MFA Cup 2018 : Siaha United FC nata Lunglei DFA 1-1 ta amâ pahniethai - Siaha ta hnabeiseihna ama hnei chy

Mamit liata Mizoram Football Association (MFA) Cup 2018 akhaih haipa liata Siaha United FC ta 1-3 ta akhaih tuapa liata Kawrtethawveng FC ama pahnie lei tawhta atanoh khata Lunglei DFA vyuhtuapa Lunglei Bazar Veng FC cha 1-1 ta amâ pahniethaikhei.

Amâ khaih tua chaipa liata Siaha United FC heta atlôtuhpa Mamit vyuhtuapa Kawrtethawveng FC cha vâduachhih kawpa ta 1-3 ta pahnie leipa ei ta; anodeikua tanohta Lunglei Bazaar FC ama hmiachhyna akhaihna liata ataopathipa ta, Kawrtethawveng FC hlâta pha via awpa ta pachâpa, Lunglei Bazar FC he 1-1 ta amâ pahniethaikhei. Siaha United FC heta thapi phiapa ta Lunglei he hmiachhy ei ta, tlô cheingei awpa achhuahpa ta teipa ta, goal khô theina daihti ryhpaohpa chhao ei 3 tlai hnei ei ta, anodeikua vâduachhih kawpa ta pangia thei vei ei. Daihti chhâ ta, 1-1 châpa ta, khaih 2 tawhta point 1 ama hlao papua.

Lunglei Bazaar FC goal he PC Lalruatsanga ta a khôpa châpa ta, Siaha United FC goal he Lalrimawia Sailo ta a khôpa a châ hra.

Akhaihna hropa liata SIaha United FC pahnietuhpa, Kawrtethawveng FC cha 3-0 ta Champhai FC ta ama vaw pahniepa vâta Siaha châna heta Semi Final a ngia thei awpa ta hnabeiseihna a hroh thlâh ha chy.