Tamil Nadu khihliah liata Dalit chipho chyhsa pakha thietuhpazy cha thi awpa ta ama chôchâh pachiapa a châ

Tamil Nadu liata ‘Chipho zachhihna pabohsa khohna vâta lianycheina (Honour Killing)’ rarô y kawpa liata Dalit chipho chyhsa pakha thietuhpa chyhsa 6-zy cha thi awpa ta ama chôchâh pachiapa a châ. 

Dalit chipho satlia, Sankar, kô 22-ta uhtheipa chata Hindu pho liata pho phapa, phosopa laihsa lahpinô ta a hneipa vâta nohchhôh sawvaw, khiliah liata zawpi amâ hôh chheih nota chyhsa ta tlahnaopa ta thie ei ta. Sankar ama thie nona heta khiliah liata ahlaihlâpa zawpi ta pachha achhuah leipa ta ama moh thlâh hapa hawhta reipa châ ta. Lianycheituhpazy he Bike ta amâ râpâ ha heih.

Photo : Sankar lahpino chhao hmah athata a phaoh hra

Hindu phôhryhpa liata chipho â hnai chaipa Dalits-zy he khahlâ via no chhochhi ta cha ‘Hria pathaih leipa/vei pathaih leipa’ (Untouchables) tahpa ta pahnopa châ tyh ei ta. Hindu Chipho pachhaihna (Caste System) liata â hnai chaipa ama châ. 

Sankar thie awpa ta hmahlatuhpa he a lahpinô paw châ ta. Ano he Police ku liata â pie hapa ta, Court ta thi awpa ta a tahpa hryta â hlao.

He lianycheina biebuapa liana heta chyhsa pahrawhhleikha chôchâh pachiapa châ ta. Chyhsa pacharuzy cha thi awpa ta tahpa châ ei ta; chyhsa pakha hrochhôh â tâh awpa ta tahpa châ ta, a hropazy cha kô pangawh lô-O â tâh awpa ta hriepa ama châ hra.