Mara Novel : NÂ NGIATHAI MA Y

Bo-I-na

"Lailai! Lailai!...kaw pua bâ bao...tv eima mo bâ hih!"

A ku liata laotlo ta a pakah chhôh â kaw ngia awpa cha chabai pathlapa hawhta phie dawrâ lia za tla pakhua ta..tichhâ liata a ku phiephu kei hniahnâ ta a viahkao lia â za hruhrâ ta, khôtho lâ tawhta sydiena ao thatlô kawpa chyh-eih awpa ta a pakah a kaw â ngâ nona chata, "Laitlua, vaw nie via tyh..a zo na nodi heih aw ..." tahpa nata ku tlao kawpa ta a nahkao avaw paraipa cha ã theihlô hmâ vei.

Thlai a tliehpapua ta, "Ei py bie ha...tv ei moh khoh" tahpa na ta khôtho lâ a chapie papuapa cha â raohpâ ha..a nahkao palo ngâkawpa nata a vih ngâkawpa hryta bâh ta a za sawpâ tyhpa chhao cha khôtho liata a viasa sahlao ano vaw hâtuhpazy hmi chata phie a pa mysa khai ha heih..

Nodina lei ta, awh pathizy, awh mathlawzy sai ta a chhuhrao tyhpa khata khizaw liata hmo hropa rai a ngiah khao heih vei!

A chaopasy cha noh thôh a pasy ha ta pua pyly vei! A luh roh cha a thao ta thao ha ta! Zârâh a zo hmeiseih hlâ a châ tarawpa ta a ôkhaih patliepa cha â lâ pha kaw!

A viahkao heilâh sâthôh tla ha ta; zârâh ziza chakuapa ta a py nata a chachôhna cha hmô ngâkaw hrasala, ziza chakhyhpazy ta a chhôhso khai pahlie vei..a viahkao byh liata satrelô pyu chata a hna a kaw sypa pyu cha pho pyly vei!

A viasanah cha ano hlâta a sosâh via hlei leipa ei ta! Kheita ma amâ sosâh via heih aw?tahpa pachâna phaoh pyly ei sala a ngia vei ei.

Khizaw cha a châna dâh hawhta a pyh ei ta! Khizaw liata palôhtlâhna zydua cha âmo eih tlâ châ!

My noh chhi ta, noh tla heih ta...ama palôh lia a rie chaipa cha viasa hryta chareipa deita a chã...

"Thâthâ satrelô sâpangawh einâ bâh chi.."

"Iiiihhh, khazia ei châ bâh aw?"

"Chiiii..na my heih mâ...zãhnia siku liata eina..."

"Avaw râ para tu..Laikhai pawnah O liata Lifeboyu hla ama sa ngâkaw..vy para tuù..Sâsâ zy chhao amâ ngia ha"

Satrelô rai palôh lia â lâ khao vei!

Ahy ma Puhpa Laikhai paw nah O chhi pahypa ta "TV eima vaw moh thei ma?" tah ngâh aw..tahpa deita cha a châ ha heih...

Khizaw ta "Riahchhiepazy a taolana" cha avaw lâ heihpa ta, a riahchhie chaipa ta chipa nata a chalyuna chôta "TV eima vaw moh thei ma?"tahpa ta a awh ngâpa cha a riahphapazy ta lâpaw tawhta vaw sai ei ta,

"Za moh tuuu...deikua vei pasai lei!"tahpa chyh-eihna ama thei raohpa ta a riahchhie chaipa, chhikao chakhyhtuhpa cha chhaopa ta amâ ngia chhu khai ha heih....

Khichhai irupa, a tly beih leina râh liata a lahmei pakhu khaipa ta â panawh tyhpa hawh tlai ta a panawhpa ta, thaphana nata chihuna pathi sâhdaih ngâna chôta amâ hnabeiseihna su sâh chaipa a y chhôhpa, siphiah, pathaih tu leipa liana chata tyuhmo paryhpa ta, TV liata O hneituhpazy ta ama mopa maih cha lôhrâtlô kawpa ta ama moh pazao lymâ ha hra.

