KHAZOHPA TA EIMA TLA AWPA PASAIH VEI - LIONEL MESSI
Lionel Messi chata zâhnia ta St Petersburg liata Nigeria nahta amâ khaihpa tluta a sapa nata thlahpa ta a tao pasapa y mãh vei, tahpa ta, Argentina cha World Cup tawhta ama tla awpa deikua pangiasa beih vei, "Achhâpa cha Khazohpa ta pasaih aw vei" a ta.
Messi heta Argentina hmia a sahna goal khôpa ta 1-0 ta pahniena to bâ awpa ama lyu kaw nota, Victor Moses ta Nigeria châta Penalty pangiapa ta a kaw pasu ei ta, 1-1 a châ ha heih. 1-1 ta amâ pahniethai tlai khiahta cha ama tla ha aw, tahpa cha a sia thlâh ha bâ.
Châhrasala Manchester United defender Marcos Rojo ta 87-na liata ama tlôna goal za khôpa ta, Argentina cha Thina tawhtapa pathyupa châ ei ta, Round of 16 amâ ngia haw!.
Daihti chhâ ta, Argentina player zy cha alyna mothlih chhaota tlyliah liata yna ziana rai pahno khao vei ei. Hâta eikha chhôh tlai phaohri zydua phaohpa ta hro rietheina lâthlôh a chhihpa, ama manager, Jorge Sampaoli, chhao huhiehna tlâh kiahpa ta, pahniena hladyu a pathluah ha hra.
Messi chata, “Khazohpa eima hnohta a y tahpa pahno na ta, ataopasuana tawhta miah pathla aw vei tahpa ei pahno” a ta.
Akhaihna ama patlô tawhta Messi heta ama Coach Sampaoli cha apyhpa ta, ama duasu riethei a chhih kawpa tawhta ama pua theipa cha âly hmeiseih tahpa a palâsa kaw.
He hawhta a châ nona heta Nigeria captain, Mikel chata, Argentina defender Marco Rojo bâh liata ball ta a khaipa cha Penalty ama pie cheingei awpa a châ nota ama pie leipa cha reipasipasua ta. Rojo bâh liata ball ta a khaipa cha referee, Cuneyt Cakir, ta VAR asaohiah taraw ta, Penalty deikua pie vei.
Mikel chata, “Kheitazie ta Penalty hmô leipa ma eima châ pahnothai vana: handball â chieh kawpa a châ,” tahpa ta, “Iran ta Portugal lâta Penalty ama hmôpa hlâta hmahta â chieh via" a ta.
