Pa-ôpazy - Cancer

Athaipazy ta ama reipa (research pitloh hmeiseihpa deikua tao khaipa châ mâh thlyu aw vei) liata, eima râh liata cancer pasana hluh via zydua he paôpazy taopa vâta a châ ei aw.

Chyhsazy ta âmo cheingei ta ama tao leipa chhaota, ama lapinô tlyma, amâ vahpa tlyma, chhôhkha liata ama pahrâlâhpa ahy tlyma ta ama tao khiata cha, a tao leipa chhao kha cancer hri ta a kia thei hrazie hmôpapuapa a châ haw. Amo cheingei ta a taopa chhochhi cha cancer hri iah a la theina (risk) â sâh ngâsâzie hmôpapuapa hapa a châ. Aomâ tawhta taopa châhnamei, sâdâ, karaoti, khaini nata ahropazy dei châ leipa ta, kuvâ chhao he cancer hri a tlôkhei theipa a châ hra. Athaipazy ta ama hmôpapua hapa he thotlâhpaw bie ei ta, "Châ bao aw vei, pa-ôpazy a tao leipa chhao cancer ama vei thlah ha hra bao na" tah chakhyh thai awpa châ khao vei.

"Châ bao aw vei, pa-ôpazy a tao leipa chhao cancer ama vei thlah ha hra bao na" tah chakhyh thai awpa châ khao vei.

He hawhta hri chi chhih ngaitapa a tlôkhei theipa a châzie nata Marapasaw hluhpi chhâ a palo leipa ta maniah a thie ngâpa a châzie pahno thlah hana chôta, ngiapâ leipa (Krizyh leipa) zy ta hmahta hmo pha leipa a châzie pahno ei ta, tao leipa ta ama y ngâ nota, Krizyhpa â tahpa Marapa hluhpi ta paôpazy ama tao chhai ngâ thlah hapa he khâpa ma a chhâpa a châ aw tly?

1. Ama pipathi hmeiseih leipa vâta ma a châ aw?

2. Sona amâ phahlapa vâta ma a châ hri aw?

3. A iah ta a zai hapa vâ ei ta ama bâsai thei ngâsâ khao leipa, ama lapi/vahzy panôhmeisa/papawhmeisa awpa nata ama sawzy paharasa awpazy pachâna taihta hnei thei khao leipa ta, thi riah chhao ama chi khao leipa cha ma a châ ha aw tly?

Cha hawh ei palôh rie thei tyh rima bao cha. Marapasawzy pi, khâpa hropa vâta châ leipa ta, paôpazy tlai ta maniah a thie ngâ thlah hapa he la, ei pachâ tupa ta â mô chhao a mô thei khao tyh va na.

- Rev Dr LaiU Fachhai