Khizaw buah ta, noh nata daihti ya yzie hnei vei. Hmialâ daihti ngiarohna hlâta tlaichhaina ta ama palôh liata su to hluh via ta. Hnôhlâ daihti liata hmo a tlôpazy ta ama palôh liata zâkha dâhdei chhao riehmo paryh hmâ tyh vei. My noh vaw chhipa maih cha nohthiehpa hlâta zâ daihti pasih tu hapa avaw thlatuhpa hawh deita châ ta. Nôpaw kalachhôh liata rakhô chô liata saduthliena zydua paryhpa ta my noh vaw chhi heih awpa hâpa ta zâ daihti pakhôpa deita cha ama palôh liata â riepa a châ...

“A pahnie thlâh pyly aw...a pahnieh lei khiah kei châ vana!”

“A pahnie a pahnie khiahta la kei châ hr’aw vana....â chô pasa bai lai...a eikha a chôpa liata chyhsa 15 ama pao bao kha...pi dâh la”

“Keila molei Boss khaw kheita ma a pahnie thei tly...zo â chhihpâ vei”

“Iiiihhh...châtupaw châ! Khazia a pahnie vei...keila Mithun he na tlâ ei khoh chai...a chapawsaw tu..moleina ta amâ baopasu nota a phei heta kaw thua ta, a ngiatlâh lâ tawhta a rao kaw di ta, siphiah liata a za thy thlâh kha la...a chaotô a pasa hr’aw tlai my..hahaha”

Ama viasa sahlao ta TV ama mo chyta ama lôhawh tyhpa hawhpa pyly ta lôhawh heih ei ta. Cha zâ thlâpâ khaih kawpa ry liata lôhraoh kawpa ta a pazipa ta, ama mopha mopa chôchâh rei laihpa ta ama O lâthlôh ama ngai nona chata ama pachâna liata cha hawhpa daihti tluta phasapa y sala a ngia leipa ta, ama phei thuathâna dâh nata ama ku ama hiesaw laihna dâh tawhna chata cha zâ ta TV ama mopa chata ama palôh patlâh ta, tavia ta khâpa ma vaw tlôkhei ta, khâpa ta ma dy ei, tahpa rai ama palôhta pachâ beih vei ei.

           

Buakha chhôh tlai ama vaw sie tawhta, saikaopa, O rai ta a y leina su, chyhsa ta a pahrâ tahpa ta ama reina su, ama chi kaw tyhpa cha vaw tlô ei ta. Ama bâ ama hiesawpa nata ama phei ama thuathâpa cha bâhta a zie za y viapa ta, si ama dia ha thlâh ha bâ.

Saikaopa dahdy ama tlô chyta liana chata ama hryta pôhpahrei chaipa, laipahlawpa ama tah tyhpa Khailai chata eikhapi ta, “Thisaih sôh thisaih sôh” tahpa hla kaw pa-awh ta; cha hlapipa cha ama zydua ta â zipa ta cha saikaopa, thlahlôhna ta a tleisai tyhna su cha chatôh awpa ta amâ chhuahnoh haw.

Saikaopa dahdy ama kei tlô nona chata thlih he eikhapi ta vaw pathli ta; thlâpâ vaw kawpa ry liana chata saikaopa mathih lâchhâh liata thokô sahlao, thlih ta a hmôpa vâta a hiesaw ngâpa cha hmôchhei thai awpa châ vei. Khih luh lâ tawhta i athata vaw nga ta. Thlih vaw pathli heih ta. O kathi lâta thokôpazy chhao cha amâ hiesaw pasa via ha heih. Lâthlôh tawhta â hla leipa liata ravaw phao cha thlih ta a hiesawpa vâta â chatapa ta, pyury nahthlie pha tu leipa kaw papua ta; thlâpâ hra cha vaw tlô ta, china nata thlahzohna hnei chhieliepa ta cha su siepakhô haipa, chapaw hawti sahlaozy châta cha cha su cha, ama vaw pangiasapa hawhpa su tlai khiahma a châ thlâh haw?

