CARROT, AWHTI NATA COFFEE BEAN PHÔHPA

Nohkha cha laihsa hawti kaw chypa heta a nô kiah liata liahsa âtyuhpa ta, a hro a kaw hmâ laina dâh nata rairuna â kaw tyh laina dâh zy he vaw chho ngâkaw ta. A hro riethei kawpa cha kheita ma taopathi aw ta, apahuapatlâ aw, tahpa apahno leipa vâta ahnabeidyna zie zy cha reih ta. Hrozô lâthlôh â kaw chhih laina liata rairuna chatôhpa nata tei hnolopa cha a hoh khao leina zie a nô cha chho ta. Rairuna sâkha a pathlâpazi patawnah ta rairuna hropa âvaw luah ha heihna dâh zy cha a nô cha chho lymâ ta.

A nô chata chôkâh lâ â chhi ta. Beih 3 liana heta ti chhohpa ta, mei cha âkhothai kawpa ta paduapa ta, beih 3-zy cha khaih ta. Ti cha thlaita âvaw tlaopâ ha ta.

Beih 1-na liana chata Carrot thla ta, beih 2-na liana chata Awhti thla ta, beih 3-na liana chata coffee bean thla heih ta.

Reikah pathlie tlâ leipa ta ti zy cha patlaosa ta. Minit 20 rachhôh â tlao ha bâ aw, tahpa liata mei cha thie ta. Carrot cha beihkoh liana heta sipapua ta. Awhti cha thaopapuapa ta beihkoh liata soh heih ta. Coffee bean chhao cha lipapuapa ta, beihkoh liana chata soh heih hra ta. A sawchanô cha mohpa ta, "Khâpa e na hmô na vaw chho tua?"tahpa ta hiahrih ta.

"Carrot,Awhti, nata coffee," tahpa ta a sawchanô chata âvaw chhy ta. A nô chata beihkoh liata Carrot cha a ku ta hmie awpa ta tah ta. Cha hawhna chata tao ta, Carrot cha avaw nai khai ha, tahpa pahno thei ta. Cha khai tawhna chata Awhti cha la ta, pakei awpa ta chho heih ta. Awhti hyhkua âkhie khai tawhna chata, awhti cha âvaw patloh khai ha, tahpa hmô heih ta. A chhâ chaina liata Coffee cha doh awpa ta chho ta. A sawchanô cha kaw pakie ta, Coffee rohiah pahâh kawpa chata palysa leithei vei. A nô kheina chata, "He he khâpa maw a yzie?"tahpa ta hiahrih haw ta.

A nô chata, he hmo miathôhpa zy he rairuna alyupa - ti â tlao ngâpa ama chatôh chyu - châhrasala, ama chyh eihna dâh alyu tlâ vei. Carrot he ti liata eima thla hlâna khata châ (hard) kaw ta. Anodeikua, ti â tlao ngâpa liata eima thlana ta deikua, vaw nai ta, a chieh lei ngaita kaw bâ.

Awhti he dahdie kaw ta. A hyhkuah â pa kawpa heta a chhôh liata ti-âpa zy cha apabohsa chyupa châ. Châhrasala, ti â tlao haipa liata âpachie liahsa tawhta deikua, a chhôh liatapa cha avaw châ haw! Coffee bean-zy he ama hmi mohta heih nawh âtlu hra vei sala, ti âtlao ngâpa liata eima thlana ta deikua, ti taihta ama panano khai hapa a châ.

"Akheihawhpa khi ma na châ?" tahpa ta asawchanô cha hiahrih ta.

"Rairuna zy ta na Ochhi ama vaw chakhyhna daihti liata kheita e na chyh-eih? Carrot ma na châ? Awhti ma? Coffee bean maw?" tah haw ta.

Khi hawhna pyly khita keimo he zaw : Kheihawhpa e eima châ? Carrot hawhta tlô hmi kawpa, anodeikua, pasana nata rairuna ei tyhna daihti liata hnabeidypa ta, thatlôna rai ta a hnei khao tyh leipa ei châ ma? Awhti hawhta dahdie kawpa hawhta â lâ ta, rairuna â sâh viana zie lymâ hawhta riahpha kawpa ta a hmiachhy tyhpa maw? Cha leipa ta, Coffee bean hawhpa he ma ei châ? Coffee heta cha ti, â tlao ngâpa, ano ama thlana cha a ytuzie zydua panano ta. Ti a vaw sah hmeiseihna daihti liana tlai chata arohpahâhna cha apapua hapa a châ.

Coffee bean hawhpa he na châ khiahta cha, rairu tymâna daihti liata na chheipâh ziza na panano thei aw.

Rairuna lai kawpa nâ tyh tita, hetana heta ahiahrih tyh ma y : Carrot ma na châ ma, Awhti ma, Coffee bean maw?....