MAWRÂH LIATA PUBLIC SERVICE PEIMAWHPA- MIZORAM POLICE SERVICE

- Beimosia Lapi, MPS.

Biehmia: North Eastern Police Academy (NEPA), Barapani, Shillong kiah liata Northeast Police Officer training eima hnei ngâhai no ta, eima vaih Awnanopa Lyuhchâpa mohhôhtuhpazy ta, Mizoram Police Service (MPS) chôchâh nata a exam-na dâh article roh awpa ta na vaw chho ei ta, ei ly ngaita kaw. Anodeikua Abeipanoh article châta cha Khazohpa bie he eima reih via chaipa a châpa vâta he article he Abeipanoh papua awpa ta â hmie ma, hmie vei ma? tahpa pahno thai va na. Chavâta ahmiatuata nama pahnothaina ei châ hawh ei. Kao nanopa lâta deikua atahmâhlâ sawhkhâ raih phapa hmô aruzie pahnothaipa ta achuhaipa thyutliapazy liata pahaona tao via lymâ awpa nata cha hawhpa lâsiezy â pahnosa via lymâ awpa a peimawhzie pahno thaipa Lyuhchâpa mohhôhtuhpa eima hneipa he aly â chhih hmeihseihpa ta ei pahno. Keima mopakhapa chhao Awnanopazy thlahchhâkheina nata Abeipa ngiachhiena vâta, Mizoram Combined Competitive exam 2014 siepahliepa ta MPS liata hlaotlohna ei vaw to hrapa vâta aly hmeihseih na ta, he article siepahliepa heta Abeipa nata Awnanopa sahlao zydua chô liata alyna bie ei reih chanei.

Mizoram Police Service (MPS) cha khâpa maw? MPS he Mawrâh State liata Public Service Group ‘A’ Gazetted Officer raih zachhihpa nata phapa sâkha châ ta, ama raih hria chaipa achyuhna zieta cha kao totie liata State chhôh liata hmahsiena thatlô kawpa a y thei nawpa ta ‘Law and Order’ a pha thei chaina dâh hawhta pa-ysa ta, zawpizy thlahlôh kawpa ta pa-ysapa he a châ. Chavâta râh chakaona rai liata rai peimawh chaipa sâkha a châ tah lei thei’pa châ vei.

MPS liata angia na dâh: MPS liata angia awpa heta Competitive Exam pachhuah-panoh tyhpa châ ta, pachhuah-panohtuhpa cha Mizoram Public Service Commission (MPSC) a châ. Post a rua dâh reizie ta nata Mawrâh sawhkhâ sôh dua su reita MPS rai he lapa a châ tyh. Zâkô 2014 liana khata post 10 lapa a vaw châ heih hra. MPSC ta written nata interview hmâpa ta atao pha chaipazy cha Mawrâh sawhkhâ lâta recommendation pangia ta, y cha hawna chata sawhkhâ ta appointment a vaw tao tyh. Appointment order piepa a châ khai tawhta Police Officer thiehpazy cha North Eastern Police Academy (NEPA), Shillong kiah liata kô 1 daihmâ tlai Basic Training piepa châ ei ta, atlâhpipa ta Probation ta kô 2 ama hria khai tawhta Permanent Posting piepa ama châ tyh. He hawhpa ta MPS liata angiapazy he ‘Direct Recruit’ tahpa châ ei ta, Inspector lâ tawhta promotion ta MPS a kaw ngiapazy he ‘Indirect Recruit/Promotee’ tahpa ama châ hra.

Mizoram Police Officer hierarchy tlâhpipa: Atlâhpipa ta Mawrâh liata MPS Officer nahzy ta post ama pazao tua chainazy cha Deputy Superintendent of Police (Dy.SP)/Sub-Divisional Police Officer (SDPO)/Assistant Commandant, IR Battallion, zy he châ ta, Dy.SP ry liana heta Inspector, Sub-Inspector, Assistant Sub-Inspector, Head Constable nata Constable zy ama za y heih hra. Mawrâh liata MPS Officer post nata State Police Officer hierarchy tlâhpipa cha ary liata palâhsapa hawna heta a châ:

Dy.SP.  = Deputy Superintendent of Police
Addl.SP = Additional Superintendent of Police
SP  = Superintendent of Police
AIGP = Assistant Inspector General of Police
DIG =  Deputy Inspector General of Police
IGP = Inspector General of Police
ADGP = Additional Director General of Police
DGP = Director General of Police

 DGP he State chhôh liata Police molai chaipa châ ta, Senior Indian Police Service (IPS) Officer tovyuh ta raopa a châ. Atlâhpipa ta MPS Officer Direct Recruit nahzy he âsâhna lâta DIG tlyma IGP ta tlyma pension ei ta, henawh rank chô lâtapazy cha IPS Officer Direct Recruit nahzy tovyuh via hawhta raopa a châ hra. India sawhkhâ ta apasaipa hawhta Senior MPS Officer nahzy hry liata service record hneiphapazy cha IPS lâta confer-pa ama châ lymâ hra. Marapa MPS Officer hmia tuapa Pupa K.Amon (L) chhao kha AIGP tlô hmâ ta, maniah hrolâh parei via mawh sala IGP a châ leipa chhaota DIG chhâ cha a kiah hmâ nahta hnabei