Ama tlô hlâ tawhta hmahta china nata thlahzohna ta ama biena hryta Khailai chata, “Chyyyyy!!!” a tahpa nata â râpa a raoh ta, mohropazy chhao chata sâhpâ laina chôta Khailai cha pazipâ lymâ hra ei ta. Ama hryta hawti chaipa, Thâthâ cha eikhapi ta thlahzohna ao nata chana-ao a pahlaopahlipa ta, “Ei nâ!! Nâ!! Na vaw hâ tuuuu!” tahpa ta a uhta nah sahlao a hmia liata â râ ngâpa cha avaw chadai hra chaimâh ta. A uhta silipar âvaw ky parupa pyu cha bara ta siphiah chakhyhpa pyu hawh tlai he châ ta...a ao ne, a silipar pyu ne...khatita ma a uhtanah kiah a kei tlô hmâ, tahpa rai hmô hmâ awpa châ vei.

Saikaopa tawhta lâ hlâ tu leipa liana chata ama huhiahpa patlâpa ta a duah pakhy ei ta. Thâthâ chata khâchâ Khailai viahkao pai cha patu thlâh ha ta. Thlâpâ vaw kawpa ry liata a hna pakâhpa vâta a patlie khai hapa a ôhkhaih chô liata a mokhaoh a phawhlaw kawpa tawhna chata a chi hmeiseih tahpa â hno thlâh ha ta, a hmia cha thisaih a phahlapa hawhta a râhpadi thlâh ha bâ.

“Beithâtih, na riahchhie tu ha..kha hawhta sâh khao khâ...” tahpa ta huhiah kawpa ta a pakhuh chahnaona chôta Thâthâ chata vaw mopâ ta.

Thâthâ chata, “Ei pâ hnoh ei cha chhopa khai h’aw ei...” tahpa ta china thlahpa ta a tleisai pathao ha, tahpa â hno thlâh hapa hmiphaohpa ta pahnei daihmâ, cha daihmâ tahpa ta ao a chalyupâ ngâna chôta kaw tah ta.

Khailai chata Thâthâ ku ta a viahkao a patupa cha za thypa ta, “Na ngâh khiah na chho khaw..keimo hnoh TV moh khao va chi..na riahchhie tu ha..eima py liata y tlâh chhao châ chi” vaw tah ta.

Liahsa ama huhiahpazy a tlâh tawhta lôhraoh kawpa ta ama O nochâchyu ngai awpa ta avaw pazi lymâ ha heih ei ta.

Khailai chata, “Ei pâzy ama hawti via nota la kha su lia khaw hawsaih chapa ao ama thei tyh ama ta. Ei pâ ta eina chhopa la, kha su ama siepakhô na ta la Khazohpa hla ama sa cheingei tyh” kaw tah ta. Cha Khailai bie reipa chata thlalôhna hlâta china ziza vaw pathlisa heihpa ta, ama TV mopa rai rai ta ama pakah liata bie nata hla pie thei khao vei. Reikah leipa ta ama O lâ a di awpa ta ama hmialâ pangai lymâ ha heih ei ta.

Ama khih chao lâ tawhta a luh lâ TV kaw mohpa ama châ hapa bao hnaihta amâ dipa chhao cha daihti ama ryu ngaita kaw. Zâ rei lâ châ daihmâ ha bâ ta. O hluh viapazy ta mei-ôh pazohpa ta si dia ha ei ta. O thokha tawhta satlia nata laihsa pahneih ngâpa ao nata reih zy, i nga ngâpazy nata lâthlôh kiah liata chiahcharipa pyury tah leipa cha thei awpa y khao vei.

Chô lâta thlâpâ vaw kawpa chata cha hawtipa, palôh pathaih kawpa sahlaozy cha ama O ama tlôna taihta pathlie â chhuah khiahma, tahpâ ngâ awpa ta ama luh chô dahdy liana chata zi lymâ sala a ngia ta. Cha zâ cha hawti lôhpathaihpazy châta a khaihpa alyu kaw.

