Orissa liata paw pakha ta a sawnah ta ama O ama tly hluh via thei n’awpa ta anodeita lâthlôh Km 8 ta pasihpa a chao

Orissa liata paw pakha chata a sawnah siku kiahpa zy ta ama O nata lyu ama vaw tly para thei ngâthlâh ha n’awpa ta lôtu (Pick Axe) nata thuatlai deita hmâpa ta lâthlôh Km 8 a chao.

He chyhsa, Jalandhar Nayak, kô 45 he thotlâh chakichabâ kawpa liata pahrâpa châ ta, a sawchapaw pathôhzy cha ama pahrâna tawhta km 10 rachhôhta â hlapa liata siku ama kiah.

Lâthlôh a y leipa vâta a sawnah heta ama o vaw tly awpa ta dawh 3 chhôh pheita ama sie awpa a ngiah tyh ta, he vâna heta ama o he âmo châta cha vaw tly para ngâthlâh ha awpa chhao a rairu ngaita kaw tyh. He hawhta Nayak ta lôtu nata thuatlai hmâpa ta km 8 duata pasihpa lâthlôh a chao tawhna heta sawhkhâ ta lâthlôh he ama tao pazao aw, tahpa ama phuah ha.

Nayak heta lâthlôh chao awpa heta kô no tlai ryu ta, mychareih lôtu nata thuatlai a cheipa ta, lôthih hawh tlupo ta a chhia rairupa he nohkha ta dawh charie chhôh tlai a buakhei tyh. Nayak heta lâthlôhzy avaw pha ha khiahta cha a sawnahta hâta chhâna lâ maihta ama O ama vaw tly thei ha hra aw tahpa â hnabeiseihnazie a reih.

Sawhkhâ ta lâthlôh ama vaw tao khiahta cha Nayak sawnah siku yna khih nata ama khih cha a nao kawpa ta amâ siepahlie thei ha bâ aw, tahna a châ. Sawhkhâ chata Nayak he lâthlôh a chhiana lymâ ama pie aw, tahpa ama phuah ha hra.

Nayak chata sawhkhâ ta lâthlôh ama vaw patlô awpa vâta âlyzie a rei raohpa ta, sawhkhâ cha ama khih liata dôhlatha nata ti pie awpa ta âhawpânazie a reih hra.

Lâthlôh a chao nona heta sawhkhâ baona âhaw beih vei, tahpa ta, ama khih thâtihbu ta a hmotaopa ama palâsa tawhta ngâlâh sawhkhâ ta a pahno hrapa a chânazie  a reih hra.

Ano apakyhtuhpa thâtihbu chyhsa pakha chata, "Lâthlôh a chao nona heta thokô sâkha ta hmahta thlu vei tahpa ei hmôpa heta eina pahnie hmeiseih”a ta.