MLt TOP 5 NEWS OF THE YEAR 2017 : Kô 2017 chhôhta Mararâh liata hmo a tlôpa nah charaoh viapa 5-zy

5.  11th Term MADC Atlyhna liata INC ta Seat 25 liata Seat 17 lapa ta pahnie kawpa ta sawhkhâna a tao 

Târi 4th Patô 2017 ta 11th term MADC General Election châta Vote pathlana hneipa châ ta.  Vote tla pha kaw ta, MADC Election e-roll bu liata â lâna liata cha vote hneipa zydua chyhsa 37,254 châ ei ta, he hry tawh heta chyhsa 31,402 zy ta vote pathla ei ta, vote pathlapa zydua 84.29 % a châ.

Sawhkhâ haipa INC ta pahnie kawpa ta sawhkhâna tao heihpa ta, Seat 25 liata Seat 17 lapa ta, Coordination (MDF+MNF) ta Seat 7, Independent ta Seat 1 lapa ta, a eikha n’awpa ta BJP chhaota Candidate hneipa ta, anodeikua BJP tawhta atlohpa y tlâ vei ei.

11th Term MADC liata a pahniena â sâh chaipa cha Siaha East-II (Siahatlâh) liata Coordination Candidate Puhpa HC Biakcheuva ta 10th Term MADC liata Chairman a châpa Puhpa LC Chakhai, Vote 505 ta a pahniepa kha châ ta; a pahniena chyh chaipa liata Siaha North-II (College Vaih-II) liata Puhpa V. Vanhupa – INC  ta Coordination Candidate nata biatuhpa MDC a châ haipa Puhpa C.Lawbei Vote 6 ta a pahniepa kha a châ.

4. Kô 21 ta uhtheipa Maraland Democratic Front (MDF) pahleipa ta BJP lâ amâ pahlyh

Kô 2017 chhôhta Politics liata hmo a tlôpa lai chaipa hrytapa miakha châ awpa ta kô 1996 liata paduapa Maraland Democratic Front (MDF) chata ama Party moh MDF pahleipa ta, târi 26, Phiata 2018-pa khata MTP Hall, New Colony, Siaha liata BJP lâ amâ pahlyh haw. Mara chipho moh a phaohpa Party a y chhôhpa MDF ta BJP lâta amâ pahlyhna noh liana heta Mizoram BJP President Dr JV Hluna nata ahrialâhpazy ta Aizawl tawhta a kaw hmâkheipa ta; Mararâh su nano nanopa tawhta MDF manôh vâro ta he daihti he amâ kaw hlao.

3. Lôpu - Siaha Sumo a piepasipa liata chyhsa 4 ta hrona ama pahlei

Kô 2017 Krismas nata kô 2018 kôthieh vaw tlô awpa hâdypa ta Mararâh â chhuahnoh hai nota bie rarô ypa, a piepasina rarô ypa a tlôpa liata chyhsa 4 ta hrona ama pahlei.

Târi 14, Di 2017 zâ 7:30 rachhôh lianakha ta Lôpu khih tawhta Siaha pangaipa ta a kaw siepa Lôpu-Siaha Sumo Service cha ABC Home kiahpâh, PWD Road Short-cut liata apiepasi ta, chyhsa pa 4 zy ta hrona ama pahlei.

Ama accident-na su he Thlahchhâna su tawhta Short-cut lâthlôh akaw siepa, ABC Home kaw tlô chy liata achakhâ chaina su liata achâpa ta pahnopa châ ta, Sumo liata chyhsa pahrawh hleithôh(13) ama kia vâta Sumo ta pahnie leipa ei ta, âkhao khei ha ei a châpa pahnopa a châ. Driver he azaw pathlah hmâ ha ta, âboh kawpa ta hmôpa a châpa hawh ta biedaopa a châ. Mo hropa zydua deikua Sumo cha ta akhao khei khai eita, thokha chatho pathlahpa ta y ei ta, thokha deikua cha Sumo âtâh-na chahaoh su liata hmôpa ama châ.

Ama motor kiapa ha Puhpa H. Lalhluta Sumo a châpa ta pahnopa châ ta, Christmas daihti zy âhnia hapa vâta Siaha lâ kaw Bazar awpa ta a kawsiepa ama châpa ta pahnopa châ ta, amâ cha-ie kaw tarawpa ta, lâsiezy a sâh kaw vâta he Motor liata amâ hnaohpa hawh ta bie eima dao.

Hrona  a pahleipazy -

1. Pihnô HT. Siapaw, kô 58

2. Pihnô HV. Naki, kô 48

3. Laihsa VT. Beihneingia, kô 30

4. Hawtipa H. Lalawmpuia, kô 15

2.  Mara Idol 2017 Merina Hlychho, Vahia

Mara Idol 2017, Mararâh liata Reality Show lai chaipa cha zâhnia zâ khata Khaihra Memorial Hall, New Colony, Siaha liata Grand Finale hneipa châpa ta, Mara Idol 2017 Top 3 – Beihrochhitha Azyu, Andy Vabeikhai Bôhia nata Merina Hlychho-zy ta ataopasuana hnei heihpa ta, Merina Hlychho he atakô Mara Idol châta atlyhpa a châ hapa a châ.