Lailai-nah O kachha vaw tlô ei ta..Lailai chata a aoki liahsa pahnai khaipa ta, a hmaoh liata a kudy kaw pataopa ta a viasanah khei chata, “Shhhh...palo khao khuuu...atazâ ei pâ ta ei vaw pua chy ta ei nahkao na parai ta..a pasa dâh la atahmâ taihta â vih ngâkaw khiahma ei ta...mylâ siku lia eimâ hmô u sy” tahpa ta ama O cha za ngaipâ ha ta.

Ama o pangaina tawhta ama kahmi chhao keih thôh chakâ deita a châ bâ aw, tahpa liata, liahsa a pachyh paryh khaipa ta, china nata thlahzohna ao a pahlaopahlipa ta, a paro ngâsâpa ta nata a râpâ lymâpa ta, “Ei nâ!! Ei nâ!!,,,” tahpa ta a ao a chalyu khaipa ta a râ lymâ ta. Ama O chhi cha khati ma â zâ pypahly pahno hmâ vei. O chhi cha a kaw pahy ta a nô hmi a hmô patawnah ta thlalôhna thiehpa a to ha khiahma tahpâ ngâ awpa ta a thlahzohna ao cha pahneina ao ta vaw thlapa ta, “Ei nâ a mô mâh chi mâ?” tahpa ta a nô cha apyh para ta. O chhôh lâ tawhna chata, “Laitlua, a dina châh chhao na pahno vei dia? Hâti ria lei chi ta atahmâzy namâ di? Nâma vâta eimâ mô thei lei he..avaw ngia tua” tahpa ta a paw ao vaw paropa cha a nô hnorâh a patu laihna chôta ngiaroh kawna chôta ngai haw ta.

Ama chhôhpadâhpa mei-ôh, dawhkâh paroh kaw bâpa chô liata ia hnolopa khaihna ta â ô phapa rakhô tlâh liata avaw tyuh thlâh hapa a paw hmia phaozie tawhta nata ama chhôhpadâh chhôh liata rohiah thlôh kawpa a zaw ngâpa tawhna chata a paw cha sahma a pari heih tahpa cha pahno theipâ ha ta.

Lailai chata a paw hmi a hmô patawnah chata a nô hnorâh â patu ngâpa cha pathliepa ta a nô cha â pahlina châta hmâpa ta a tie ngâh khao leipa ta a duah haw ta.

“Laitlua, a vy tua...khâma zâ reina taihta na pua tyh. Ei khazie ma a zo pua khao kha y ei cha tah vei? Nâma vâta eimâ mô thei lei he na pahno ma?” tahpa ta a ku chata Lailai cha vaw paza ta. Lailai nô chata thlai a sawchapawpa cha vaw vaihpa ta, a ku ta vaw pakhâ ta. Lailai paw chata ama nô ku cha thy pathlah heihpa ta Lailai chipa nata a chalyupa ta a nô hnorâh liata a nyu ngâpa cha a nahkao paraipa ta rakhô lâ cha a kei ta. A nahkao liata a paraina a pasa a tah tu hapa vâna chata Lailai cha kaw chapa ta, “Ei nâ, a pasa tu chuh” tahpa ta a nô cha kaw mohpa ta a mohthlih cha â zâ tawpâ ta.

A nô chata thlai a paw ku cha thypa ta, “Thakhai, eikhazie ma na sawchapawpa nahkao parai khao kha y ei cha ta? A nah zy na parao mâh tâ. Na parina châhki tan a sawchapawpa chô liata heta he na y tyh bao. Hawtipa châ ta, eima chhopa ama myna châh chhao y aw. A pha tat a chhoreipa y leipa ta, na kun a pathla tyh bao. A zo lâ pua awpa na khoh lei khiahta cha TV chaleipa bao. Khâpa hmah châ tlôh lei ta na pari ngâthlâh hra bao” tahpa ta Lailai cha ano lâ a kei ta.

