryureina vaw siekhei tyh ei ta. He zydua he kô 1954 liata abeina pachhâsapa a châ tawhna khata tlokhuh ama pahlei khai hapa a châ. 

Kô 1895 liata British biehneina ry liata Lushai Hills avaw y tawhna chhao khata British sawhkhâ khata abeizy he vaw za kaw ta. Amâ beina pachhâsa thlâh ha leipa ta India râh hropazy hawhta ‘Princely State’ hawhta biehneina khachâ rakhama avaw pie thlâh ha chypa ei a châ. 

Hlano beinah nohthlah parohpa

India ta British tawhta khotalaina a hmô tawhta kô 1951 liana khata Lushai Hills (he heta Mararâh chhao a pahly khai) Assam State ry liata baipa vaw châ ta. Kô 1951 liana khata Assam Autonomous (Constitution of District Council) Act cha hmâpa vaw châ ta. He dâh ry liana heta Lushai Hills â hlaopa ta Autonomous District sâcharu taopa vaw châ ta. Kô thôh a khô tawhta Assam Lushai Hills (Acquisition of Chiefs’ Rights) Act cha taopa vaw châ heih ta, he biehneina hmâpa heta sawhkhâ ta abeizy biehneina cha pachhâsapa ta, kô 10 chhôhta abeizy ta chhie ama nie awpazie cha reipatipa ta chârithôna (compensation) hawhta avaw piepâ khai ha hra.

Noh nata daihti vaw khô lymâ ta, sawhkhâ ta chhiekheina kyh liata ama biehneina zydua tlokhuh a lapa khai ha tawhta cha, hlâno daihti liata ama ti nata râh tawhta chhie, nie tiah lei bawh tiah lei a hnei tyhpa, sawhkhâ ta ama biehneina a pachhâsa hapa vâta tao theipa a hnei khao leipa, Lushai Hills liata abeizy cha ama duasu, khihsana a hnai via lymâ haw ta. 

Kô 1999 liana khata Mawrâh liata abei nata ama pathlazy apazaopakhypa py (Mizo Chief Council) chata Prime Minister hnohta châ paphaopa ta, amâ beina râh ama pahlei hapa vâta nata ama biehneina, ama ti nata râh tawhta chhiekhei theina biehneina ama pahlei hapa vâta sôhthih ama pahlei hapa zydua vyuhpa ta chârithôna (compensation) châta tlaw thysâh 509 (Crore) pie awpa ta ahaw ei ta. 

Mizoram sawhkhâ chhaota Supreme Court liata châ pangiapa ta, Mizo Chief Council-zy ta amâ hnawpa he amâ pyhkhei, tahpa palâsapa ta, he hawhta a châ nota deikua sôh amâ hnawpazie patloh awpa deikua ama rairukhei aw, tahpa ama palâsapâ hra. He vâna heta Mizoram sawhkhâ chata he Compensate sôhthih he Centre sawhkhâ ta a pie awpa a châ, tahpa ta Mizo Chief Council vyuhpa ta dâhpahnopa aduahpazy – Kedar Nath Tripathy nata Lalremasanga Nghaka-zy chata ama reih.

He hawhta a châ nota Mizo Chief Council chôchâh liata chyh-eihtuhpa miathôhna Ministry of Defence chata, he biebuapa he Mawrâh state sawhkhâ biehneina ry liata a ypa a châpa vâta Compensation he pie awpa avaw châ hapa chhaota Mawrâh sawhkhâ ta a pie awpa a châ, vaw tah ta. 

Târi 17 Phiapi 2017 khata he chôchâh he Supreme Court bench, Justice B Lokur chhihthana ry liata atyuhpa hmiakô liata phawpa châ ta, he Bench heta he biebuapa chôchâh liata Centre chyh-eihna â ngiachhih haipa ta, Centre lâ tawhta chyh-eihna deikua y mâh vei. 

He chôchâh he târi 4 Nawh 2017 liata Justice Lokur chhihthana ry liata pachia heih awpa ta tahpa a châ.

- TOI