Idol Merina Hlychho heta tlaw 100000 hleikhôta hmo nano nanopa dao ta. Fridge hleikhôta Techno Cell, Cellworld Mobile daoh ta ama piepâ hra. He hleikhôna heta Merina Hlychho he Top 5 liata a tloh nona khata ama khih, Vahia VCP ta ama khih liata a kho chaina su liata O hmo â mo awpa ta bie âvaw taih ha hra.

Mara Idol 2017 Merina Hlychho he hawti kaw chy ta. Atahmâ he GHSS, Siaha liata Py 11 âchuhaipa ta, chyhsa  a pasâhsa chaipa cha hlasathaipa nata hlaphithaipa châpa ta, Mara hlasathaipa hry liata Mara Idol 2017 Judge hryta pakha, Puhpa John Beizachhi Phuto a pasâhsa chai hra.

1.MCHP hmahlana vâta State Bank of India (SBI) Siaha Branch thiehpa eima hnei ha bâ aw

Kô 1983 liata paduapa, State Bank of India (SBI) Siaha Branch he âduah thaota no tawhta Mararâh zawpi ta eimâ daoh chaipa nata sôhthih âsopa chhao ama hluh chaina Bank châ ta. He vâna heta adaohtuhpa hluh ei ta, â cha-iechahmy ta; Mararâh su nano nanopa tawhta he Bank âdaohtupazy ta zawpi a cha-iechahmyna vâta nata zawpi hluhtu hapa vâta noh hluhpi chhôh daihti nata noh hryuhpa ta Siaha liata ama châh awpazy â ngiah tyh. He hawhta a châna bailai ta, zâkô Phiapi târi 8-liata Rs.1000 nata Rs.500 note thiepa vaw châ ta, Cashless Economy Drive siekheipa a châ tawhna chhochhi khata cha Bank nata hriatuhpazy heta zawpi, âmo âdaohtuhpazy he mohôh pahnie khao vei ei, tahpa cha eima pahno chyu. He thota, zâkô kôchhâna lâ tawhta Sawhkhâ raihriapazy ta Bank tawhta hlao ama la hapa vâta hlao la awpa ta Bank liata noh 2/3 taihta â patlâh awpa angiah ta; he he zawpi châta rairuna lai kawpa, nohto khihsana taihta patypamâtuhpa avaw châ hapa a châ.

SBI Siaha Branch heta Mawrâh liata District hropazy liata Branch-zy hlâta Customer pazai pachaih ta. He he achhâpa cha Mara Autonomous District Council (MADC) staff SBI siepahliepa ta hlao a lapa deita he hmahta chyhsa 2000 hlei châpa ta; he hleikhôta Lawngtlai District khih hluhpi ta SBI Siaha he amâ ngiapâ hra. He vâna heta zawpi kho akhileina nata adaihti ta liata sôhthih lapapuana nata pangiana kyh liata rairuna athata a tlô tyhpa a châ. SBI daohtuhpazy ta rairuna amâ tyhpa he Siaha District liata py nano nanopa hleikhôta MADC ta chhao ei hluhpi SBI biehneituhpazy adaohpa ta, ama rairuna tlôkhei tyh hra ei sala, hmahlana hmeiseihpa deikua y tyh vei.

He vâna heta zawpizy rairuna pathlâpazi awpa ta M.CH.P Gen.Hqrs ta târi 14 Khihpa 2017 khata SBI Siaha Manager nata Deputy Manager-zy cha hmo yzie reikheipa ta, Thlarâh thlâpâ 2017 tawhta Branch thiehpa pahychhi awpa ta hmahlana khâpa hmahta a y leipa ta a châ khiahta Phiata 2017 tawhta daihti bitaipa y leipa ta SBI Siaha Branch Office pakhâ awpa amâ chhuah tahpa ama hyutuhpazy lâta tlôkhei awpa ta ahaw ei ta. Press Statement hleikhôta Memorandum taihta taopa ta ama hmahlana he amâ chadaipazipâ lymâ hapa a châ.

He hawhta SBI biehneituhpazy lâ taihta biesakâvawpa ta, Branch thiehpa pahy awpa ta biechhâna taihta ama tao tawhta chhaota hmahlana hmeiseihpa a y leipa vâta, MCHP Gen hqrs chata târi 3 Phiata 2017 tawhna khata daihti bitaipa y leipa ta SBI Siaha Branch Office kiah awpazy pakhâpa ta, hmah ama la hapa a châ. Ama hmahlana chhao thlaita hlaotlohpa ta, kô 2018 liata Siaha ta SBI Branch thiehpa a hnei bâ aw.

MCHP heta Mararâh châta hmahlana nano nanopa vaw siekhei ha bâ ei ta. Mararâh ta â ngiahpa nata peimawhpa dopa liata ku vaw pathlapa ta, amâ pôhkhana nata hriaparaohnazy he Mararâh liata py hropazy châta amopâtlâh ama châ kaw. Kô 2014 liana khata Siaha District liata hawsaihpa thina (IMR) â sâh tu hapa vâta Mawrâh sawhkhâ hnohta hawtipa dawhty (Pediatrician) soh awpa ta avaw hnawpa ta lâthlôh taihta avaw chhih ha heih ei ta. He liana chhao heta hlaotlohna hmô heihpa ta Padiatrician deita châ leipa ta, chanô dawhty Gynaecologist taihta ama kaw sohpâ hapa a châ. He hawhta py thatlôpa nata ‘Râh Issue’ dopa pahno ta, riahpha kawpa hmahlapa he eima râhta â ngiahpa a châ hmeiseih.