Lailai paw chata, “Chanô, Nori, Zari, a chalih! Khata rai na palie khâ? Ei sawchapaw châ ta, ei khoh khiah ei chhorei tlai..saw hropa chhao na sapa thei chi vâ!..Nama nôsaw ta dyuchhai lia a kaw zia tu..ei mô ha aw” tahpa ta rakhô liata a zâ hluahpa ta, pohhluh a khupa ta pahnawhpâ lymâ haw ta.

Lailai nô cha mei-ôh khaih hnolopa ry liana chata a hmiaphaozie â thla khai ha, tahpa â hmô thei ta. Ama paw reikah chata a palôh a hria hmeiseih tahpa â hmô thei thlâh ha.

Lailai a pih nona heta thi daihmâ ha ta. Dawhtynah ta saw hropa a sa heih khiahta la a hrona châta chhao chi â chhih thei, tahpa ta ama chhosiepa vâta kho lei kawna chôta â pataosapa ta, Lailai deita saw ama hneipa a châ. Ama paw heta a parina châhki ta hetana heta tah tyh ta. He hawhta a tahna ta cha a palôh hria pachaih tyhpa ta, atahmâ chhao a mohthlih liahsa a pa-ô khai ha heih. Châhrasala, Lailai ta a hmô lei n’awpa ta a kaw hrupa ta, a hnorâh liata a luh pabu khaipa ta a paw ta a nahkao a paraina chamao ngâpa Lailai cha za mohpa ta, a luh za chamaopa ta, a hu kaw la ta, ama O chhôh cha a zoh pachaihpa ta pahno leithei vei.

Lailai cha a pyhpa ta, rakhô tlâh liana chata atyuhpa ta, cha zâ sidia kaw bâpa ry liana chata ama paw pahnawh ngâpa pyu hry liata a sawchapaw â kaw sihna-ipa pyu dei leipa cha thei awpa y vei. A sawchapaw palôhâh leina vâta a paw ta ama pano ta reikah a ngia lei kawpa ta a tah tyhpa cha sahma a paripa vâta châ hrasala, a palôhta liata chaihzô ki pazaopa ta dypa hawh tlupo ta pasa leithei tyh tlô vâ!

Lailai paw sahma do tyhna chhâpa cha ano vâta a châpa hawhta â zâ pahnona daihti y leithei tyh leipa ta, saw hropa a sa thei khao leipa vâta cha hawhta a ypa chhao a châ thei aw, tahna za hnei tyh ta.

Ano hmâchhâ â thai leipa ta Lailai paw a ngiachhie kawna daihti chhao a y tyh hra. A châhta cha ama O chhôh ziza a hri kawpa puasaipa ta, a nô nah O lâ kua awpa a khohna daihtizy chhao za y tyh ta, châhrasala, Lailai cha kheita a y aw? Ano vaw y khao leipa sala Lailai paw chhao rai cha kheita a y hlei hra aw? Chhôhkha kholei kawna chôta Lailai paw nahta â râpa châ ei ta, amâ hnei nota a chhôhkhanah ta ama kholeizie zy kha my leipa ta, ama O lâ kua heih hrasala hnabeiseih awpa y pyly hra vei...Cha zâ sidia kawpa chata a pachâna cha ma a pahno khei hra ma...pachârôhna nata nôpona â chakaih hrapa a za lyu kaw...

Buakha chhôh tlai cha hawhta a pachâna khizaw liata khitlypa ta hmo totie a patuapaluana tawhpa cha a kaw hrapa ta, a byh chô liata Lailai, a mohthlih chhaota a mô hapa hmi cha za moh ta, kyhpachâna nata a sawchapawpa hmialâ daihti pachâna chata vaw khu heihpa ta, rakhô liana chata a sawchapaw cha paziapa ta, a kiah liana chata â zâ ziapâ ha hra ta. Nohchhôh lâta â pielyuna nata a zo lâta a palôh rietheina chata mokuna ta a taikhy ngâpa cha pahnie khao leipa ta, a mo vo cha a zâ khawpa ta, mylâ my nohchhih nohthiehpa dy awpa ta â mô ha hra...

(Pazao awpa...)