Champions League Semi Final 2nd Leg : Real Madrid ta 4-3 ta pahniena topa ta final amâ ngia ha heih

European champions a châ haipa Real Madrid a ei thôh n'awpa ta Champions League final â ngia awpa ta Bayern Munich cha semi-final second leg mopha kawpa liata ama pahnie.

Allianz Arena, Munich, Germany liata Real Madrid heta Bayern Munich he 2-1 ta vaw pahnie ha ei ta, 2nd leg akhaihna, Real Madrid tlyliah Bernabeu liata Bayern heta Final a ngia awpa ta pahniena ama to cheingei awpa â ngiah; châhrasala thapi phiapa ta tei taraw ei ta, 2-2 ta a pahniethaipa ta, Real he 4-3 ta aggregate pahniena topa ta, final amâ ngia hapa a chã.

Joshua Kimmich ta German champions Bayern châta hmia a sahna khô ta, he he Real châta Karim Benzema ta Marcelo tawhta ball avypa, a luh ta supangiapa ta a zâ pasu pakhua.

Benzema pyly avaw luah heihpa ta, Bayern kaohátuhpa Sven Ulreich taochheipa pachhaipa ta za khô heih ta, Real hmiah â sahkhei heih. Bayern lâ tawhta Real tawhta loan ta a pua haipa James Rodriguez ta â zâ pasu hrasala, daihti chhâ ta, 2-2 ta a pahniethaipa ta, 1st leg nahta pahlypa ta 4-3 ta Real he ama tlô hapa a châ.

Bayern heta daihti ryhpaohpa cha hnei hra tlai ei ta, Corentin Tolisso nata Thomas Muller zy chapiepa Keylor Navas ta avaw pakhâpazy, Mats Hummels ta a luh ta a supangia leipazy kha i â chhih kaw.

Real heta Liverpool nata Roma akhaihna liata a tlô viapa cha târi 26 Patô liana khita Kiev, Ukraine liata Final amâ khaih khei aw. Jurgen Klopp club Liverpool heta 1st leg liata 5-2 ta ama pahnie hapa, Roma hmiakô liata ama kao ama pabohsa thei ma? Atazâ zâcho liata pasiapa a châ ha bâ heih aw.